13
Bawipa Jesuh naw Ang Düihpüi Gui ah Kho m'Si Ci
1 Akhin cu Pasakha pawi agawk nak vai hnüüp ät m'hni ba ci. Bawipa Jesuh naw khomdek nawng shüt ne Apa ah a hteh nak ba vai
ah akhin a gawk law cu hmat ci. Ani naw khomdek khan ah ak chang
gui cu ang htei ah m'hni gui ci, kho ang pyi ung khüt khai ah
m'hni gui ci.
2 Bawipa Jesuh la ang Düihpüi gui cu mü-ei ei ci gui. Khoshe naw Simon Iskariot a hta Judas cu, gaa ah kut ung Bawipa Jesuh cu a
ap vai ah am lung kyong ah am cäi pyi ah kiak ci.
3 Apa naw hlüngtai nak akbe ah a peit cu Bawipa Jesuh naw hmat ci: Khanpughi ah kaa law ne, Khanpughi ah a hteh ba vai cun phi hmat
ci.
4 Cun ah kia sei, a ngoh nak ung kaa ng'düi law ne, a suinu cu sut netah, hmai ghunak la ne akhei cu ven nak ci.
5 Cun kawn ah tuiko ung tui kei ne ang düihpüi gui ah khaw cu m'si netah, hmai ghu nak kawn ami kho cu ghu pe gui ci.
6 Simon Peter ah gawk khätah, Peter naw, “Bawipa kei ah kho nam si khai maa?” cik ci.
7 Bawipa Jesuh naw, “Kei ah bi cu tuhbäi nang naw kä na hmat ci, cun ung phi ngawi ah na hmat khai nei” ci ne kiak nak ci.
8 Peter naw, “nang Bawipa naw kei ah kho cu a i zah ung phi kä nam si khai nei” cik ci.
Bawipa Jesuh naw, “Kei naw na kho kä ka ning m'si ung, nang cu
kei ah ng'düihpüi ah kä na kia ba khai” ci ne kiak nak ci.
9 Peter naw, “Bawipa, ka kho bäng ah kä kiak ciah ka kut la ka pum phi nam si ä” cik ci.
10 Bawipa Jesuh naw, “Tui ng'si pyi ci cu apum avan theing pyi ci kia sei, akho bäng m'si vai hlü ci. Nangmi ung kaa tumat ah kawn
ah nami van nami theing pyi ci nei” ci ne pyein ci.
11 (Bawipa Jesuh naw gaa ah kut ung ap khai ah chang cu hmat pyi ciah kia netah, tumat ah kawn ah nami van nami theing pyi ci nei’
aciah kiak ci).
12 Bawipa Jesuh cu ang düihpüi gui ah kho am si kawn ah asuinu sui ba ne ngo tu ba ci. Cun kawn ah Bawipa naw, “nangmi ah khan ah
kabi cu nami hmat ci ang?” ci ne ng'shi gui ci.
13 “Nangmi naw kei-am, ‘Saza awi, Bawipa awi’ ci ne nami na khü ci. Acun ah ka kiak ci kia sei, acun ah nami na khü cu nik ci.
14 Kei cu nami Bawipa la nami saza ah ka kiak ci, cun ung phi nami kho kam si pyi ci. Cun ah kia sei nami mät gui nami kho nami
ng'si tu peit vai.
15 Nangmi ah khan ah ka bi ah mäih ah nami mät gui ung nami bi vai ah ka ning m'shüm thein gui nei.
16 Kei naw akcang ka pyein cu, “Changshäm cu khuimah ah mä kä tai pi man ci.
17 Tuhbäi nangmi naw ng'thu düng nami hmat pyi ci, a cun ah mäih ah nami om ung, nangmi ung zeikiai na om khai”.
18 “Nangmi nami van ka ning pyein gui ah kä kiak ci; ka ning ghü gui ah kia sei ka ning hmat gui zawp ci. Cun ung phi cacim ung,
“Kei ah buh ei ci naw kei na khep ba ci nei” ci cu kümbe khai
nei.
19 Shin ah mawng gui ng'dawt ne ka ning m'thein gui cu, ka pyein gui akcang ah a kiak law hnüüp ung ‘Kei cu Kei'ah ka kiak ah mawng
nami zum vai ah hmawk ah kiak ci.
20 Kei naw akcang ka pyein cu, “Kei ah tüih law dou ci cu kei na dou ciah kiak ci, kei na dou ci cu kei na tüi lawk ci dou ciah
kiak ci” ci ne m'thein gui ci.
Bawipa Jesuh naw Gaa-am Ami Ap Vai ah Mawng ng'dawt ne Pyein Ci
(Matthe 26:20-25; Makuh 14:17-21; Luka 22:21-23)
21 Cun kawn ah Bawipa Jesuh cu am lung kyong ah ang htei ah zaica netah, “kei naw akcang ka pyein cu, nangmi ung kaa chang tumat
naw kei cu gaa ah kut ung na ap khai nei” ci ne ang dang ah
pyein ci.
22 A u bä a pyein ah kä hmat u netah, ang düihpüi gui cu tumat la tumat cäi ne ng'teng tuk ci gui.
23 Cun zah ung Bawipa Jesuh ah am hni pi ah ang düihpüi chang tumat cu akpat lam ah ngok ci.
24 Simon Peter naw, “Nang Bawipa a u nei na pyein, ci ah ang shi vai ah mik m'ghi nak ci.
25 Acun ah ang düihpüi cu Bawipa Jesuh ah pei ah vang et netah, “Bawipa, a cun ah chang cu a u nei” ci ne ng'shik ci.
26 Bawipa Jesuh naw, “Shin ah m'htut k'bou ne khap ung zuk phung netah ka peit ah chang cu a ani nei” ci ne m'htut bou la ne khap
ung phung netah, Simon Iskhariot ah hta Judas-am pek ci.
27 Cun ah m'htut la ne a ei vai-am satan cu ani ah kyong ah lut pyi ci.
28 Cun kawn ah Bawipa Jesuh naw, “na bi vai cu akzä ah nabi vai nei” ci ne kiak nak ci. A i ah kia sei Judas-am cun a ci nak ah
acun ung ngok ci gui naw kä hmat ci gui.
29 Judas cu ngui ip shäm ne ngui khäm ciah kia sei, pawi ung kaa vai a i bawi khleih vai, kä cun ung, pyamthaam ci-am peit taak
vai ah Bawipa Jesuh naw täk ciah am shah naw ngai ci gui.
30 Judas Iskhariot cu m'htu k'bou tumat la netah a cun vai-am akpung ah hteit ci. Cun zah cu mü ah kiak ci.
Thukhän Thai
31 Judas a hteh kawn ah Bawipa Jesuh naw, “Tuhbäi chang ah Htapa ah bämang nak cu deikhang pyi ci, Khanpughi ah bäimang nak phi
chang ah Htapa ung dei ne dang pyi ci.
32 Khanpughi naw abämang nak cu chang ah Htapa ung ang dang sak kawn ah chang ah Htapa ah bämang nak phi amät naw dang sak
khai, atuhbäi acun cu bi law ge khai.
33 Ka hta gui aw, kei cu nangmi awn atäng ah ashäng hta vah ka om ba khai. Nangmi naw nami na shui khai, kei ka hteh nak ah nangmi
kä nami hteit tu hlawt khai; ci ne, Jew chang ng'vai gui ka
pyein nak gui ah mäih ah tuhbäi nangmi ka ning pyein na gui ci.
34 Tuhbäi Thukhän thai ka ning pe gui ci, “tumat la tumat nami ng'hni tu vai nei, kei naw ka ning m'hni gui ah mäih ah nami
mät nami ng'hni tu vai nei.
35 Nangmi tumat la tumat zumhni tu ne nami om ah a kiak ung, ning teng gui ciah chang gui phung naw,
kei ah ning düihpüi gui ah ning hmat gui khai nei” ci ne kiak
na gui ci.
Peter Naw Amaa vai ah Mawng Bawipa Jesuh naw ng'Dawt Ne Pyein Ci
(Matthe 26:31-35; Makuh 14:27-31; Luka 22:31-34)
36 Simon Peter naw, “Bawipa, ahawi ah na hteit khai?” ci ne ng'shik ci. Bawipa Jesuh naw, “Kei ah ka hteh nak ah tuhbäi kä na na
läk hlawt khai, angawi ah vah na na läk hlawt khai” ci ne kiak
nak ci.
37 Peter naw, “Bawipa, a i ah kia sei tuhbäi kä ka ning läk hlawt vai ang? Nang ah hmawk ah ka ghin nak phi ka pek khai nei”
ci ne pyein ci.
38 Bawipa Jesuh naw, “Nang naw kei ah hmawk ah na ghin nak na pek khai maa? Kei naw akcang ka pyein cu, ai kä ah khawn pha ung ani
kä ka hmat ci nei ci ne thum vei na na mak khai nei” ci ne kiak
nak ci.