JOHAN
AH GUK NG'THU NI
The Gospel According to John
Johan ah guk ah ng'Thu Ni ung Bawipa Jesuh cu “chang ah zung tüi law ne ang täih ah na om püi gui ciah, Khanpughi ah ng'Thu ah kiak ci” cik ci.
Ca uk a mät naw am dang nak ung “Shin ah Thu Ni guk ah a mawng cu, Bawipa Jesuh cu, shaitaak ah Hunbawi la Khanpughi ah Htapa ah kiak ci,” ciah, chang gui naw zum u netah, zum ciah chang phung naw ghin nak ami gah vai ah hmawk ah kiak ci. (20:30).
Tünnak awn ah, Bawipa Jesuh cu Khanpughi ah ang täi ghin nak ng'Thu ah kiak ci,” ciah m'dang netah, Bawipa Jesuh cu shaitaak ah Hunbawi la Khanpughi ah Htapa ah a kiak ah mawng, cäicat aih gui vai awn am dang nak cu, va leng ne guk ci. Cun tawi nak ah cäicat gui vai abi cu, chang gui naw ami hmat vai ah m'dang ne gu ba ci. Cun kawn ah Bawipa Jesuh zum ne ahnu ah läk ci gui la, kä zum ne maa nak ci gui ah amawng cu gu ba ci. Akdäm 13-17 ung ami phaa vai mü, Bawipa Jesuh cu angdüihpüi gui awn ang täng ah ng'bum u netah asih law vai ah mawng am cäi nak gui la, k'thagui a peit nak gui cu gu ba ci. Cun kawn ah Bawipa Jesuh ami phaa ah mawng, ami ngawn ah mawng, sih nak ung kaa a thawh ba ah mawng la, angdüihpüi gui ah ma ah ang dang ba gui cu, gu ba ci.
(8:1-11) ung Pawmzau ciah hnumi ah mawng cu, kut awn ami guk htük gui la ami k'phlan htük gui ung kä om sei phi, a hei gui ung om ci kia sei, m'küüp nak awn guk ah kiak ci.
Johan naw Bawipa Jesuh Khrit ung, ang täi ghin nak gah ah mawng, am geinsei nak ah mawng, Bawipa Jesuh cu lam, ng'düngnak la ghinnak ah a kiak ah mawng gui cu, ng'dang pi khai ah guk ci.
Johan ah guk ani nak pi cu, chang gui naw ami hmuhmat zäi vai ah, tui, m'htut, akdei, htoshäm, la hto, sapyit la am theih, gui ni awn amtumtäng nak cu dang khai ah a guk nak ah kiak ci.
1
Ghinnak ah Ng'Thu
1 Khomdek kä a ng'tüi pha ung Thu cu om ci. Thu cu Khanpughi awn atäng ah om ci.
Thu cu Khanpughi ah phi kia ci.
2 Akhtük bäih ung Thu cu Khanpguhi awn atäng ah om ci.
3 Khanpughi naw Thu awn ang tüi avan tüisho ci.
4 Ani ah kä tüisho a i phi kä om ci. Thu ung ghinnak om ci. ghinnak cu chang gui ah akdei ah kia ci.
5 Akdei cu akhmüp ung khang sei, akhmüp naw kä dou hlük ci.
6 Johan ming nak ci cu Khanpughi naw ng'shä ah tüi lawk ci.
7 Chang gui naw akdei ami zum hmat tu vai ah, akdei ah mawng pyein khai lawk ci.
8 Ani cu akdei ah kä kia ci. Akdei ah mawng pyein khai ah lawk ci.
9 Akcang ah akdei cu khomdek khan ah gawk law ne chang van ah khan ah khang ci.
10 Thu cu khomdek khan ah om pyi ci. Khanpughi naw ani awn khomdek phi tüisho pyi ci.
11 Cun ung phi khomdek naw ani kä zum hmat ci. Ani cu amät ah kho ng'lei ung law na sei phi ak chang gui naw kä dou ci gui.
12 Ani dou ne zum ciah chang gui-am Khanpughi ah hta ah kiak nak pe gui ci.
13 Cun ah hta gui cu amät ng'tüi lawk ci la chang pa nah ne ng'tüi lawk ci gui ah kä kia ci. Khanpughi ung ng'tüi lawk ci gui ah kiak ci.
14 Thu cu chang ah zung tüi law pyi ci. M'geinsei nak la düngnak awn be ne mik mi ung om pyi ci. Abämang nak phi mi hmu pyi ci. Cun ah bämang nak cu Khanpughi ah Htapa ah a kiak nak awn agah ah kiak ci.
15 Johan naw ani ah mawng ng'shä ne a pyein cu, “Kei naw ka pyein man ah chang cu ani nei, ani cu kei ah hnu ah lawk ci, cun ung phi kei ah hlüngtai pi ci, a i ah kia sei ci ung ani cu kei kä ka ng'tüi pha ung ng'tüi pyi ci.
16 Ani cu m'geinsei nak awn kümbe ne, chang van tumat täi-am m'shumhyuk nak na pe gui ci.
17 Khanpughi naw Thukhän cu Mose ung na pe gui ci, cun ung phi geinsei nak la düng nak cu Jesuh Chrit ung na pe gui ci.
18 Khanpughi cu a u naw kä hmu man ci, cun ung phi Khanpughi awn täng ne ani ah coi ung om ciah Ahtapa naw Khanpughi cu m'dang pyi ci.
Tuihnim Johan ah Thu Pyein
(Matthe 3:1-12; Makuh 1:1-8; Luka 3:1-18)
19 Jerusalem kho ah Judah ng'vai gui naw, taigü gui la levit gui cu Johan ah tüi law u netah, “Nang cu a u ang?” ciah ng'shi sak gui ci gui.
20 Johan naw, “Kei cu Messiah ah kä ka kiak ci nei” ci ne akdei angdang ah m'thein gui ci.
21 Ngami naw, “Cun ung nang a u ang? Nang Eliah ma?” ci ne ng'shi ba ci gui. Johan naw, “Kei cu Eliah ah kä ka kia ci nei” ci ba ci. Cun ung nang profet ma ci ne ng'shi ba mä u sei phi, “ka nei” ci ba ci.
22 Ngami naw cun ung nang a u ah na kiak cu nam thein gui ä, nang shi sak gui ci-am kami m'thein ba gui vai” cik ci gui.
23 Johan naw, “Kei cu profet Isaiah ah pyein ah mäih ah, Bawipa ah lam ng'düng sak vä ci ne, bungpuk ah ng'khü ciah chang ah ka kiak ci” cik ci.
24 Pharise gui ah tüih law chang gui naw, “Nang cu Messiah ah phi kä na kiak ung,
25 Elijah ah phi kä na kiak ung, profet ah phi kä na kiak ung, a i vai tuihnim nak na peit ang?” cik ci gui.
26 Johan naw, “Kei naw tuihnim nak ka ning pe gui ci, cun ung phi nami ng'lung ah kä nami hmat tumat om ci, ani cu kei ah hnu ah lawk ci,
27 Cun ung phi kei cu ani ah phahnat gui k'phian khai ah phi kä ka khin ci” cik ci.
28 Shin ah bi nak gui avan cu Johan naw tuihnim nak apeit nak Jordan tuinu hei gaa Bethani kho ung kaa ah kiak ci.
Khanpughi ah Htome Hta
29 A ngawi ung Bawipa Jesuh a law Johan naw hmu netah, “Teng vä! ani cu, khomdek khan ah hmakat nak hteh püi ciah Khanpughi ah Htome hta nei”.
30 Kei ah hnu ah lawk ci cu, kei kä kang tüi pha ung ng'tüi ne kei ah hlüngtai pi ci nei, ci ne ka pyein man cu ani ah kiak ci nei.
31 Azan ani kä hmat man ci, cun ung phi Israel chang gui naw, ami hmat vai ah tuihnim nak ka peit nei” cik ci.
32 Cun kawn ah Johan naw, “Müüm bawk ah mäih lawk ciah Mumcha Theing cu, khankho ah kaa kyum law ne, alu khan ah ngo law sei ka hmuk ci.
33 Azan ani kä hmat man ci, cun ung phi tuihnim nak ka pek khai ah na tüi lawk ciah Khanpughi naw,” Khankho ah kaa Mumcha Theing kyum law ne, alu khan ah ngo law sei, na hmuh ah chang cu Mumcha Theing awn hnim nak pek khai ah chang nei,” ci ne ana m'thein pyi ah kia ci.
34 Cun ah chang cu kei naw ka hmu pyi ci kia sei, “Ani cu Khanpughi ah Htapa ah kiak ci nei, ci ne ka ning m'thein gui nei” cik ci.
Bawipa Jesuh ah Ng'Düihpüi Htük Gui
35 A ngawi ung Johan la ang khahpüi goi ami ng'düih zah ung, Bawipa Jesuh a law hmu u netah, Johan naw,
36 “Teng tu vä, Khanpughi ah Htome hta cu ani nei” cik ci.
37 Cun a ci ng'za u netah, ang khahpüi goi cu, Bawipa Jesuh ah ahnu ah läk tuk ci goi.
38 Bawipa Jesuh naw ani läk law hmu goi netah, “a i na ni shui ci- ang?” ci ne ng'shi goi ci. Ngani naw, “Rabbi, a hawi na om ci ang?” ci ne ng'shik ci goi.
39 Bawipa Jesuh naw, “Law ne teng law niä,” ci sei, ahnu ah hteit tu ne, a om nak ah gawk tu ni netah, mü ne om tuk ci goi.
40 Bawipa Jesuh ah hnu läk ci goi ung kaa, tumat cu, Antaru, Simon Peter ah a phäi ah kiak ci.
41 Antaru naw anau Simon hmu netah, “Messiah ni hmu pyi ci nei” cik ci. (Messiah cu Chrit ah kiak ci).
42 Cun kawn ah Simon cu Bawipa Jesuh ah om nak ah hteh püi ci. Bawipa Jesuh naw, Simon cu hmu law netah, “Nang cu Johan ah hta Simon ah na kiak ci, Cun ung phi tuhbäi ung tün ne, Cephasa (cun cu Peter, ci la lungnu ciah kiak ci) na ming nak khai” cik ci.
Bawipa Jesuh naw Philip la Nahtanelah Khü Goi ci.
43 Angawi ung Bawipa Jesuh cu Kalile kho ah a hteh nak ba ah, Philip cu hmu netah, “Na läk ä” cik ci.
44 (Philip cu Antaru la Peter ah om nak Bethsaida kho ah kaa ah kiak ci).
45 Philip naw Nahtanelah hmu netah, “Mose naw thukhän ung a guk la, Profet gui naw ami guk ah mäih ah, Nazareth kho ah kaa Josep ah hta Jesuh cu, ni hmu pyi ci nei” cik ci.
46 Nahtanelah naw, “Nazaret ung kaa akni ng'tüisho hning khai ma?” ci khätah, Philip naw, “Law ne teng lawä” cik ci.
47 Bawipa Jesuh naw Nahtanelah a law hmu netah, “Ani cu, Israel chang akcang ah kiak ci nei, ani ung hleeihlak nak kä om ci nei” cik ci.
48 Nahtanelah naw, “A i hawk cha ah kei na na hmat ang?” ci ne ng'shik ci. Bawipa Jesuh naw, “Philip naw kä a ning khü pha ung, kthei ghing kaa ah om ci sei, ka ning hmuk ci nei” cik ci.
49 Nahtanelah naw, “Rabbi, nang cu Khanpughi ah Htapa ah na kiak ci, Israel ah Khanpughi ah na kiak ci” cik ci.
50 Bawipa Jesuh naw, Ani-am, “Thei ghing kaa ah om ci sei, ka ning hmuk ci, ka ci ah hmawk ah na na zum ci ma? Cun ah tah cäicat pi gui vai na hmu lawk khai nei” cik ci.
51 Bawipa Jesuh naw, “Kei naw akcang ka pyein cu, Khankho m'kawt hmawng law khätah chang ah Htapa ah khan ah khankho chang gui kyum kai u sei nami hmu lawk khai nei” ci na gui ci.