3
Khanpughi ah Htanau Gui
1 Pa Khanpughi ah anam hni nak gui cu a i hlawk ah däm ciah teng shüm vä! Anam hni nak gui cu däm aih sei, mik mi cu Khanpughi
ah htanau ah mi ming tuk ci, akcang ah phi a htanau ah mi kiak
ci. Cun ung phi khomdek chang gui naw cun ah mik mi kä ami na
hmat gui ah mawng cu, ngahmi naw Khanpughi kä ami hmat ah hmawk
ah kiak ci.
Ref 3:1 Jn 1:12
2 Ka püi gui aw, mik mi cu tuhbäi Khanpughi ah htanau gui ah mi kiak ci nei, cun ung phi ngawi ah a i ah mi kiak law vai cu kä
ng'hmat pang sei phi, Bawi Khrit a kyum law ba hnüüp ung, ani
awn täng ne mi om khai, amäô akcang cun phi mi hmuk khai, ci cu
mi hmat ci.
3 Bawi Khrit ung cun ah ngaih u nak om ciah chang phung cu, Bawi Khrit a theingcim ah mäih ah theingcim nak om ci nei.
4 Cheishoh nak cu thukhän m'shet nak ah kia sei, cheishoh ciah chang gui cu Khanpughi ah thukhän m'shet ci gui ah kiak ci.
5 Bawi Khrit cu cheishoh nak theek sak khai ah kyum lawk ci, ci cu nami hmat ci; Bawi Khrit ung cheishoh nak kä om ci.
Ref 3:5 Jhn 1:29
6 Cun ah kia sei Bawi Khrit ung kawng ät ne ghing ciah chang cu, cheishoh nak kä bi ba ci, cheishoh nak bi ba ci cu ani kä
hmuhmat ciah chang ah kiak ci.
7 Ka htanau gui aw, a u naw kä ning zoshe-en ah gui sä! Bawi Khrit ang düngdau ah mäih ah düng nak bik ciah chang cu düngdau ci.
8 Cheishoh nak bi lä ciah chang cu Khoshe ah paw ah kiak ci, a i ah kia sei ci ung Khoshe cu ak htük ge ung cheishoh ciah kiak
ci. Khanpughi ah Htapa a kyum law nak ah amawng cu, Khoshe ah
bilawh phung m'di ne m'siu vai ah kiak ci.
9 Khanpughi ah htanau ah kiak ci cun naw cheishoh nak kä bi ba ci, ani ung Khanpughi ah ng'zung om pyi ci. A i ah kia sei ci ung
Khanpughi cu Apa ah kia sei, ani naw cheishoh nak kä bi ba hlawt
ci.
10 Ashin ah mawng awn Khanpughi ah htanau la Khoshe ah htanau ah ng'lakmah nak cu ng'htei ne dang ci. Ng'düng nak kä om ciah
chang, a phäinau kä m'hni ciah chang cu Khanpughi ah htanau ah
kä kiak ci.
Tumat La Tumat Nami Ng'Hni Tu Vai
11 Cau ak htük ge ung mi ng'zak ah thu Ni cu, “Mik mi cu tumat la tumat mi ng'hni tuk khai nei,” ciah kiak ci.
Ref 3:11 Jhn 13:34
12 Mik mi cu Kain ah mäih ah kä mi kia en vai nei. Ani ung khoshe om sei, a nau Abelah cu ngawn ci nei. Kain naw a i ah kia sei a
ngawn ang? Ani ah bilawh gui cu cheishoh ne a nau ah bilawh gui
cu ang düng ah hmawk ah kiak ci.
Ref 3:12 Gen 4:8
13 Cun ah kia sei ka phäi nau gui aw, khomdek chang gui naw ami ning gen gui ung kä nami ng'ä vai nei.
14 Mik mi cu mi phäi nau gui mi m'hni ah hmawk ah sih nak nawng shüt ne ghin nak ung mi gawk pyi ci, ci cu mi hmat ci. A phäi
nau käm hni ciah chang cu sih nak ah kaa ah om lä ciah kiak
ci.
Ref 3:14 Jn 5:24
15 A phäi nau thüi nak ciah chang cu chang ngawn ciah kiak ci, Chang ngawn ciah chang naw ang täi ghin nak kä gah hlawt khai
ci cu nami hmat ci.
16 Bawi Khrit naw mik mi ah hmawk ah a hnun gui cu a peit ah kia sei, mik mi naw m'hni nak akcang cu mi hmat ci. Mik mi phi mi phäi
nau ah phäh ah mi hnun gui mi peit vai hlü ci.
17 Bämang ciah chang ah kia lang ne, a phäi nau tumat mat geinvai sei hmu netah am lung choh khai ciah chang cun naw, a i hawk chaa
ah Khanpughi kam hni ci nei, a ci thei vai ang?
18 Ka hta nau gui aw, mik mi ah m'hni nak cu thu la m'gawng düt ah kä kia ne, hnün thawh nak ung dang ciah m'hni nak akcang ah
kiak vai nei.
Khanpughi ah Ma ah Thamah Nak
19 Cun ung mik mi cu Thu thuuk cu mi khäm ne, Khanpughi ah ma ah ngaih gep sei mi om khai.
20 Mi m'lung ngaih naw anam shet m'kat law gui ung phi, Khanpughi cu mi m'lung ngaih ah mä hlüngtai pi ne, apäng avan hmat zawp ci,
ci cu mi hmat ci.
21 Cun ah kia sei teihpüi gui aw, mi m'lung ngaih naw kä a nam shetkat gui ah a kiak ung, Khanpughi ah ma ah thamah ne mi om ci
nei.
22 Mik mi cu ang thukhän läk ne, ang zak hlü ah mi bilo ci kia ne, ani ah mi ng'zoih thäh phung cu mi gah ci.
23 Ani ah thukhän cu, Ahtapa Bawi Jesuh Khrit cu mi zum vai, Bawi Khrit ah thukhän ah mäih ah tumat la tumat mi ng'hni tu vai ah
kiak ci.
Ref 3:23 Jhn 13:34; 15:12,17
24 Khanpughi ah thukhän läk ciah chang cu Khanpughi ung ghing ci, Khanpughi phi ani ung ghing ci. Mik mi awn kawng ät ne Khanpughi
a ghin ah mawng cu Khanpughi ah nam shumphyuk gui ah Mumcha awn
mi hmat ci.