JOHAN
AH CAGUK ATUMAT NAK
The First Letter of John
Johan ah Caguk Atumat Nak ung ang bü nak hnih om ci; (1) Khanpughi la Ahtapa Bawi Jesuh Khrit ung pui m'ca nak awn ami ghin vai ah thagui a peit nak gui, (2) Cun ah pui m'ca nak didap sak khai ah thuvi ciah m'theithang nak gui cu kä ami dou vai ah akhän tam nak gui. Cun ah thuvi ciah m'theithang nak ah ang zung cu;shetkat nak phung cu khomdek pumsa ung kaa gawk lawk ciah kia sei, Khanpughi ah Htapa Bawi Jesuh cu hnicim chang ah käng tüi hlawt khai. Cun ah m'theithang ci gui naw, hun nak ci cu khomdek khan ghin nak ung kaa phiawn nak ah kiak ci, ci u ne, hun nak ci cu om ih nak la chang paw m'hni zum nak awn kä ng'gui ng'phaa ci, ci ne phi m'theithang ci gui.
Cun ah m'theithang nak gui cu ak küm nak ah ca guk ciah chang naw, Bawi Jesuh Khrit cu hnicim chang akcang ah kiak ci, Bawi Jesuh zum ne Khanpughi m'hni ciah chang gui phung cu, ami mät gui phi ami ng'hni tu vai, ci ne akdei ngdang, ak küikyäng ah a guk then ah kiak ci.
1
Ghin Nak ah Thu
1 Ghin nak ah Thu ah mawng ca kami ning guk lawk ci, cun ah Thu cu ak htük ge ung om ciah kiak ci. Cun ah Thu cu mi ng'zak ci, mi mik awn mi hmuk ci, mi kut awn mi tawn ci. Ref 1:1 Jn 1:1
2 Cun ah ghin nak mik awn hmuh vai ah a om zah ung mi hmuk ci, ani ah mawng phi mi pyein sak ci. Pa Khanpughi awn atäng ah om ciah ang täi ghin nak cu keimi ah khan ah dang sei, a cun ah mawng cu kami pyein ci. Ref 1:2 Jn 1:14
3 Keimi naw kami hmuh la kami ng'zak cu nangmi am kami ning shäu gui ci. Cun ah kia sei keimi cu Pa Khanpughi la Ahtapa Bawi Jesuh Khrit awn kami pui m'ca ah mäih ah nangmi cu kei mi awn atäng ah nami pui m'ca tuk khai nei.
4 Keimi naw zeikiai nak kümbe sei kami gah nak vai ah shin ah ca kami guk law nei.
Khanpughi Cu Akdei
5 Tuhbäi keimi naw Ahtapa ung hmu ng'za ne kami shäu ba ah thu cu, “Khanpughi cu akdei ah kiak ci, ani ung hmüp nak api phi kä om ci,” ciah kiak ci.
6 Bawipa awn kami pui m'ca ci nei, ci netah hmüp khui ung mi om ah a kiak ung, mi om ih la mi thu m'gawng van awn mi hleeihlak ciah kiak khai.
7 Cun ung phi ani cu akdei ung a om ah mäih ah, mik mi cu ak dei ung mi om ah a kiak ung, mik mi cu tumat la tumat pui m'ca nak om ci. Khanpughi ah Htapa Bawi Jesuh naw asi ng'hlui awn mi kat nak nüng cu m'si ne ana theing sak gui pyi ah kiak ci.
8 Kei ung shetkat nak kä om ci mi ci ah kiak ung, mi mät naw mi mät mi m'hleei ciah kiak ci, mik mi ung düng nak la cang nak cu kä om ci.
9 Khanpughi cu a shaitaak küm sak ne, düng nak bäng bik ci, mik mi cu mi kat nak ng'kiaa ne, mi ng'paa ah akiak ung, mi kat nak nam gein gui ne, mi cheishoh nak nüng phi theingcim sak ci.
10 Kei shetkat nak kä ka bik ci, mi ciah a kiak ung, Khanpughi cu hleeihlak thei ciah mi pian ah kiak ci, mik mi ung ani ah thu cu kä om ciah kiak ci.