5
1 Taigü Tung nak ci cu cheishoh nak ah hmawk ah phiawn nak vai la küikyan nak vai, chang van ah hmawk ah phyuhteh ne
Khanpughi ah khuut bik khai ah ghü ne ami m'düih ah kiak ci.
2 Ani amät cu kä a kümbe nak da ci kia sei, lam hma ciah chang, cheishoh ciah chang gui cu chimgein gui ci.
3 Amät cu kä kümbe ciah kia ne, chang ah phäh bäng ah kä kiak ci, amät ah phäh ah phi küikyan nak vai ah phyutheh ciah kiak
ci.
Ref 5:3 Liv 9:7
4 A u naw phi amät naw amät cu taigü tung ah käm düih hning ci.Khanpughi naw Aaroî khü ne am düih ah mäih ah, Khanpughi naw
khü ne am düih cun vah Taigü tung ah kia hning ci.
Ref 5:4 Ex 28:1
5 A cun ah mäih ah Bawi Khrit naw amät naw amät cu Taigü Tung ah käm düih ci. Khanpughi naw Bawi Khrit-am;
“Nang cu Ka Htapa ah na kiak ci,
Tuhngawi kei cu nang ah Pa ah ka kiak ci”.cik ci.
Ref 5:5 Psa 2:7
6 Cun kawn ah mä a hei ung,
“Nang cu Melchizedek ah hnün ung ngoh ciah
Ang täi ah Taigü ah na kiak khai,” ci ne pyein ba ci.
Ref 5:6 Psa 110:4
7 Bawipa Jesuh cu khomdek khan ung a om zah ung, sih nak ung hun ciah Khanpughi ah ma ah ng'hui ne kyap ne taigü ci. Neim nak la ng'ap
nak awn ak taigü cu Khanpguhi naw phi ngaih pek ci.
Ref 5:7 Mat 26:36-46; Mak 14:32-42; Luk 22:39-46
8 Ani cu Khanpughi ah Htapa ah a kiak tupang ung phi, Khanpughi ah thu a läk thei vai ah zaica ne theithang ci.
9 Bawipa cu kümbe nak a gah kawn ah, ang thu ngai ciah chang gui-am, ang täi hun nak pe gui ciah ang zung ah kia lawk ci.
10 Khanpughi naw Bawipa cu Melchizedek ah hnün ung ngok ciah Taigü tung ah ming sak ci.
Lam Kä Hma Vai ah Khän ne Am Cäi Nak Gui
11 Shin ah a mawng ung ning m'thein gui vai akda om ci, cun ung phi nangmi cu kä nami cüivai ngai ci kia sei, pyeinsak cu kä zäi
ci.
12 Nangmi cu nami m'theithang thei khai ah a khin ah kia law pyi ci, cun ung phi nangmi cu Khanpughi ah thu ak tün nak ung tün ne, chang
naw a ning theithang gui vai hlü ba laih laih ci nei. Nangmi cu buh
nami ei vai khin law sei phi suuktui laih laih nami awk ci nei.
13 Suuk awk ci cu hta züt nau sen akni akshe kä hmuhmat phak ciah kiak ci.
Ref 5:12-13 1Kor 3:2
14 Guh ciah buh ei ci cu ang vai pyi ah kiak ci, khrihta ak ni ak she bui aut ne m'khoi chaa thei pyi ciah kiak ci.