3
Bawi Jesuh Cu Mose ah Kuikyang Pi Ci
1 Khanpughi naw a khü gui ah khrihta phäunau gui aw, ngai shüm vä! Bawipa Jesuh Mi zum nak ung Taigü Tung ah kiak khai ah
Khanpughi naw a tüih law ah kiak ci nei.
2 Mose cu Khanpughi ah im ung a bi lawh nak ung abekhüt ah mäih ah, Bawipa cun phi shin ah bi bik khai ah ghü ne m'düih ciah
Khanpughi ah ma ah bekhüt ci.
Ref 3:2 Num 12:7
3 Im co ciah chang tumat cu a im cawh ah mä däm pi khai ah m'tamkhah nak gah khin ci nei.
4 Im phung phung cu chang naw co ci cun ung phi apäng avan cu Khanpughi naw co ci.
5 Mose cu Khanpughi ah im kyong ah ak changshäm ah kia ne bekhüt ne om ne, ma lam ah Khanpughi ah thu law vai gui cu, ana pyein
law ma ci.
6 Bawi Khrit läi cu Khanpughi ah im uk ciah Ahtapa ah kia ne, bekhüt ne om ci. Mik mi cu küighaat ne, mi ngaih u nak ah khan
ah m'lung üp nak a om ah a kiak ung, Khanpughi ah im ah mi kiak ci.
Khanpughi ah Chang Gui ah Düm Nak
7 Cun ah kia sei Mumcha Theing naw a pyein cu,
“Khanpughi ah k'aw Nangmi naw tuhngawi nami ng'zak ah a kiak ung
kä nami ling keng vai,
8 Nami pupa gui cu Khanpughi ng'küükneet püi u ne,
pui kiang ma ah phawtcam ci gui,
ngahmi ah mäih ah kä nami lingkeng vai.
9 Nami pupa gui cu kum phli-kip ah kiong ung kei naw ka bi cu
hmu lang u ne, na phawtcam ci gui,
10 Cun ah kia sei, kei cu ngahmi ah khan ah m'lung she netah,
‘Ngahmi cu ang täi sei pyai ba ci gui,\q2
Ka thukhän phi kä läk hlük ci gui, ci ne pyein ci’.
11 Kei cu m'lung she netah,
‘ami ng'düm nak vai ah kei naw ka peit gui ah
kholei ung, ngahmi cu a ngawi ah phi
kä lut tuk khai gui,’ ci ne shaita ne ka k'phyun gui ci,”
ciah kiak ci.
Ref 3:7-11 Psa 95:7-11(LXX)
12 Zum ciah ka phäi nau gui, ghing ciah Khanpughi nawng nak vai u"-awng ah am lung kiong shekhak ciah chang, nangmi ung kä om en
khai ah nami geing nak vai nei.
13 Nangmi cu cheishoh nak ung kä thuvi ne kä nami lingkheng-en vai ah, cacim theing naw “tuhngawi” ciah thu anam thein nak gui - a
om ah chuih, ak hnüüp tä sei tumat la tumat anmi hteinghtang
tu vai nei.
14 Mik mi cu ak htük ah mäih ah a khüt nak ung khüt sei, khäng ciah ngaihgep a om ah a kiak ung Bawi Khrit awn bilo ghawm ciah
chang ah mi kiak ci.
15 Cacim Theing naw,
“Nangmi cu tuhngawi Khanpughi ah k'aw nami ng'zak ah a kiak ung
kä nami lingkeng vai, nami pupa gui naw khanpughi ami
küükneet püi zah ung ami om ah mäih ah kä nami om vai,”
ci ne pyein ci.
Ref 3:15 Psa 95:7-8(LXX)
16 Khanpughi ah k'aw cu ng'za lang ne, ng'küükneet püi ciah chang gui cu a u gui ang? Cun gui cu Egip kho ah kaa Mose naw ang khah
law püi ba gui ah chang gui nei.
17 Khokum phli-kip ung Khanpughi naw am lung she nak gui cu a u gui ang? Cheishoh nak bi ne pui kiang ma ah kiu ne sik ci gui ah kiak
ci nei.
18 Khanpughi naw shaita ne ak phyun nak gui ung, “Häi ne düm nak vai ah kei naw ka peit gui ah kholei ung, ngahmi cu a ngawi ah phi
kä lut tuk khai gui,” a ci nak gui cu a u gui ang? A ni
ng'küükneet püi ciah chang gui a pyein ah kä kia ne ang?
Ref 3:16-18 Num 14:1-35
19 Ngahmi cu cun ah kholei ung kä lut tu hlawt khai gui ah mi hmu gui pyi ci, a i ah kia sei ci ung ngahmi cu kä zum tuk ci gui ah
kiak ci.