HEBRU
CHANG GUI AM CAGUK
The Letter to The Hebrews
Hebru Chang Gui am Caguk cu, shedam nak da law aih sei khrihta zum nak chah law hlük ci gui ah, khrihtabum am guk ah ca ah kiak ci. Ca guk ci naw Bawipa Jesuh Khrit cu ng'düng nak la ak hnubäih ah Khanpughi ah thuphlan dang sak ciah a kiak ah mawng ami zum nak Thagui k'be gui ci. A cun ah mawng ung düng nak mawng thum cu m'tung ne guk ci; (1) Bawipa Jesuh cu khüighaat ne geinvai nak a awt nak awn Pa ah thu akcang ah läk ciah ang täi ghing ciah Khanpughi ah Ahtapa ah a kiak ah mawng;Khanpughi ah Htapa ah a kiak nak awn, khanchang gui, Moses la Thukhän Phyim ung profet gui ah a hlüngtai pi ah mawng; (2) Bawipa Jesuh cu, Thukhän Phyim ung taigü gui nüng ah hlüngtai pi ciah, ang täi ghing ciah taigü ah a kiak ah mawng; (3) Bawipa Jesuh zum ciah chang cu, shetkat nak, kyihkyawk nak, sih nak ung a phiawn ah mawng;Hebru zum nak ung khawihnah nak ah thungzo gui la ghutha nak gui cu, hun vai a hlü ah mawng m'dang nak düt ah kiak ci, cun ung phi Bawipa Jesuh cu hun nak akcang pek ciah Taigü Tung ah a kiak ah mawng, gui ah kiak ci.
Israel khuishon ung mingthang sei zum ciah chang gui awn m'tumtäng ne (akdäm 11), ca guk ci naw, ca khei ci gui ami zum nak a htek vai la, akdäm 12 ung Bawipa Jesuh kheing ne teng ne akhnu bäih ung khüt sei ami bekhüt vai la ami bui awt law vai ah geinvai nak la dukdeiu nak cu, khüighaat ne ami näng vai ah, k'thamah nak pe gui ci. Cun awn ah m'cäi nak la khäntam nak awn khüm ci.
1
Ahtapa ung am shäk law ah Khanpughi ah Thu
1 Caä Phanpughi naw, akda vei, amawng a hei hei awn, profet gui ung, mi pupa gui am thu m'shäk law man ci.
2 Cun ung phi shin ah ak hnubäih hnüüp gui ung läi Ahtapa ung thu m'shäk lawk ci nei. Ahtapa awn khopuui cu tüisho ne, kho ah kaa avan cu khäm khai ah Khanpughi naw Ahtapa cu ghü ne m'düih ci.
3 Ahtapa cu Khanpughi ah bämang nak awn pyü ne ng'shü ci, ani cu Khanpughi ah müi akcang aè a kia nak ah hlüngtai ciah ang thu awn, khopuui avan cu khän sak ci. Hnicim chang ah shekat nak gui avan m'gein ne ak phiawn gui kawn ah, khan mawpi ah ahlüngtai säih ah Khanpughi ah k'pat lam ah ngok ci nei.
Khanpughi ah Htapa ah Küikyang Nak
4 Ahtapa cu khanchang gui ah küikyang pi khai ah tüi m'hnüt ne, aming cun phi küikyang pi khai ah Khanpughi naw pek ci.
5 Khanpughi naw a u khanchang am phi,
“Nang cu ka ning Htapa nei;
tuhngawi kei cu nang ah Pa ah
ka kia lawk ci,”ci ne kä pyein man ci. A i khanchang ah mawng ung phi Khanpughi naw,
“Kei cu ani ah Pa ah ka kiak khai,
ani cu kei ah Htapa ah kiak khai,” ci ne kä pyein man ci. Ref 1:5 a Psa 2:7; b 2Sam 7:14; 1Ch 17:13
6 Cun ung phi Khanpughi naw ng'tüi htük ciah Ahtapa cu m'dekhan ah a tüih law vai ung,
“Khanpughi ah khanchang avan naw,
Ani cu ami khawihnah vai nei”, ci ne pyein ci. Ref 1:6 Deu 32:43(LXX)
7 Cun ung phi khanchang gui ah mawng a pyein nak ung,
“Khanpughi naw ak khanchang gui cu, khokhi ah piang gui ne,
ak changshäm gui cu meidäi ah piang gui ci,” ci ne pyein ci. Ref 1:7 Psa 104:4(LXX)
8 Cun ung phi Ahtapa ah mawng a pyein nak läi ung Khanpughi naw,
“O Khanpughi, na uk nak ah kho cu,
ang täi sei khäng khai nei!
Nang naw na chang gui cu ng'müi khai ah
Na uk gui ci nei.
9 Nang naw akcang cu m'hni ne,
cheishoh ci cu na thüi nak ci nei.
Cun ah kia sei Khanpughi, na Khanpughi naw,
nang cu ning ghü ne,
Na paw gui ah tah küikyang pi khai ah,
ning m'tamkhah ne, zeikiai nak cu ning pek ci”, cik ci. Ref 1:8-9 Psa 45:6-7
10 Cun kawn ah Khanpughi naw,
“Nang Bawipa naw ak htük bäih ah
Khomdek cu na tüisho ci,
Khan mawpi phi na mät ah kut awn
na piang ci.
11 Cun gui cu ng'kawn zawp khai gui,
Cun ung phi nang cu na om lä khai;
Ngahmi cu suisak ah mäih ah kheei lawk khai gui.
12 Nang naw zihphak cho ah mäih ah
ngahmi cu na cho gui khai,
Ngahmi cu suisak ah mäih ah ng'lat zawp khai gui.
Cun ung phi nang cu kä na khukhlat ci,
Na ghin nak cu kä ng'pyi hlawt ci nei”. Ref 1:10-12 Psa 102:25-27(LXX)
13 Khanpughi naw, a u khanchang am phi,
“Na gaa gui avan na kho kaa ah,
Kä ka gawk sak gui zawp pha ah chuih,
Ka k'pat lam ah na ngoh vai nei,” ci ne kä kiak na man ci. Ref 1:13 Psa 110:1
14 Cun ung khanchang gui cu, a i gui ang? Ngahmi cu hun nak gah ciah chang gui m'hteihtang gui khai ah Khanpughi naw a tüih gui ah, Khanpughi ah khuut bik ciah mumcha gui ah kiak ci.