THESSALONIAN
CHANG GUI-AM PAUL AH CAGUK ATUMATNAK
Paul's First Letter to The Thessalonians
Thessalonika cu Roman khopäng, Macedonia kho ah mang gaw ah kiak ci. Paul cu Philippi ung kaa ang hlah law ba kawn ah cun ah gawnu ung Krithabum cu k'süm ci. Thessalonika ung Judaisim zum nak cu zum tu hlük ciah, Jew chang ah kä kiak ciah, chang gui ah ma ah Paul naw Bawi Khrit ah mawng thu a pyein cu näng nak om khtäh Jew chang gui naw m'thüi m'khang u neh kä shou pha sei ng'küknet püi ci gui. Cun ah kia sei Paul cu Theesalinoka ung kaa naw k'täm u sei Berea ah hteit ci. Cun kawn ah Korin gawnu ah a law ba ung ani awn ng'khap ne khuut bi ci goi ah Timothi cu gawk law ne Thessalonika Khrithabum ah amawng cu Paul am m'thein law ba ci.
Thessalonika chang gui-am Paul ah caguk atumatnak cu Thesalonia khrithabum-am k'thagui a peit nak gui la am düng nak gui ah kiak ci. Ngami ah zum nak la m'hni nak ah mawng ang zak ah hmawk ah zeikiai ne; ngami awn atäng ah amät a om zah ung a i cha a om ih ah mawng phi shüm ba sak gui ci. Cun kawn ah “Khritha tumat cu Bawi Khrit kä ah kyum law ba pha ung a sih ah a kiak ung, a kyum law ba ung a peit vai ah ang täi ghin nak cu gah tuk khai ang? A i zah ung Bawi Khrit cu kyum law ba khai ang?,” ciah ami ng'shi nak gui cu m'hlan ne pyein ci. Khrihta gui cu Bawi Khrit akyum law ba vai ngaih u ne ami ngäng zah ung, ami mät ah bilawh vai gui cu, ak ding gei ah ami bilawh vai ah mawng cu m'theithang gui ci.
1
1 Paul, Silas la Timothi ni naw--- Pa Khanpughi la Bawipa Jesuh Khrit ah chang gui ah kiak ciah, Thessalonika Khrithabum-am ca kami pe lawk ci nei.
M'geinsei nak la dimdeeih nak cu nangmi ah khan ah om sä.
Thessalonika Chang gui ah Ghin nak la Zum nak
2 Nangmi nami van ah hmawk ah ang täi sei Khanpughi kami m'hlüngtai ci, nangmi ah hmawk ah ang täi sei kami taigü ci.
3 Mi Pa Khanpughi ah ma ah nami zum nak cu akcang ah dang khai ah, a i hlawk ah nami om ih ah mawng, nami m'hni nak naw a i hlawk ah a ning khüghat sak gui ah mawng la Bawipa Jesuh Khrit ung nami ngaih u nak a i hlawk ah a khänhtek ah mawng cu kami shüm hmat ci nei.
4 Phäi nau gui aw, Khanpughi naw nangmi cu ning m'hni gui ne, ak chang ah a ning ghü gui cu keimi naw kami hmat ci nei.
5 Keimi naw ng'Thu Ni ka mi ning thak law gui cu, thu m'gawng bäng awn ah kä kiak ci, hlüngtai nak, Mumcha Theing la düng nak kümbe ciah zum nak awn ah kiak ci. Keimi cu nangmi awn atäng ah kami om zah ung a i ah kami om cu nami hmat ci;cun cu nang mi ah ni kiom nak vai ah kiak ci.
6 Nangmi naw keimi la Bawipa cu nami na ng'thei nak gui ci;nangmi cu zaica geinvai ne nami kia pang ung phi, Mumcha Theing awn lawk ciah Thu Ni cu zeikiai ne nami gah ci.
7 Cun ah kia sei nangmi cu Macedonia la Achaia ung zum ciah chang van naw aning thei nak gui vai ah nami kiak ci.
8 Bawipa ah mawng Thu Ni nangmi ung dang ci cu Macedonia la Achaia kho avan ung gawk ci, cun bäng ah kä kiak ciah Khanpughi ung nangmi ah zum nak cun phi kho nüng ah gawk ci. Cun ah kia sei keimi naw a i kami pyein vai kä om ci.
9 Keimi kami law ah mawng la a i cha nami na dou gui ah mawng, düng ne ghing ciah Khanpughi ah a khuut bi vai la khankho ah ka kyum law ba khai ah Ahtapa ngäng vai ah hmawk ah agup gui nawng shüt ne Khanpughi ah nami ng'hlah law ba ah mawng gui cu, cun ah chang gui naw pyein sak ci gui nei.
10 Cun ah Ahtapa Jesuh cu Khanpughi naw sih nak ung kaa thawh ba sak sei, gawk law ge ciah Khanpughi ah m'lungseh nak ung kaa nak phiawn gui ciah Bawipa ah kiak ci nei.