KALATIAN
CHANG GUI AM PAUL AH CAGUK
Paul's Letter to The Galatians
Jew chang gui ah kä kyak ci gui naw, Bawi Jesuh ah mawng ng'thu ni cu ngai ng'za ne dou law tu u khätah, khrihta akcang ah kyak nak vai ah Mose ah thukhän läk vai cu kä hlü khai ang? hlü khai ang? ci ah ng'shi nak om lawk ci. Paul naw cun läk vai kä hlü ci, khrihta ah kyak vai ah Bawi Khrit zum vai bäng hlü ci,a cun awn vah chang gui naw Khanpughi ah ma ah ng'düng nak gah ci gui, ci ne pyein ci. Cun ung phi Asia Minor, Roman kho päng, Kalatia kho, Khrihtabum gui ung, Paul hnu ng'tuk püi ciah chang gui naw, Khrihta gui cu Khanpughi ung ng'düng nak gah vai ah, Mose ah ng'thukhän cun phi läk vai hlü ciah pyein ci gui.
Kalatia Chang Gui-am Paul ah Caguk cu cheishoh ciah m'theithang nak gui avan, ng'düng ciah zum la bilawh nak ah a gawk ba vai ah Paul naw a guk ah kyak ci. Ak htük ah Paul naw, amät cu, Jesuh Khrit ah ang düihpüi ah akyak ah mawng m'dang ne guk ci. Ani ang düihpüi ah akyak nak cu, chang ah huham awn ah kä kyak ci, Khanpughi ah huham awn ah kyak ci, ani ah khuut bi nak cu Jew chang ah kä kyak ci gui ah ng'lung ah kyak ci. Cun kawn ah zum nak bäng awn vah chang gui cu, Khanpughi ung ng'düng nak ami gah ah mawng cu m'tai pi ne guk ci. A khüm nak lam ah khrihta gui naw ami bilawh om ih nak awn, Bawi Khrit zum nak ung phung ciah m'hni nak cu ami dang sak vai ah guk ci.
1
1 Chang ung kaa lawk ci la chang ah m'düih ah kä kyak ciah, Jezuh Khrit la ani sih nak ung kaa thawh ba sak ciah Apa Khanpughi ah m'düih, ang düihpüi kei Paul La;
2 shi ah kei awn kami om ghawm ciah phäi nau gui naw, Kalatia kho ah khrihtabum gui-am ca kami pe lawk ci nei:
3 Mi Pa Khanpughi la Bawipa Jezuh Khrit ah m'gein nak la dim deeih nak cu na mi khan ah om sä.
4 Mi Pa Khanpughi ah ang zak hlü ah Bawi Khrit cu shin ah shetkat nak ah khin ung na k'phiawn gui khai ah, mi kat nak ah hmawk ah ng'ap pyi ci nei.
5 Khanpughi ah bämang nak cu ang täi sei deikhang sä! Amen.
Tumat Bäng ah Ng'Thu Ni
6 Bawi Khrit ah m'gein nak awn nang mi ning khü gui ciah Khanpughi cu, ang ghit ah nawng u ne, ng'Thu Ni a hei nami dou ah hmawk ah ka ning cäi nah gui ci nei.
7 Akcang ah pyein ung Bawi Khrit ah mawng “Thu Ni ahei,” kä om ci, cun ung phi chang am shah gui naw, Bawi Khrit ah ng'Thu Ni cu m'hlat shüi shüi u ne, ning awng-aa sak gui ci gui.
8 Cun ung phi kei naw ka pyein ah ng'Thu Ni awn kä täng ciah ng'thu pyein ci cu, keimi phi bäi, khanchang phi bäi, m'hteikhaw ah hteh nak güt ah m'kat nak cu gah khai nei.
9 Keimi naw leng ba ne kami pyein ba mä cu; nangmi naw nami dou ah ng'Thu Ni awn kä täng ciah, ng'Thu Ni pyein ciah chang cu, m'hteikho ah hteh nak güt ah m'kat nak gah sä!
10 Cun ah ka pyein cu chang naw a na k'bääi vai ah ka pyein ah kya ne ang? Cun ah kä kyak ci, Kei ah ng'zak hlü cu Khanpughi ah nak bääi vai bäng ah kyak ci. Kei cu chang ah na chang m'sui vai ah ka k'tha nak ciah kya ne ang? Cun ah ka k'tha nak ciah a kyak ung kei cu Bawi Khrit ah chang shäm ah kä ka kyak khai.
Paul cu Ang Düihpüi ah a Kyak Law ah Mawng
11 Ka ning m'thein gui khai phäi nau gui aw, kei ka pyein ah ng'Thu Ni cu chang ung kaa lawk ciah kä kyak ci.
12 Kei naw chang tumatmat ung kaa ka gah ah kä kyak ci, chang tumatmat naw a nam theingthang ah phi kä kyak ci. Bawipa JesuhKhrit amät naw khän ne a nam dang ah kyak ci.
13 Kei naw Jew gui ah zum nak ung ka om zah ung a i ah ka bilawh man cu ka ning m'thein gui pyi ah kyak ci. Kei naw Khanpughi zum ci gui cu ak she ah k'dudeiu na gui ne, khrihtabum cu m'di vai ah ka k'tha na pi k'bäih ci.Ref 1:13. Lamktu 8:3; 22:4-5; 26:9-11
14 Kei cu Jew gui ah zum nak akcang ah bi nak ung, kami thawn lawk ciah Jew chang gui ung, pupa gui ah thung law zoman cu k'tha na pi k'bäih ne ka läk ciah kyak ci.Ref 1:14. Lamktu 22:3
15 Cun ung phi kei kä ka ng'tüi pha ge ung Khanpughi naw am gein nak awn na ghü ne, a khuut bi vai ah ana khü ah kyak ci.Ref 1:15. Lamktu 9:3-6
16 Cun kawn ah chang pakhui hei gui-am Ahtapa ah mawng Thu Ni cu kam thein gui khai, kei-am Ahtapa cu ana hmu sak ah kyak ci. Cun ah kyasei nam shüm thein tuk khai ah a u phi kä ka ng'shi man ci:Ref 1:15-16. Lamktu 9:3-6; 22:6-10; 26:13-18
17 Ang düihpüi ah kya law ma ci gui, ka ng'shi gui khai ah Jerusalem ah phi kä ka hteit man ci. Ak htük bäih ah Arabia kho ah hteit netah Damaskas ah ka law ba ci.
18 Khokum thum a lüng kawn ah kei cu Peter ka hmuk khai ah Jerusalem ah hteit ne, ani awn atäng ah hnüüp gha lei-hma ka om tuk ci. Ref 1:18. Lamktu 9:26-30
19 Cun ung phi kei naw Bawipa ah nau James ah kawn ah ang düihpüi a hei» á u phi kä ka hmuk ci.
20 Shin ah ka guk cu ng'düng ci, kä ka hleei ciah a kyak ah mawng cu Khanpughi naw hmat ci!
21 Cun kawn ah kei cu Siria la Cilicia kho ah ka hteit ci.
22 Cun zah ung Judea kho ah khrihtabum gui naw kei cu kä na hmat phak ci gui.
23 Ngahmi naw chang hei gui ah pyein ami ng'zak cu, “Mik mi na k'dudeiu na gui man ciah chang naw, zan ä am di vai ah ak tha nak man ah zum nak ah mawng cu, shäu ne pyein ci nei,” ciah kyak ci.
24 Cun ah kyasei ngahmi naw kei ah mawng ung Khanpughi cu m'hlüngtai ci gui.