4
Pumsa ah Kawngät Nak
1 Cun ah kia sei Bawipa ah khuut ka bi hmawk ah thawng ka kyum ciah kei naw ka ning m'tholet gui ci nei. Nangmi cu Khanpughi naw
khü ne a ning m'düih nak gui awn ng'müi khai ah, hnu
m'khin, ma m'hlawi ne nami ghin vai nei.
2 Ang täi sei nami m'lung neim sak ne, ng'awi ng'gi ne, hnimgei ne nami om vai nei. Tumat la tumat Lung gei, ngaih ni nak awn, nami
m'hni cu dang sak vä.Ref 4:2 Kolo 3:12-13
3 Kawngät nak om khai ah ak ni pi ah nami hnün thawh vai nei, cun cu dimdeeih nak ung nami lukyum khai ah, Mumcha naw a ning pek
gui ah kiak ci.
4 Khanpughi naw a ning khü nak gui awn, ngaih u nak tumat bäng a om ah mäih ah pumsa tumat Mumcha tumat bäng om ci.
5 Bawipa tumat, zumnak tumat, tui hnim nak tumat;
6 Hnicim chang avan ah Pa, Khanpughi tumat bäng om ci, Ani cu ang tü a van ah Bawipa, van ung bi bi ne, van ung om ci.
7 Bawi Khrit naw a nam shumphyuk gui ah mäih ah, mik mi tumat ci cu küikyang ciah m'cümhnah nak mi gah ci.
8 Cacim theing ung lawk ci cu;
“Bawipa cu ahlüng nakpi ah hang kai ne,
Thawng kyum chang khli cu kai püi gui ci;
Hnicim chang van am m'cümhnah
nak, pek ci”.
Ref 4:8 Psa 68:18
9 Tuhbäi, “hang kai ci,” ci cu, a i a pyein hlü ang? Bawipa cu ang neim nak pi bäih ah khomdek ung kyum law ma ci, ciah kiak ci.
10 Kyum lawk ciah Bawipa cu, a hlüngtai huham awn khopuui be sak khai ah mawpi khankho ah hang kai ba ciah Bawipa ah kiak ci.
11 Hnicim chang am m'c"mhnah nak m'shumphyuk gui ci cun phi, acun ah Bawipa ah kiak ci. Ani naw am shah cu ang düihpüi gui ah, am
shah cu profet gui ah, am shah cu thu shäõ ci gui ah, am shah cu
pastor gui ah, am shah cu saza gui ah, m'düih gui ci.
12 Cun ah abi cu Bawi Khrit ah pumsa cawh kyan vai ah, Khanpughi ah chang khli naw, krihta khuut bi vai ah, pawng m'hteim ge vai hmawk ah
kaik ci.
13 Cun ah kia sei Khanpughi ah Htapa mi hmuhmat nak ung, mi zum nak tumat ah a kiak nak awn, mi van cu atäng ah mi kyumsawm khai
nei. Mik mi cu Bawi Khrit ah küm ciah khüt nak ah mäih ah, ang
htei ah a hlüng nak ah, cüivai lulaang ciah mi kia lawk khai
nei.
14 Mik mi cu ak hmawhta ah kä mi kia ba ci, cun ah kia sei, ami mät ah m'lung hnga tüidawng düt awn, chang gui lam hma khai ah
lam shüm ne thuvi theileh ci gui ah, m'theithang nak khokhni naw
kä ning zon shüi shüi en gui sä.
15 Mik mi cu m'hni nak ah m'lung htek ung, thu thuuk mi pyein nak awn, chunglu ah kiak ciah Bawi Khrit ung ng'phaa vai ah, amawng
alam avan ung mi hlüngtai tuk khai nei.
16 Bawipa ah kut shum nak ah kaa ung a phäh phäh ah om ci gui ah pumsa ung ming bäng bäng ci gui cu a mi van kyumsawm
zawp ci gui, pumsa tumat ung ng'gui ng'phaa zawp ci gui. Cun ah
kia sei pumsa ung ming phäh phäh ci gui naw ami mät ah bi phäh
phäh ami bi law ung, pumsa avan cu, m'hni nak awn
däm ng'ghaw sak ci gui.
Ref 4:16 Kolo 2:19
Bawi Khrit Ung Ghin Nak Thai
17 Cun ah kia sei nang mi cu kä zum ci gui ah mäih ah, kä nami om ih ngaih tüh ba lä vai ah Bawipa ming ung ka ning khän gui ci
nei.
18 Kä zum ci gui ah m'lung ngaih cu hnüp khui ah kiak ci. Ngahmi cu lulang nak maih ne cüivai nak kä om sei, ami m'lung ling ne,
Khanpughi ah peit ah ghin nak awn api ah phi käng phaa ci.
19 Ngahmi cu lü ng'aa nak api phi kä om ba sei, ami m'hni hni ah m'gu plet sheka u ne, shungshet nak kä om sei, shemshai ci gui.
20 Nangmi naw nami ng'theithang ah Bawi Khrit ah mawng cu cun ah kä kiak ci nei.
21 Bawipa ah mawng cu akcang ah nami ng'za pyi ci nei. A hnu läk ciah ak chang gui nangmi naw Bawi Jesuh ung Thu thuuk ah mawng cu
nami theithang pyi ci nei.
22 Cun ah kia sei ghin cu om düt ah ghin nak man, ak phyim cu lim ne nawng shüt vä. Mät ah ng'zak hlü hlimtui nak awn didap
thei ciah, ghin nak phyim cu hnu nah vä.
Ref 4:22 Kolo 3:9
23 Nami m'lung la nami ngaih avan cu ak thai ah nami ng'pian sak vainei.
24 Nangmi cu chang thai ah nami kiak vai nei, cun cu Khanpughi naw a müi ah a tüisho la ghin nak akcang ah ang dang sak ah düngdau
ci la theingcim ciah kiak ci nei.
Ref 4:24 a Kolo 3:10; b Gen 1:26
25 Cun ah kia sei kä nami hleeihlak-en ba vai, mik mi cu Bawi Khrit ah pumsa ung atäng ah mi lukyum zawp ci kia sei, zum ciah chang
gui tumat la tumat düng ciah thu bäng nami pyein vai nei.
Ref 4:25 Zec 8:16
26 Nami m'lung a shet law ah a kiak ung phi, nami m'lung she nak cu cheishoh nak ung kä gawk en sä, nami m'lung she nak cu hni naw
kä luh-en püi sä.
Ref 4:26 Psa 4:4 (LXX)
27 Khoshe-am akhin kä nami peit-en vai nei.
28 M'gu man ciah chang phi käm gu-en ba ne, khüighaat ne hnüntho ne, amät ah hnun m'ghin ne, pyamtham ci phi am hteihtang tu
hning vai ah tha na sä.
29 Thu she shaikaa api phi nami shai ung kä lut-en law sä, m'gein nak ah thu bäng lut law sä. Ng'awi gi nak, thamah nak la
m'shümthein nak ah thu bäng nami pyein vai nei, cun ung vah
ngai zak ci gui ah chang ah phäh ah ni kiom nak om khai.
30 Khanpughi ah Mumcha Theing cu kä nami m'thüi-en vai;a i ah kia sei ci ung Mumcha Theing cu Khanpughi naw nangmi a ning khäm gui
ah mawng m'hnüt nak ah kiak ci, ak hnu bäih ah Hnüüp ung
nangmi aning phiawn nak gui vai ah, a kyän ah phi kiak ci.
31 Thüisei nak, ngetngawng nak, m'lungshe nak gui cu nawng ge vä. Käng li ng'lai kä ng'plah ng'taang ba vä, käm thüikhang kä
ng'gen hteet ba vä.
32 Tumat la tumat hnip hnoi ne ng'awi gi tu vä, Khanpughi naw Bawi Khrit ung a ning m'geinsei gui ah mäih ah tumat la tumat
m'geinsei tu vä.Ref 4:32 Kolo 3:13