EPHESIAN
CHANG GUI AM PAUL AH CAGUK
Paul's Letter to The Ephesians
Ephesian Chang Gui-am Paul ah Caguk naw ak htük bäih ah kho ah kaa m'dek ah khan ung a tüi sho gui a van, Bawi Khrit ung lukyum zawp vai ah Khanpughi ah ng'bü nak cu ng'dang sak ci,(1:10). Hnicim chang avan Bawi Jesuh Khrit ung tumat ah kyak nak awn, kawng ät nak ah kyak ciah hlüngtai ciah Khanpughi ah ng'bü nak ung, ng'müi khai ah Khanpughi ah chang gui ami om ih vai ah ang cäi nak phi guk ci.
Ak tün nak lam ung ca guk ci naw, kawng ät nak vai ah mawng a pyein nak ung, Pa Khanpughi naw a i cha ah ak chang gui a ghü gui ah mawng, Ahtapa Jesuh Khrit awn a i cha, ah ami kat nak m'gein ne ak phiawn gui ah mawng, la Khanpughi ah hlüngtai ciah shaitaak cu Mumcha Theing naw a i cha ah ang dang sak ah mawng cu m'dang ne guk ci. Ak hnih nak cu, ca phat ci gui naw Bawi Khrit awn tumat ah ami kyak nak ah mawng, ami ghin nak akcang ah ami dang sak vai ah ng'cäi nak ah kyak ci.
Bawi Khrit ung kawng ät nak awn Khanpughi ah chang gui tumat ah ami kyak nak ah mawng cu m'tumtäng nak akda pe ne guk ci. Cun gui cu;Khrihtabum cu pumsa awn täng ci kyasei Bawi Khrit cu lu ah akyak ah mawng, Khrihtabum cu im awn täng ci kyasei Bawi Khrit cu m'kyungtung ah a kyak ah mawng, Khrihtabum cu chu awn täng ci kyasei Bawi Khrit cu Cei ah a kyak ah mawng, gui ah kyak ci. Shin ah ca ung Bawi Khrit ung Khanpughi ah m'gein nak, thuuk ne ang kau ah mawng cu, m'tam ne a guk ah kya ne küikyang aih ci. Bawi Khrit ah m'hni nak, ak ghing ah ang ap nak, am geinsei nak, ak chimgein nak, la a theingcim nak gui cu, vai ne dang khai ah a guk ah kyak ci.
1
1 Khanpughi ah ang zak hlü ah Bawi Jesuh Khrit ah ang düihpüi ah kyak ciah kei Paul naw, Ephesus gawnu ung Khanpughi ah chang gui, bekhüt ciah khrihta gui-am ca ning peit law gui nei.
2 Mipa Khanpughi la Bawipa Jesuh Khrit ah m'gein nak la dimdeeih nak cu nami khan ah om sä!
Bawi Khrit ung Gah ah Mumcha Phyuh theh Nak Gui.
3 Mi Bawip a Jesuh Khrit ah Pa Khanpughi cu mi m'kümto khai nei! Mik mi cu Bawi Khrit ung mi kawng ät nak awn, ani naw khankho ah mumcha zoushen nak cu nam shumphyuk gui ci.
4 Khanpughi naw khomdek kä a tüi pian pha ge ung, mik mi cu Bawi Khrit ung kawng ät nak awn, a ma ah shetkat nak kä om sei theingcim ciah mi kyak vai ah a na ghü gui pyi ah kyak ci.
5 Khanpughi naw mik mi cu, am'hni nak awn Bawi Khrit ung a hta gui ah mi kyak khai ah a na k'bäi gui pyi ah kyak ci. Cun cu Khanpughi ah ng'bü nak la ang zak hlü ah kyak ci.
6 Am hni pi ah Ahtapa awn anam cümhnah gui ah, Khanpughi ah bämang ciah am gein nak cu mi m'kümto khai nei!
7 Bawi Khrit naw ng'ap ne a sih nak awn mik mi cu mi k'phiawn pyi ci, cun cu küikyang ciah Khanpughé ah m'gein nak ah kyak ci. Ref 1:7 Kolo 1:14
8 Khanpughi naw mik mi am kä ng'vangca ne anam shumphyuk gui ah, am gein nak cu, küikyang aih ci nei.
9 Khanpughi naw acüivai nak la alulang nak awn, ang bü nak cu dang khai ah bi bik ci. Bawi Khrit ung akümbe sak ah thuuk ne ng'kau ciah amawng gui cu mik mi am na hmat sak gui ci.
10 Cun ah Khanpughi naw akümbe sak vaiah ang bü nak cu, akhin aküm law hnüüp ung khankho la khomdek ung a tüisho gui avan cu Bawi Khrit ah lam ma nak awn ang cut sak gui vai ah hmawk ah kyak ci.
11 Apäng avan cu Khanpughi naw am hnüt ak bäi ah mäih ah om kyak ci gui. Khanpughi naw cäu ä ge tün ne a mät ah k'bäi ah ng'bü nak awn, mik mi cu Bawi Khrit ung na kawng ät sak gui ne ak chang ah ana ghü gui hnga ah kyak ci.
12 Cun ah kyasei ak htük ung Bawi Khrit ging ne mi ngai ciah mik mi naw, Khanpughi ah bämang nak cu mi m'kümto khai nei!
13 Nangmi chang pakhui hei gui cun phi, hun nak ah mawng, Thu Ni ah kyak ciah, düng ciah Thu cu ngai ng'za tu u ne, Khanpughi ah chang ah nami kya lawk ci. Nangmi naw Bawi Khrit nami zum lawk ci, cun ah kyasei, Khanpughi naw a shaitaak ah mäih ah Mumcha Theing cu ning m'shumphyuk gui ne, amät ah chang ah ning tüi m'hnüt gui ci.
14 Cun ah Mumcha Theing cu Khanpughi naw ak chang gui-am apeit ah shaitaak cu mi gah vai ah ang kyän nak ah kyak ci. Cun ah kyasei Khanpughi naw, amät ah chang gui-am kümbe ciah phiawn nak, na pe gui ci, ci cu ngaih gep vai kyak ci. A bämang nak cu mi m'kümto khai nei!
Paul ah Taigü
15 Cun ah kyasei Bawi Jesuh nami zum ah manwg la Khanpughi ah chang gui nami m'hni ah mawng ng'za netah,
16 nangmi ah hmawk ah ang täi ah Khanpughi kam hlüngtai ci, ning shüm gui ne ka ning taigü pe gui ci.
17 Nangmi naw Khanpughi nami hmat nak vai ah cüivai nak la lulang nak ah kyak ciah Mumcha cu nami gah vai ah, mi Bawipa Jesuh ah Khanpughi, bämang ciah mi Pa ah ka ning zoih thäh pe gui ci.
18 Kei naw ani ah ak dei cu nami m'lung awn nami hmuh vai ah ka ning k'thäh pe gui ci, cun ah kyasei, a i nami ngaih u vai ah a ning khü gui ah mawng, ak chang gui-am a peit ah shaitaak cu a i hlawk ah cäicat vai ah abä nak ah mawng,
19 Ani zum ciah chang gui ung gawklawk ciah ahlüngtai nak cu a i hlawk ah küikyang ciah nami hmat vai ah kyak ci. Nangmi ung gawklawk ciah cun ah hlüngtai nak cu,
20 Bawi Khrit sih nak ung ka thawh ba sak ne khankho ah ak pat lam ung angoh sak zah ung a mang te ah kiak ci. Ref 1:20 Psa 110:1
21 Bawi Khrit naw cun ah kho ah khankho uk ci gui, huham mah gui, hlüngtai ci gui, la bawi gui cu uk gui ci. Ani ah ming cu tuhbäi la lawk khai ah khin ung huham ah ci gui phung ah küikyang pi ci.
22 Khanpughi naw ang nüng nüng cu Bawi Khrit ah khaw ka ah chah ne, khrihtabum ung phi avan ah chunglu Bawipa ah ngoh sak ci. Ref 1:22 Psa 8:6
23 Khrihtabum cu Bawi Khrit ah pumsa ah kia ci kia sei apäng avan cu amät ah kümbe nak awn kümbe sak ci. Ref 1:22-23 Kolo 1:18