2
1 Nangmi ah kei ka law ung nami m'lung kä nik khai kyasei, kä ka law ba khai ah ka k'bäi ci nei.
2 Nangmi nami m'lung kä nik khai ah ka bi ung, a u naw kei na zei sak khai ang? Kei ah hmawk ah am lung kä nik ci gui ah kawn ah
na zei nak ci a u kä om khai nei.
3 Nangmi naw kei cu nami na zei sak khai süte, cun ung phi, kei ka law ung nangmi ah hmawk ah kam lung a thüi vai kyi netah, ca ka
guk law te ah kyak ci nei. Kei ka zei ung nangmi nami van nami
zei khai ah ka zum ci nei.
4 Kei cu ang htei ah thüisei zaica ne, ng'phli tui awn cun ah ca cu ka guk nei: Cun cu nami thüi nak vai ah kä kyak ci Nangmi
naw a i hlawk ah ka ning m'hni gui nami hmat nak vai ah ka guk ah
kyak ci.
Kat Nak Bik Ci M'Gein Nak
5 Chang tumat naw kei a nam thüi ah a kyak ung, kei bäng ah kä kyak ci, nang mi nami van, kä cun ung am shah läi cu ning m'thüi
gui ciah kyak ci. (A cun ah chang ah khan ah kat nak kä k'bum
hlü ne cun ah ka pyein ah kyak ci).
6 Nang mi akda pi naw nami m'kat nak a gah ani naw a kyä vai ah m'kat nak ah kyak ci nei.
7 Tuh"bai nuipai sei kä a thüi aih vai ah, ani cu m'gein ne, thamah nak pe vä.
8 Kei naw ka ning m'cäi gui cu, akcang ah ani nami m'hni cu nami hmat sak vai nei.
9 Zanä kei naw ca ka ning guk law gui cu, tüihtok nak m'khüt vai ah nami ng'düih la, kei ah ning m'shümthein gui läk ghet vai
ah nami om ah, hmat nak vai ah kyak ci.
10 Nangmi naw chang tumat ah kat nak cu nami m'gein ung, kei naw phi ani cu kam gein ci. Chang tumat cu kei naw kam gein vai a hlü
law ung, nangmi ah hmawk teng ne Bawi Khrih ah ma ah kam gein ci
nei.
11 Cun ung vah Satan cu mik mi ah khan ah kä a näng vai ah mi shung hlawt khai; Satan ah theileh cu mik mi naw mi hmat ci.
Troas Ung Paul ah Cäi Ng'"A Nak
12 Bawi Khrih ah mawng Thu Ni shäu vai ah Troas ung ka gawk law zah ung, a cu ah a khuut bi vai ah Bawipa naw lam kawt na hmawn pe
sei ka hmuk ci.
13 Cun ung phi mi nau Titus cu kä hmu netah ang htei ah ka cäi ng'ä ci. Cun ah kyasei a cu ah chang gui cu zavaih gui netah
Macedonia kho ah ka hteit ci.Ref 2.12-13 Lamktu 20.1
Bawi Khrih ung Näng Nak
14 Cun ung phi Khanpughi kam hlüngtai ci! a i ah kyasei ci ung Khanpughi naw mik mi cu Bawi Khrih ung na kawng ät sak gui ne,
Bawi Khrih ah näng nak tung ak chang phaa ah khän ne a na
ng'leen püi gui ah hmawk ah kyak ci. Bawi Khrih ah mawng hmuh
hmat nak cu, tui ng'ui ah mäih ah kho ng'nü ung ang ui vai ah
Khanpughi naw na mang gui ci.
15 Mik mi cu Bawi Khrih naw Khanpughi a khawihnah nak ah ng'ui ah mäih ah, hun nak gah sang ci gui la chükmaih sang ci gui ah
ng'lung ah mi ng'ui ci.
16 Chükmaih ci gui ah phäh ah cun ah ng'ui cu, sih nak ah kya ne, hun nak gah ci gui ah phäh ah cun cu ghin nak ah kyak
ci. Cun ah kyasei cun ah mäih cu a u awn khinkha khai ang?
17 Keimi naw a hei chang gui ah so ah, Khanpughi ah ng'thu cu, aphu k'zän khawhchaam ah mäih ah kä kami sumlei nak ci: Khanpughi
naw ana tüih gui ah kyasei, amaa ah ang thu cu, Bawi Khrih chang
shäm ah kya ne ng'düng sei kami pyein ci.