16
Zum Ciah Pawchang Gui ah Hmawk ah Peit Taak Nak
1 Ca nami guk law ah, Judea kho ah Khanpughi ah chang gui m'htei nak gui vai ah ngui ah mawng ung, Kalatia kho
ah Khtihtabum gui kam cäi gui ah mäih ah nami bi vai
nei.Ref 16:1. Rom 15:25-26
2 Kei ka gawk law ung ngui loh vai kä hlü khai ah, pum hnüüp päng ung, ak chang sing naw nami mät ah khawh
gah a ci ah, pe u ne, nami na m'cun vai nei.
3 Kei ka gawk law ah a kyak ung, nami ghü ah chang am, ca guh ne m'khah ne, cun ah ngui cu Jerusalem ah vah
peit sak vai nei.
4 Kei ka hteit khai a kyak ung phi cun ah chang gui cu kei ung ami ng'gui tu ung bäi khai nei.
Paul ah Ng'Shei Ng'Tawn Nak
5 Kei cu Macedonia kho lam ah ka lawk khai kya sei, Macedonia kho ung ka hteh zawp kawn ah, nangmi ah om nak
ah ka lawk khai nei.Ref 16:5.
Lamktu 19:21
6 Nangmi awn atäng ah ak sho hta ka om hngaw khai, khoksik zah pum ung a cä ah ka om tu hman khai nei Cun kawn ah ka hteh
nak hlü ah ka hteh hning vai ah nami nam hteihtang khai ah ka
ngai ci nei.
7 Kei cu nangmi ah ka ng'düm tu pah düt ah kä kyak ciah, Khanpughi naw a zum ung nangmi awn ak shou ka om hlük ci nei.
8 Pentekos hnüüp ung khüt sei, Ephesus gawnu ah ka om khai nei.Ref 16:8. Lv 23:15-21;Dt 16:9-11
9 A cu ah kei na hnu ng'tuk püi ci akda om pang sei phi, a khuut bi nak vai a khin akni om ci nei.Ref 16:8-9.
Lamktu 19:8-10
10 Nangmi ah Timothi a gawk law ah a kyak ung akni ah dou ne nami khinchah nak vai nei, a i ah kyasei ci ung ani cu kei
ah mäih ah Khanpughi ah khuut bik ciah kyak ci.Ref 16:10.
1Kor 4:17
11 Ani cu a u naw phi kä ak shedam men nak vai nei. Kei cu khrihta phäinau gui awn atäng ah ani kami ging ci kya sei, keimi
ah om nak ah akni ah a gawk law vai ah nami m'htei htang vai
nei.
12 Ka nau Apollos cu, khrihta phäi nau gui awn atäng ah, nangmi ah om nak ah a law vai ah, ang täi sei kam cäi ci nei. Cun
ung phi a law nak vai ah khin cu ak pit ah kä k'bäi phak ci nei.
Akhin a gah law ung, a i ah a kyak ung phi lawk khai nei.
Ak Hnu ah M'Cäi Nak Gui
13 Nami cüivai vai, nami zum nak ung khäng htek sei nami ng'düih vai, nami hlui cang vai, nami k'thamah vai.
14 Nami bi phung m'hni nak awn nami bi vai.
15 Nangmi naw Stephanas la ak kyong ung kaa gui cu nami hmat ci. Ngahmi cu Achaia kho ung khrihta ah kya law ma ci gui ah kya
ne, Khanpughi ah chang gui ah hmawk ah bi bi vai ah ng'ap ci
gui ah kyak ci.Ref 16:15. 1Kor 1:16
16 Phäinau gui aw, a shin ah mäih ah chang gui ah lam shüm nak la, ngahmi awn atäng ah k'tha na ne khuut bik ci gui ah lam
shüm nak cu nami läk vai ah ka ning m'cäi gui ci nei.
17 Kei cu Stephanas, ni, Fortunatus ni, Achaikus ni gawk law u sei ka zei ci nei, ngahmi naw nangmi ah hnün ung kei cu nam hteihtang
ci gui nei.
18 Ngahmi naw nangmi ah m'lung ami ning zei sak gui ah mäih ah kei phi na zei sak ci gui nei. Cun ah mäih gui cu chang m'sui nak
gah khin ci gui nei.
19 Asia kho ah Khrihtabum gui naw phi ning zavaih gui ci gui nei;Akuila la Priscilla ni, ami im ah nami pum nak gui ah khrihta gui naw phi
ning zavaih gui ci gui nei.Ref 16:19.
Lamktu 18:2
20 Shi ah om ciah khrihta phäi nau gui ami van naw ning zavaih gui ci gui nei.
Theingthap ciah ng'ui ng'hnam nak awn tumat la tumat ng'zavaih
na tu vä.
21 Ka mät ah kut awn, “Paul ah zavaih nak” ci ne ka hei guk nei.
22 A u chang phi Bawipa kä m'hni ci phung cu-- kyuk sä!
Marana tha-- Kami Bawipa Kyum lawä!
23 Bawi Jesuh ah m'gein nak cu nami khan ah om sä.
24 Bawi Khrih Jesuh ung kei ah m'hni nak cu nami van ah khan ah om sä. Amen.