LAMKTU
GUI AH BI BI NAK
The Acts of The Apostels
Lamk'tu gui ah bi bi nak cu Luka ah guk ah Thu Ni ah ang däih ah kiak ci. Shin ung ak tung ah a pyein nak hlü cu, Bawipa Jesuh ah ang düihpüi htük gui naw, Mumcha Theing ah lam shüm nak awn, Jerusalem, Judah khaw, Samaria khaw lah khaw cawi ah khüt khai ah Thu Ni ami pyein nak ah mawng ah kiak ci (1:8). Lamk'tu ung a guk Khrihta bi bi nak cu Judah chang gui ung tün neh khaw m'dek khan van ah zum law ah mawng ah kiak ci. Ca guk ciah a pyein nak cu, Khrihta gui naw Roman khaw tuk khai gui ah kä kiak ci, Khrihta zum nak naw Judah gui ah zum nak man cu be sak ci ah mawng cu, ca phat ci gui naw ami hmat vai ah hmawk ah kiak ci.
Bawipa Jesuh amawng Thu Ni ami pyein law lah Khrihta bum ami tün law ah mawng cu, 'thum ah m'chah neh m'dang ci: (1) Bawipa Jesuh khan khaw ah a kai ba kawn ah Jerusalem ung Khrihta ang tüi law ah mawng; (2) Palestine khaw zung nüng ah a gawk law ah mawng; (3) Rom gawnu ung khüt khai ah Mediterranean khaw avan ung a gawk law ah mawng gui ah kiak ci.
Lamk'tu ung ak tung pi ah a mawng tumat cu, Jerusalem ah pentekos hnüüp ung, ang düihpüi gui ah khan ah Mumcha Theing kyum law neh bi abi nak ah mawng ah kiak ci. Cun ah kyum lawk ciah Mumcha Theing naw, Khrihta bum lah khrihta ng'vai gui cu, k'tha gui k'be neh lam am shüm gui ah mawng phi m'dang ci. Khrihta ng'thu thuk ah a phung cu shin ung om ciah ami ng'thu pyän gui ah kiak ci. Zum ci gui ah ghin nak lah khrihta bum gui ah kawng ät nak naw, ng'thu thuuk gui ah hlüng tai nak ami m'dang ah mawng phi ng'dang khai ah guk ah kiak ci.
1
1 Theophilus aw:
Ka guk htük ah cauk cu Bawipa Jesuh naw bi abi law nak ung leng neh,
2 Khankhaw ah akai ba ung khüt ciah kia ci. Cun ah kä ah kai pha ung a ghü gui ah ang düihpüi gui cu Mumcha Theing awn lam shüm gui shüt ci.
3 Ani cu asih kawn ah hnüp phlikip ah kyawng ung ang düihpüi gui ah ma ah akda vei ng'dang ba neh a ghin ba ah mawng cu ak cang ah m'dang shüt ci. Ang düihpüi gui naw ani cu hmuk ci gui, ani naw phi Khanpughi ah uk nak khaw ah mawng cu m'theithang gui ci.
4 Ami ng'bum law zah ung Bawipa Jesuh naw, “Jerusalem ung ka kä na mi hteh cang vai, ka ning m'thein gui man ah Pa Khanpughi ah Shaitak cu na mi gin vai.
5 Johan naw tui awn hnim nak pek ci, cun ung phi nang mi cu kä sho pha seih Mumcha Theing awn hnim nak na mi gah khai” ci neh m'cäi gui ci.
Bawipa Jesuh Khankhaw ah kai Ci.
6 Ang düihpüi gui cu ng'bum law u ne tah, “Bawipa, shin ah khin cu Israel chang gui am ami khaw na ap nak ba gui vai ah akhin ah kiah ne ang?” ci ne ng'shik ci gui.
7 Bawipa Jesuh naw, “Akhin cu Pa Khanpughi ah m'khüt näng nak bäng ah kiak seih nang mi naw na mi hmat vai ah kä kiak ci.
8 Cun ung phi na mi khan ah Mumcha Theing a kyum law ah a kiak ung, nang mi cu hlüng tai nak awn nami be khai. Cun kawn ah nang mi cu Jerusalem, Judea, Samaria lah khaw cawi ah khüt neh kei ah mawng pyein ciah saksi ah nami kiak khai” ci neh kiak na gui ci.
9 Cun ah ng'thu a pyän kawn ah ami hmuh ge ah Bawipa Jesuh cu, khan khaw ah kai khätah kho ng'mei naw shung sei kä hmu ba ci gui.
10 Cun ah a kai kawn ung ang düihpüi gui cu, khankhaw cäi ne dan ci gui. Cun zah ung abauk sui ciah chang gawi ami pei ah ng'dang law ni ne tah,
11 “Kalilee chang gui, a i ah kiak seih khankhaw ng'düi ne nami dan ang? Nang mi ung ka, nami hmuh ge ah khan khaw ah kai ciah Bawipa Jesuh cuh, a cun ah mäih ah kyum law ba khai nei” ci ne pyein ci gawi.
Judas Ah Hnün ung ng'düi Ba Ci.
12 Cun kawn ah ang düihpüi gui cu Olive m'htung ung ka naw, Jerusalem ah hteit ba ci gui. Olives m'htung cu Jerusalem ung kaa naw män m'cawt sho ci.
13 Ngah mi cu pigaw ah gawk u ne tah, ami im kai ah im kyawng ah lut ci gui: cun gui cu, Peter, Johan, James, Andru, Philip, Thomas, Bartholome, Matthe, Alfeas ah hta James, Simon ak ling lah James ah hta Judas gui ah kiak ci.
14 Ngah mi cu Bawipa Jesuh ah anu Mary lah ahei hnu mi gui ni, a naü gui ni, ashäng ashäng atäng ah ng'bum ne k'tai gü ci ci gui.
15 Kho hnüüp api sho law khä tah, zum ciah chang gui phia lah m'ku cu ng'bum lawk ci gui.
16 Cun kawn ah Peter cu ng'düi law ne tah, “Phäi näu gui aw, Bawipa Jesuh phak khai gui am, lam shüm gui ciah, Judas Iskariot ah mawng ca ng'cim ung om ci cu küm pyi ci nei. Cun ah ca ng'cim cu Mumcha Theing naw David ah ng'thu awn a pyein ah kiak ci.
17 Judas cu ang düihpüi tumat ah a ghü tu ah kiah seih mik mi ung ka ah kiak ci.
18 (Ani cu a shet kat nak awn a gah ah ngui awn, lai tumat cu khleih ne tah, a cun ah lai ung apawi teek ne, ak chi lut law seih kiuh ne sik ci.
19 Cun ah amanwg cu Jerusalem ah chang gui naw ng'zah u ne tah, cun ah lai cu ami mät ah ng'thu awn “Akeldama” ah sui ci gui, cun cu “Si lon kho” ci ah kiak ci.
20 “Salan ca ng'cim ung,
‘A im cu shiü sä,
akyawng khui ah u kä awm ba sä!
‘Ani ah a hnün ung chang ahei naw
ng'düi ne bi sä” ciah om ci.
21-22 “Cun ah kia sei Bawipa Jesuh a thawh ba ah mawng mik mi awn atäng ah saksi tuk khai ah chang tumat mi m'düih ba khai. Cun ah chang cu Johan naw tui hnim apeit nak ung tün neh Bawipa Jesuh khankhaw ah akai ba ung khüt khai ah, mik mi awn a täng ah hteit htawn bi lo tuk ciah chang ah kiak khai” ci ci.
23 Cun kawn ah ngah mi cu chang sing gawi ung ka tumat ghü vai ah k'bäi ci gui. Cun ah chang gawi cu, Barsabbas ami ci (Justus ah phi ami pyein) ah Josef lah Matthias ah kiak ci.
24 Cun kawn ah ngah mi cu, “Bawipa, nang naw chang ah m'lung kyawng avan na hmat ci, Judas cu amät ah ng'zak hlü ah ang'düihpüi ung ka hteit pyi ci.
25 Ani ah hnün ung bik khai ah shin ah chang hnih ung ka, a u na ghü ah nam thein gui ä” ci gui.
26 Cun kawn ah ngah mi ah hmawk ah htung tän neh ng'zuk u ne tah, Matthias cu ghü u neh ang'düihpüi gha-lei-ät awn atäng ah bi tuk khai ah m'düih ci gui.