1 မိုးနှောင်းကာလ၌၊ ထာဝရဘုရားထံမိုးကိုတောင်းကြလော့။ လျှပ်စစ်ကိုပြုပြင်သောထာဝရဘုရားသည်၊ မိုးရွာစေလျက်၊ လူအသီးအသီးတို့ကွင်း၌ ကောက်ပင် ပေါက်စေတော်မူ၏။ 2 တေရပ်ဆင်းတုများသည် မိစ္ဆာဟောခြင်း၊ ဗေဒင်ဆရာတို့သည် မုသာေမျှာ်မြင်ခြင်း၊ တိတ္ထုံဆရာတို့သည် အချည်းအနှီးဖတ်ခြင်းများကိုပြုလျက်၊ အကျိုးမဲ့အားပေးကြ သည့်အလျောက်၊ လူမျိုးတို့သည် အထိန်းအကျောင်းမရှိသည့်အတွက်၊ သိုးဆိတ်များကဲ့သို့ လမ်းလွဲလျက် ဒုက္ခရောက်ကြလေစွ။

3 ငါသည်၊ ထိုအထိန်းအကျောင်းတို့အပေါ်တွင် အမျက်တော်ထားလျက်၊ ဆိတ်ထီးကြီးတို့ကိုလည်း အစီအရင်ကြွလာမည်။ ဗိုလ်ခြေတို့အရှင် ငါထာဝရဘုရားသည်၊ ယုဒအမျိုးသားတည်းဟူသော သိုးအုပ်တော်ကို၊ အကြည့်အရှုကြွလာလျက်၊ စစ်ပွဲ၌ အသရေဆောင်မြင်းကဲ့သို့ဖြစ်စေမည်။ 4 တိုက်ထောင့်ကျောက်၊ တဲကြက်ဆူး၊ လေးလက်နက်သဖွယ်ဖြစ်သူတို့နှင့်တကွ၊ အုပ်ချုပ်သောမင်းအပေါင်းတို့သည်၊ ကိုယ့်အမျိုးကပေါ်ထွက်လျက်၊ 5 စစ်ရေးတွင် ရန်သူတို့ကိုလမ်းရွှံ့အဖြစ်နင်း၍၊ ငါထာဝရဘုရားပါရှိသောကြောင့်၊ သူရဲကောင်းတို့ကဲ့သို့တိုက်ခိုက်သဖြင့်၊ ရန်ဘက်မြင်းစီးသူရဲတို့သည် ဆုံးရှုံးရကြ လတ္တံ့။ 6 ထိုသို့ငါသည်၊ ယုဒအမျိုးသားတို့ကို ခွန်အားပေးလျက်၊ ယောသပ်အမျိုးသားတို့ကို ကယ်ဆယ်လျက်၊ ကရုဏာသက်သည့်အတိုင်း ပြန်လာစေပြီးလျှင်၊ မစွန့်ပစ်ခဲ့ သည့်နည်းတူငါထားဦးအံ့။ ငါသည် သူတို့ဘုရားသခင်ထာဝရဘုရားဖြစ်သည့်အလျောက်၊ နားညောင်းမည်။ 7 ဧဖရိမ့်အမျိုးသည် သူရဲကောင်းနှင့်တူလျက်၊ စပျစ်ရည်ဝသကဲ့သို့စိတ်ရွှင်လန်းကြမည့်ပြင်၊ သိမြင်ရသောသားမြေးတို့လည်းအားရလျက်၊ ငါထာဝရဘုရားကြောင့် စိတ်ရွှင်လန်းကြလိမ့်မည်။ 8 ထိုသူတို့ကို၊ ငါရွေးနုတ်ပြီးသည့်အလျောက်၊ လေချွန်၍ခေါ်သိမ်းသဖြင့်၊ အထက်နည်းတူတိုးပွားကြလိမ့်မည်။ 9 လူအမျိုးမျိုးတွင် ငါကွဲလွင့်စေသောထိုသူတို့သည်၊ ဝေးကွာသောပြည်များ၌ ငါ့ကိုသတိရလျက်၊ သားမြေးတို့နှင့်အတူနေထိုင်ရာမှ၊ ပြန်ရောက်ကြရလတ္တံ့။ 10 ငါသည် အိဂျစ်ပြည်မှတစ်ဖန်ခေါ်ဆောင်ခြင်း၊ အာရှုရိပြည်မှ စုသိမ်းခြင်းကိုပြုလျက်၊ ဂိလဒ်နယ်၊ လေဗနုန်နယ်များတွင်၊ နေရာလပ်မရှိသည့်တိုင်အောင်ပြန်ပို့ရာ၊ 11 ပင်လယ်အကျဉ်းအကျပ်ကို ဖြတ်သွားလျက်၊ လှိုင်းတံပိုးကိုဒဏ်ခတ်တော်မူသဖြင့်၊ နိလမြစ်ရေသည် ခန်းခြောက်ခြင်း၊ အာရှုရိအမောက်အမာသည် ရှုတ်ချခြင်း၊ အိဂျစ် အာဏာစက်သည် ပပျောက်ခြင်းများကိုခံရကြလတ္တံ့။ 12 ငါထာဝရဘုရားကြောင့်ခွန်အားရှိသည်နှင့်၊ ထိုသူတို့သည် နာမတော်ကိုအမှီပြုလျက်၊ သွားလာခွင့်ရကြလတ္တံ့ဟု ထာဝရဘုရားမိန့်တော်မူ၏။