1 အိုထာဝရဘုရား၊ အမျက်တော်ထား၍၊ အကျွန်ုပ်ကိုပဲ့ပြင်တော်မမူပါနှင့်။ ဒေါသထွက်၍ ဆုံးမတော်မမူပါနှင့်။ 2 မြှားတော်များသည် အကျွန်ုပ်ကိုမှန်လျက်၊ လက်တော်လည်းတင်ဖိလျက်ရှိပါ၏။ 3 အမျက်တော်ကြောင့်အကျွန်ုပ်အသား၌စုံလင်ခြင်း၊ ကိုယ့်အပြစ်ကြောင့်အရိုးများ၌သက်သာခြင်းမရှိပါ။ 4 အကျွန်ုပ်၏ မတရားမှုများသည်၊ ဦးခေါင်းကိုလွှမ်းမိုး၍၊ မထမ်းနိုင်အောင်လေးလံသောဝန်ကဲ့သို့ဖြစ်ပါ၏။ 5 မိုက်မိခြင်းကြောင့် ဒဏ်ရာများသည်၊ နံစော်ပုပ်ပျက်လျက်ရှိပါ၏။ 6 ငုံ့၍ကုန်းလျက်၊ နေ့ရှိသမျှမှိုင်ကာမှိုင်ကာသွားလာရပါ၏။ 7 ခါးသည်အလွန်ပူပြင်းလျက်၊ အသား၌စုံလင်ခြင်းမရှိပါ။ 8 ထုံကျင်ခြင်း၊ နုန်းခွေခြင်းလည်းရှိ၍၊ စိတ်နှလုံးမငြိမ်မသက်သောကြောင့်အော်ဟစ်ရပါ၏။ 9 အိုအရှင်ဘုရား၊ အကျွန်ုပ်၏အလိုဆန္ဒရှိသမျှသည်၊ ရှေ့တော်၌ထင်ရှားလျက်၊ ညည်းတွားရခြင်းလည်းမကွယ်မဝှက်ပါ။ 10 စိတ်နှလုံးမောဟိုက်လျက်၊ ခွန်အားကုန်ခန်းလျက်၊ စက္ခုအလင်းကွယ်ပလျက်နေရပါပြီ။ 11 အကျွန်ုပ်အနာရောဂါကို၊ အဆွေခင်ပွန်းတို့သည်၊ ကြည့်ကာသာနေလျက်၊ ဆွေမျိုးသားချင်းတို့လည်း၊ အဝေးကရပ်နေကြပါ၏။ 12 အကျွန်ုပ်အသက်အန္တရာယ်ကိုရှာကြံသူတို့သည်၊ ကျော့ကွင်းများထောင်ထားလျက်၊ နာကျင်စေလိုသူတို့လည်း၊ အကျိုးပျက်အောင် လိမ်လည်မှုများကိုနေ့ရှိသမျှကြံ စည်ကြပါ၏။ 13 အကျွန်ုပ်မူကား၊ နားပင်းသူကဲ့သို့မကြားဘဲ၊ အသူကဲ့သို့နှုတ်မဖွင့်ဘဲနေရပါ၏။ 14 မုချဆိုလျှင်၊ နားမကြားသူကဲ့သို့လည်းေကာင်း၊ တုံ့ပြန်ရန်စကားမရှိသူကဲ့သို့လည်းေကာင်း၊ ရှိနေရပါ၏။ 15 အိုထာဝရဘုရား။ အကျွန်ုပ်သည် ကိုယ်တော်၌စောင့်မေျှာ်၍၊ ကိုယ်တော်တုံ့ပြန်တော်မူပါလိမ့်မည်။ အကျွန်ုပ်၏ဘုရားသခင်၊ အိုအရှင်ဘုရား၊ 16 အကျွန်ုပ်က၊ သူတို့သည် အကျွန်ုပ်အပေါ်၌ ရွှင်လန်းခွင့်၊ ခြေချော်မိသောအခါထောင်လွှားခွင့်မရအောင်၊ တောင်းလျှောက်ခဲ့ပါပြီ။ 17 အကျွန်ုပ်သည် လဲလုမတတ်ဖြစ်လျက်ပူပန်ခြင်းကိုအစဉ်မျက်မှောက်ပြုလျက်နေရပါ၏။ 18 အကျွန်ုပ်မတရားမှုကိုဖော်ပြလျက်၊ အပြစ်အတွက်ပူပန်ပါ၏။ 19 ရန်သူတို့ကား၊ သန်မာပေါ့ပါးလျက်၊ မတရားသဖြင့်မုန်းထားသူတို့ တိုးပွားများပြားကြပါ၏။ 20 အကျွန်ုပ်သည် ကောင်းရာကိုလျှောက်လိုက်သောကြောင့်၊ အကောင်းအတွက် အဆိုးဆပ်ပေးတတ်သူတို့ရန်ဘက်ပြုကြပါ၏။ 21 အိုထာဝရဘုရား၊ အကျွန်ုပ်ကိုစွန့်ထားတော်မမူပါနှင့်။ အိုအကျွန်ုပ်၏ဘုရားသခင်၊ အကျွန်ုပ်နှင့်ဝေးကွာစွာနေတော်မမူပါနှင့်။ 22 အကျွန်ုပ်ကိုကယ်တင်တော်မူသောအိုအရှင်ဘုရား၊ အမြန်ကြွ၍ မစတော်မူပါ။