1 သင်ဟစ်ခေါ်လျှင်၊ ထူးမည့်သူရှိသလော။ သန့်ရှင်းသူတို့အနက်၊ မည်သူ့ထံလှည့်၍ ကိုးစားပါမည်နည်း။ 2 လူမိုက်သည် ဒေါသကြောင့်ပျက်စီး၍၊ မလိမ္မာသူလည်း၊ ကောဓကြောင့်သေတတ်၏။ 3 လူမိုက်သည် စည်းစိမ်အမြစ်စွဲသည်ကို၊ အကျွန်ုပ်မြင်ရသော်လည်း၊ သူ့မြေရာကိုရုတ်တရက်အမင်္ဂလာပြု၏။ 4 ထိုသူ၏သားသမီးတို့သည်၊ လုံခြုံရာနှင့်ဝေးကွာ၍၊ ကယ်လွှတ်သူကင်းလျက်၊ မြို့တံခါးဝတွင်နှိပ်စက်ဒဏ်ကိုခံရကြ၏။ 5 သူတို့ရိတ်သိမ်းထားသည်ကို၊ ဆူးစည်းထဲမှ မွတ်သိပ်သူခိုးစား၍၊ သူတို့ဥစ္စာဘဏ္ဍာကိုလည်း ညွှတ်ကွင်းထောင်ထားလျက်ရှိ၏။ 6 ဒုက္ခသည် မြေမုန့်ထဲမှမထွက်၊ ပင်ပန်းခြင်းလည်းမြေပေါက်မဟုတ်ချေ။ 7 မီးပွားများသည်တက်လွင့်တတ်သည့်နည်းတူ၊ လူလည်းမွေးဖွား၍ဒုက္ခခံရတတ်၏။

8 အကျွန်ုပ်ဖြစ်မူ၊ ဘုရားကိုရှာဖွေ၍၊ ကိုယ့်အမူအရာကို၊ ဘုရားသခင်ထံအပ်နှင်းတော့မည်။ 9 ကိုယ်တော်သည်၊ စူးစမ်း၍ မမီနိုင်သောတန်ခိုးများကိုလည်းေကာင်း၊ ရေတွက်၍မကုန်နိုင်သောအံ့ဖွယ်ရာများကိုလည်းေကာင်း၊ စီရင်တော်မူ၏။ 10 မြေအပြင်တွင်မိုးရွာစေ၍၊ လယ်ကွင်းပြင်၌လည်း ရေသွန်းတော်မူ၏။ 11 နိမ့်ကျသူတို့ကိုချီးမြှောက်၍၊ ညှိုးငယ်သူတို့ကိုလည်းလုံခြုံစွာထားတော်မူ၏။ 12 စဉ်းလဲသူတို့၏လက်မှုပညာအထမမြောက်ရစေခြင်းငှာ၊ အကြံအစည်များကိုလည်းကွယ်ပစေတော်မူ၏။ 13 ပညာရှိတို့ကို၊ ကိုယ့်စဉ်းလဲခြင်းအားဖြင့် ဖမ်းဆီးတော်မူ၍၊ လိမ်လည်ကောက်ကျစ်သူတို့၏ ပြဋ္ဌာန်းချက်လည်း၊ ရုတ်ခြင်းပယ်ပျက်လေ၏။ 14 ထိုသူတို့သည်၊ နေ့အချိန်တွင်မှောင်မိုက်နှင့်တွေ့၍၊ မွန်းတည့်အခါ၌လည်း၊ ညဉ့်ကဲ့သို့စမ်းယမ်းသွားလာရကြ၏။ 15 ဆင်းရဲသားတို့ကိုမူကား၊ ထိုသူတို့၏ဓားဘေးတည်းဟူသောနှုတ်မှလည်းေကာင်း၊ ခွန်အားကြီးသူ၏လက်မှလည်းေကာင်း၊ ကယ်လွှတ်တော်မူ၏။ 16 နွမ်းပါးသူတို့သည် ထိုသို့ပင်ေမျှာ်လင့်ခွင့်ရကြ၍၊ ဒုစရိုက်လည်းကိုယ့်နှုတ်ကိုပိတ်ရ၏။ 17 ဘုရားသခင်ပဲ့ပြင်တော်မူသောသူ၌ မင်္ဂလာရှိသည်ဖြစ်၍၊ အနန္တတန်ခိုးရှင်ဆုံးမတော်မူ ခြင်းကို ပေါ့ပေါ့ဆဆမပြုပါနှင့်။ 18 ထိုအရှင်သည်၊ နာကျင်ခြင်းနှင့်ပတ်စည်းခြင်းစီရင်၍၊ ထိပါးခြင်းနှင့်သက်သာခြင်းကိုလည်း၊ လက်တော်ဖြင့်ပြုတော်မူ၏။ 19 ဘေးခြောက်ပါးမှသင့်ကိုလွတ်မြောက်စေ၍၊ မုချအားဖြင့်ဘေးခုနစ်ပါးထိခိုက်ခွင့်ပြုတော်မမူ။ 20 အစာခေါင်းပါးရာကာလ၊ ဓားဘေးမှလည်းေကာင်း၊ ရွေးနုတ်တော်မူလိမ့်မည်။ 21 လျှာနှင့်တံချက်မှကွယ်ကာ၍၊ ဘေးဆိုးသင့်ရာကာလ၊ သင်ကြောက်ရွံ့ရမည်မဟုတ်။ 22 ဘေးဆိုးနှင့်မွတ်သိပ်ခြင်းကိုပင် ရယ်မောခွင့်ရ၍၊ သင်သည်မြေပေါ်ရှိသားရဲတို့ကိုလည်း မကြောက်မရွံ့ရ။ 23 အဘယ့်ကြောင့်ဆိုသော်၊ လယ်ရှိကျောက်များနှင့်မိတ်ဖွဲ့၍၊ မြေသတ္တဝါများနှင့်၊ အတူတကွသင့်တင့်ရလိမ့်မည်။ 24 ကိုယ့်တဲလုံခြုံသည်ကိုသိမှတ်၍၊ လယ်ယာစားကျက်များကို ရှုကြည့်ရာ၊ မည်သည်မျှမပျောက်မဆုံးချေ။ 25 သင်မှဆင်းသက်သောအမျိုးအနွယ်လည်းမြက်တောကဲ့သို့စည်းကားမည်ကိုသိရလတ္တံ့။ 26 ရာသီအလျောက်ကောက်လှိုင်းပုံတလင်းသို့ရောက်သည့်နည်းတူ၊ သင်လည်းကြီးရင့်သန်မာလျက်ပင်၊ သင်္ချၖိုင်းသို့ရောက်ရလိမ့်မည်။ 27 ကြည့်ပါလော့။ ဤအကြောင်းအရာကိုကျွန်ုပ်တို့စီစစ်လျက်၊ ထိုသို့မှန်ပါ၏။ ကိုယ့်ကောင်းစားခြင်းအလို့ငှာ၊ နားထောင်သိမှတ်ပါလော့ဟုမြွက်ဆို၏။