19
Ma khy taico vaicung letah cawngsaw rungpui ysangpaw o hapaw pyraw cawh thui neh ka,
“Hallelujah!
Pachahnah le rungnawnah le hmingtuakhynah cawh kaa Khazing a tei a cang,
zecawtamaw tatah a biacenah cawh a dingpaw le ahmangpaw a cang.
A pheilalai nápaw tah alui a papia a paluipaw mingthang hlohlangno khah
thaily a cangsah myca.
A sae sahlo aa thisai cawh ama tah phu a hlang myca,”
tatah aa tah.
Taico,
“Hallelujah!
Ama a kangpaw mekhu cawh chaizaw tah chaizaw tai a khu paria thlang,”
tatah aa y vy hui.
Macang paki papali le hminghring sangpali cawh aa khuh panai he ka, abui dyching letah a tythlangpaw Khazing khah aa beh. Taico,
“Amen, Hallelujah!”
tatah a y he.
Mataico abui dyching taitah o va ring ka,
“Naaning Khazing a sae a cangpaw,
Ama a cizawpaw vytei,
mehchia le, mehlai,
kaa Khazing cawh reithai my lo!”
aa tah.
Mataico, cawngsaw rungpui py a lopaw, tuiraso py le khalung a thihpaw py a lopaw thui neh ka,
“Hallelujah!
Kaa Buipaw Khazing Zezong Tuatu tah a uh myca.
A nawng he peh seh la, a lawng he peh,
taico Ama cawh rungnawnah pei he peh!
Zecawtamaw tatah Tuu teitei nupui chui cai cawh phah myca ka,
nupui chui ruapaw laisawno zong a mai myca.
Pai anaipaw, akhaipaw le a pathaipaw cawh
a pasangnah rua pawtah peh a cang myca,”
tatah aa y. Pai anaipaw cawh mehpathai sahlo dingnah tuanah cai pawtah hmangpaw a cang.
Mataico vaiming takhei, “Cia tua, Tuu teitei nupuichuinah kawngchua letah hruipaw sahlo cawh bonghnang aa ting a,” a pa tah. Taico, “Ma sahlo heh Khazing biahmuisui cawh a cang he,” a tah vy.
10 Ma tih taco a phehrang letah ka khuh panai neh ka, beh ka pachia. Canghrasala, “Pa beh kheh! Kama cawh nama le Zisu a bia a tle thlangpaw na uny sahlo hratah raihretu ka cang. Khazing long khah beh! Zecawtamaw tatah phyhlangpaw bia vytei a lemari cawh Zisu hnikhuipaw bia taitah a cang,” tatah a pa tah.
11 Mataico, vaicung a hongpaw hmuh neh ka, ma leco ka hme letah a ungpaw cawh rang araangpaw cang ka, a ketupaw cawh Zingchuipaw le Biahmuisui tatah aa y. Dingná tah biapace ka, rae a tuh. 12 A meh cawh mesy hratah cang ka, a lu letah builukhu hlupui a khu. A pung cung letah ming a cia ka, ma cawh ama tah ly co ahotahmai a silang hnih bei he. 13 Thisai letah nongpaw angki pasuapaw a hrei ka, a ming cawh Khazing Bia a cang. 14 Vaicung raekeh sahlo takhei aa pazui lai ke ka, rang raang ke he ka, pai anaipaw, araangpaw le a pathaipaw a buh he. 15 A kaw taikhei zyzi a te ngeteipaw ka pia ka, raangting a chawhly thlu he a. Aaning sahlo cawh thaw cungcahrei tah a uh he a. Khazing Zezong Tuatu a thingaenah misur sonah kho leco a phe tah a ci he. 16 A angki pasuapaw le a bawng letah, “Siangpahrang sahlo cung letah Siangpahrang le abui sahlo cung letah Abui,” tahpaw ming heh a cia.
17 Taico ning letah vaiming a daw thlangpaw khah ka hmuh, ama taco avai letei a zythi laipaw pavaw sahlo vytei khah, “A vong la, Khazing tei a tuapaw lawhdangnah rungnawpaw leco a va pahmo tua o, 18 siangpahrang sahlo, raekeh bui sahlo, a thawtlungpaw cawngsaw sahlo, rang sahlo le a kepaw sahlo, cawngsaw vytei, sae le mehlua, mehlai mehchia aa saw sahlo e ná he ceh seh,” tatah a thangpui tah a tah he.
19 Mataico, sawhrang le alui siangpahrang sahlo le aa raekeh sahlo cawh rang a kepaw le a raekeh sahlo rae thohno rua pawtah hmingkheh tah a pahmopaw he khah ka hmuh. 20 Canghrasala, sawhrang cawh tle cang ka, ama khaco ama caipaw tei ningang chuipaw paching pakhanah a tua teipaw khuavang pakheipaw khah tle a cang hrah. Ma paching pakhanah sahlo taco, sawhrang a tei cangnah ngianah hnui katei, a nono a behpaw sahlo khah a dungkhei he. Aaning pahning cawh kaa-me tuili lang ahringpaw tah thlah a cang he. 21 A raekeh sahlo cawh rang a kepaw a kaw taitei a kapiapaw zyzi khei thaw cang he ka, pavaw vytei tah aa saw cawh rivaw teitah aa e he.