9
1 Ka reipaw bia heh ahmangpaw bia a cang. Khri a tei cang neh ka, hingbia rei bei neh. Thlawpaw Pathai tei a uhpaw ka chiachaw thluidangnah lungthing zong tah hingbia ka rei lypaw khah a pa hni khui.
2 Ka uny sahlo le ka mingphing cawtah ka nge pachia hringhrai thlang ka, ka lungthing a sah ngetei.
3 Aaning aa cawtah a chahnah ruapaw a cang caco, Khazing chiasah ná tah kama hmai heh Khri khatah a chai hmai heh ka du vy.
4 Aaning cawh Israel mingphing Khazing thingpaw sawteileh khah cang he ka, Khazing rungnawnah khah a hmuhsah he. Aaning khatah biahrainah sahlo khah tua ka, phungbia khah a peh he. Behnah hmuisui cawh aaning takhei aa hnui. Khazing biakangnah khah aa hmuh.
5 Aaning sahlo cawh pathlahtu mehpuimaw sahlo pathlah a cang he. Taico Khri zong khah mehnung lang co aa mingphing a cang. Ama cawh zezong vytei a uhtu, chaizaw tah reithai tlang Khazing a cang! Amen.
6 Israel pathlah khah aa zongmingtei tah Khazing thingpaw cang hlui bei he, Khazing biakangnah cawh zehmai cang be ka tah dunah cang be.
7 Abraham teiching sawpa zong aa zongmingtei tah Abraham sawtei leh cang hlui bei he. Khazing tah Abraham cawh, “Isak teiching sawpa sahlo cawh nama na teiching sawpa tah rei a cang he a,”Ref 9:7 Atho 21:12 tatah a tah.
8 Bia hringpaw tei ka reipaw a cang caco, mehnung phung cakhawngpaw hratah sahpaw sawtei cawh Khazing sawtei cang hlui bei he. Khazing biakangnah hratei sahpaw sawtei suipaw Abraham teiching sawpa tah rawhpaw a cang he tahnah a cang.
9 Zecawtamaw tatah Khazing biakang cawh ma hrahei a cang: “A cai a zaw tihtah va kaw kaw neh ka, Sarah tah sawcapaw a sá a.”Ref 9:9 Atho 18:10, 14
10 Ma longtei cawh cang be. Rebeka a sawcapaw leh pahning zong takhei paw pakheh longtei hnui he ka, kaa mapaw Isak khah aa paw cawh a cang.
11 A cang naná teitah mehphia tlaw aa chua hlai tah le achawpaw cang seh, achiapaw cang seh, zehmai aa tua hlai taikhei Khazing tah a thingpaw pakheh khah a pacy khy nápawtah,
12 aaning tah aa hrenah thongtah cang lytah Ama tei a ynah caw he tah cang hri ka, Rebeka hai leco Khazing tah, “Uthui tah a suipaw a rai a hre tae a,”Ref 9:11 Atho 25:23 tatah a tah.
13 Capathai tah, “Jakob cawh ka do, Esau cawh ka hua,”Ref 9:13 Mala 1:2-3 a tahpaw hrakhei a cang.
14 A cang caco saw Khazing cawh ding be kaa tah khy maw? Tah khy bei peh.
15 Zecawtamaw tatah Moses hai letah pui,
“Ningdo ka dupaw cawh ning ka do thlang he,
aa zawngrawh ka dupaw cawh aa zawng ka rawh thlang he,”Ref 9:15 Piachua 33:19
a tah kha!
16 Macawtaco cawngsaw tah aa du cawtah le aa tuanah thongtah cang lytah Khazing ningdonah thong tutah a cang hri.
17 Zecawtamaw tatah Capathai leco Khazing tah Faraoh hai lekhei, “Nama siangpahrang tah ka ca tuapaw cawh ka thawtlungnah a lang nápaw le ka ming cawh aluicung pungpaluh letah a thang khy nápaw caw hrahring tah a cang,”Ref 9:17 Piachua 9:16 tatah a tah.
18 Macawtaco Khazing taco ning a do dupaw he khah ningdo thlang he ka, lunglaisah a dupaw he khah aa lung a laisah thlang he.
19 Naa hrong letah pakheh kheh tah a tho he ceh ka, “Ma hratei a cang caco, Khazing tah zecawtamaw sua a ma phosah thly thly thlang? Khazing dunah cawh ahomaw a pakhang khy?” naa tah.
20 Canghrasala nama cawngsawpaw, Khazing khah ei leimei ruapaw tah aho ky maw na cang? Alui bei tah a tuatupaw khah, “Zecawtamaw ma hrahei na pa tua?” tah be.
21 A ngetei ka tah caco, bei a tuatu tah luitlang tlangkheh taikhei bei sanghning a tua khy thlang. Sangkheh khah a sungnawpaw tah le sangkheh khah hmang cakhawng rua pawtah tuanah naw a hnui.
22 Khazing tah a thingaenah le a hmingtuakhynah khah a langsah a du. Canghrasala, dangtah ruatah a tlahpaw cawngsaw sahlo cung letah a lung a sy.
23 Mahratei a lung a sypaw cawh Ama arungnawnah a hrong pawtah a pachiapaw he, a dopaw he cawngsaw sahlo khatah a rungnawpaw alaisuinah khah a langsah a du cawtah a cang.
24 Kaaning heh a ypaw cawh cang he peh ka, Juda cawngsaw chung long taitah cang lytah Gental cawngsaw chung zong taitah ypaw ka cang he peh.
25 Ma cawh Hosea Cabu chung letei,
“Ka cawngsaw a cang lypaw khah, ‘Ka cawngsaw,’ tah he neh ka,
ka za do lypaw mingphing khah, ‘Ka dopaw,’ tatah ka tah he a,”Ref 9:25 Hose 2:23
tatah a tah.
26 Taico,
“ ‘Naaning cawh ka cawngsaw cang bei ceh,’ tatah a za tahnah pawhe hminghmaw lekhei,
‘Aaning cawh Khazing hring sawtei leh,’ tah a cang he a,”Ref 9:26 Hose 1:10
tatah a tah.
27 Taico Khazing khuavang Isaiah tah Israel mingphing kong lekhei,
“Israel cawngsaw cawh rili ngaekang letei sadi zeh hmai cang he seh la,
a cawngtei longlong pachah a cang he a.
28 Zecawtamaw tatah Khazing tah
khazaw heh a catleipaw tah a changnah tai bia a ce a,”Ref 9:28 Isai 10:22-23
a za tah.
29 Isaiah thly thly tah,
“Cungnungcai Abuipaw tah teiching sawpa
a cawngpe tei ma huapah lytah ung my seh la caw,
Sodom khuapui hratah cang thah he peh ka,
Gomora khuapui hrakhei ka cang thah he peh,”Ref 9:29 Isai 1:9
a za tahpaw hrakhei a cang.
30 A cang caco, zekhatamaw kaa tah a? Khazing dingnah hnui a za pachia bang lypaw Gental cawngsaw sahlo tah aa zingnah thongtah Khazing dingnah cawh aa hmuh myca.
31 Canghrasala, Khazing dingnah hmuh a pawtah phungbia a huipaw Israel cawngsaw sahlo taco, ma cawh hmuh bei he.
32 Zecawtamaw aa hmuh be? Zingnah khah a paichai lytah tuasanah tukhah a paichainah caw he tah a cang. A pachihnah alung leco a pachih he ka, a liahly thlu he.
33 Capathai tah,
“Mingtua, Zion letah mehnung a pachihlysah rua pawtah alung sangkheh ka chia.
Ma alung taco a pohlysah tae he a.
Canghrasala Ama a zingpaw cawngsaw cawh
ningzaw tah ung by bei he,”Ref 9:33 Isai 8:14, 28:16
a tah.