3
Jerusalem Hoyleinaw
Rawse a mangpaw,
a nungsikuhpaw te
ccungccaw a tuaa a sahpaw
khuapi hanlan ngaethya lan kou um!
Tuh-e khuapi tuh
Bawipaw bya kha ngae khyh;
thuiheinaw mah lawkuh khyh.
Bawipaw kha doliakuh khyh;
a Pachia kalan naekuh khyh.
 
Tuh-e khua lungkhu e
bawi hae tuh palei a siapaw
chindeih nynh thua hae;
a kya-e byapiatu hae tuh
awkhua cia pawpaw mah
a cciataw lei hae paw,
zete ccyh kya
a khiakuhthya hae paw
suizaw hae nynh thua hae.
A profeh hae tuh
tuanaw-roihnaw hoi lei
hae paw te alungzi leipaw
ccungccaw hae nynh thua hae,
a ranpibawi hae nynh
beikinnthyaa kha thusah hae zah,
a kawbya kha a ro hae.
Tuh-e lungkhu a umpaw
Bawipaw tuh ding zah,
hoyleinaw kha rae khyh.
Awkhua takyh, khuadaetakaw khe
a byapianaw kha
tyty a langsah zungzae;
thuasalama a ding lei
hae paw tuh maethya nyh khyh hae.
 
Minphuin hae kha
ka vua vae hae;
mih khualungrua hae tuh
aroh vae hae, laanpi hae kya
humhung nynh mah
a ccia khyh ccaw hae cite,
khua lungkhu e
laanpi hae kha ka ro vae hae;
a umtu ccungccaw hae
a um lei lan ciate
mih khuapi hae kha
ro athua vae hae.
“Khuapi nynh kae kha
yn rih ccaccing cih zah,
ka thuiheinaw kha
a lawkuh cih;
tetuh a umnaw kha
vuapya thua lan khyh zah,
ka ccangpyanaw balyn kha
papin ning lan khyh,” cite ka ho.
Thuasalama mih cyisahnaw balyn kyakhe
hoyleinaw rae kha a ryhua hae.
 
Minphuin hae Lungpaleihkunaw
Tukeiccuze Bawipaw nynh
a hopaw tuh, ccaekia lang
tang khylan kae thoku nin cia
yn la ngaw oh.
Pawccecize minphuin hae kha
suelua lan hae zah,
peenaw hae kha pum lan hae,
te ka thin-unaw, ka thinrianaw
asopaw balyn kha
mih tungvaw kya bu lan cite
bya ka paeku vae;
ka thinrianaw maee nynh
laephi pynpi kha a u cih.
 
Tuin ccyh vae tuh
ccungccaw balyn nynh
Bawipaw min kha
ko hae zah, lunglokute
a rya a law nawlan hae,
mih bya kha athyaapaw
bya lang ka paleih cih.
10 Ethiopia ram e vaw hae
khuraw lang kya
phiariphiarae um hae paw
ka ccungccaw hae,
kae yn beik hae paw nynh
ka hanlan lasung kha
yn ccyng cih hae.
 
11 Tuin nin vae tuh
kae nae dounaw oh paw
nae cyisahnaw balyn keiccuze
nae maethah vae lan khyh;
pawccecize pookute
mih lungpawkhaekuh hae paw kha
na kyate ka dee cih hae,
nang tuh athyaapaw
ka mua vawlan khe
na lysakuh vae lan khyh.
12 Pawccecize zakawsangsakuh hae paw te
anyaa hae paw kha
na ngaelung kya
ka nungsya cih hae.
Minmin nynh Bawipaw min kyakhe
khynnaw a ccungkuh cih hae.
13 Israel hae kya-e
a laehy hae paw nynh
hoyleinaw kha
rae lan khyh hae zah
hynbya ho lan khyh hae,
mih khalang lungkhu kya
ahynhupaw lae um vae lan khyh.
Tetuh minmin tuh
humhung nynh mah
rinaw pya leite
rampaeekuh cih hae zah
a rya cih hae.Ref 3.13: Bya 14.5
 
Lungpawnaw Hlaw
14 Pou Zion ccanung,
accae lante hlawsahtua.
Pou Israel, siatua!
Pou Jerusalem ccanung,
na thinlung balyn te
lungtua lungpawte umtua!
15 Bawipaw nynh na tungvaw e
detahnaw kha ccaring ae lawpya vae,
na rhaw hae kha
ccaring a dee vae hae.
Israel siapharan,
Bawipaw tuh nae laku kya a um;
na ri lanpaw ronaw kha
um vae khyh.
16 Tuin nin vae tuh,
e bya hynh Jerusalem kalan
hopya athua cih:
Pou Zion, rih nan;
na kuih thaw kha
zyasah bung nan.
17 Bawipaw na Pachia tuh
na ngaelung kya a um,
taenaw ae pyapaw
athungpaw nynh thua;
na tungvaw a lungtua cih zah
a lungpaw cih,
a sungsahnaw kyakhe
nang kha ae thawsah thui cih;
poi nin lya hawte phe ccae lan
hlawsah te na tungvaw
a lungtua cih,
18 Na kyate vawsawnaw kha
ka lah cih zah,
tuh-e hanlan theihryakunaw kha
na teing vae lan khyh.
19 Tuin ccyh kyakhe
nang ae tuaa ae sahtu hae balyn kha
kamaw nynh ka cyih cih hae.
Ccukhou hae kha
ka khum cih hae zah,
ccungccaw hae nynh
a ccuepe ry lei hae paw kha
ka suelua cih hae,
mih maethyanaw kha
thehoy ccounaw lang
ka paleih cih zah,
laephi pynpi kya minthaannaw ka pya cih hae.
20 Nanning suelua ccyh he yn thua te,
inn lang kae cciakhae cih oh;
pawccecize na muihnaw oh kyakhe
he kae kikhae oh te,
nanning kha laephi ccungccaw
balyn laku kya minthaannaw te
thehoynaw kae ccousah cih oh, cite
Bawipaw nynh a ci.