ZEFANIAH
Zephaniah
Profeh Zefaniah phung a honaw ccyh hynh BC 600 loukaw nynh thua, BC 621 kya Josiah siapharan nynh beiknaw a raethui maw kum haw loukaw kya athua kho. E ccauh kyahin ccangpaw profeh hae nynh a la ho vae hae paw mah a umbua: Judah hae nynh ccangpaw pachia hae kha a beik hae keiccuze Pachia nynh a roh cih hae. Bawipaw nynh minphuin ccangpaw hae kha mah a roh cih hae. Jerusalem tuh ro athua zemah raethui athua cih zah, tuin kyakhe zakaw a sangsakuhpaw te a dingpaw ccungccaw hae a um cih hae.
1
Judah siapharan Amon ccapaw Josiah she lyakhe Bawipaw bya tuh Zefaniah kalan yn thua; Zefaniah tuh Kushi ccapaw, Kushi tuh Gedaliah ccapaw, Gedaliah tuh Amariah ccapaw, Amariah tuh Hezekiah ccapaw nynh thua.Ref 1.1: 2Si 22.1—23.30; 2Sh 34.1—35.27
 
Judah kha Byapianaw
Laephi vawlan umpaw
atyn-are hynh khaleih ka roh cih, cite
Bawipaw nynh a ho.
Ccungccaw te sarangpaw hae kha
ka maemih cih hae;
vaawlang e pavaw hae te
rili kya-e ngasaw hae kha
ka maemih cih hae.
Ccungccaw hoylei hae paw kha
ka khuliasakuh cih hae.
Ccungccaw kha laephi vawlan te
ka vua cih, cite
Bawipaw nynh a ci.
Judah ram te Jerusalem kya
a um hae paw balyn kha
ka kuih ka dyngnua cih hae;
Baal a beik hae paw
a laehy hae paw te
zohtuh ranpibawi hae min kha
hynh-e hmin kyate ka vua cih hae;
vaawlang e uccaw hae kha
innccuvaw kyate a beiktu hae te
Bawipaw kha beik zah
bya mang a kinpakuh pite,
Milkom pachia min te
bya a kinkuh hae paw kha mah
ka vua cih hae.
Bawipaw kha zui leite
nulang a maeleihkuh hae paw,
Bawipaw kha ccung leite
tuanaw mah a ngiakuh
lei hae paw kha ka vua cih hae.
 
Bawipaw PACHIA malang khe
daebabi lan um oh!
Pawccecize Bawipaw nin tuh anae vae;
Bawipaw nynh silawnaw kha
a paccyn vae,
a kopaw a mikhia hae kha
a thyaasah vae hae.
Bawipaw silawnaw nin khe
bawi hae, siapharan ccapaw hae te
ramccang boeining te
a ccaankuh hae paw balyn kha
de ka tah cih hae.
Tuin nin khe rhawlungrua vawlan
po a kae hae paw balyn,
mih bawipaw inn kha
puathonaw te hynhunaw khate
phe a biasah hae paw kha
de ka tah cih hae.
 
10 Bawipaw nynh a hopaw tuh,
tuin nin vae tuh,
Ngasaw Koikua kya-e
siaruanaw roi kha thuasah,
Ccangningnaw khua kya-e
rawkhuinaw roi kha thuasah,
sangpyng hae kya-e
ronaw roi kha thuasah thae athua cih.
11 Mortar kya um hae paw tuh
a rah a khui hae,
pawccecize kungku hae paw
balyn tuh a roh vae hae;
phua te kungku hae paw
balyn tuh a zo vae hae.
12 Tuin ccyh khe Jerusalem kha
maeekhua te ka ccung cih,
Bawipaw nynh ahoypaw thuasah,
athahpaw thuasah
pawpaw mah cyih lan khyh,” cite
mih thinlung kya um zah,
ahaw vawlan e atui hawte
ngaengante a um hae paw kha
de ka tah cih hae.
13 Mih sisua kha luade athua cih zah,
mih inn hae kha ro athua cih.
Inn a sakku hae zemah umnah
lan khyh hae;
misu khokhu a raeku hae zemah
tuin kya-e misutui kha
neih lan khyh hae.
 
Bawipaw Nin Alesaepaw
14 Bawipaw nin alesaepaw tuh anae vae,
arangte yn naekuh vae;
Bawipaw nin kya-e
roi tuh akhah,
rhawkaw hae tuh
myarya ccae lan a sia hae.
15 Tuh-e nin tuh thinrianaw nin,
lungriathaenaw te
thinphangnaw nin,
ronaw te maemihnaw nin,
mohnaw te ngaethyanaw nin,
maeking azi nin te
marae zipingpaw mohnaw nin,
16 koihkhawpaw khuapi hae te
rhawvianaw innhangpaw hae kha
rawsete mungkae tu nin te
rhawtukte siarua nin nynh thua.
 
17 Ccungccaw hae tungvaw
tuhcihawpaw riathaenaw kha
ka thuasah cih zah,
mitmoh hae hawte a cceih cih hae;
Bawipaw tungvaw
a sei hae keiccuze
mih chii kha vuiping hawte
laee athua cih zah,
mih saw kha ia hawte vua athua cih.
18 Bawipaw a thinria nin tuh,
mih sui te mih ngun nynh
minmin kha khum kho lan khyh hae;
a thinrianaw maee nynh
laephi pynpi kha a u cih;
laephi vaw um hae paw balyn kha
arangte khaleih a thangsah cih hae.