8
Zion kha Byakinpyakunaw
1 Vaaw Bawipaw bya tuh ka kya yn thua zah:
2 Vaaw Bawipaw nynh hynhte a ho: Kae tuh Zion hanlan myaryamaw ka eiung zah, myarya thin-unaw te aning hanlan ka eiung.
3 Bawipaw nynh hynhte a ho: Kae tuh Zion lang ka ki cih zah, Jerusalem kya ka um cih; Jerusalem tuh alungzipaw khuapi cite ko athua cih zah, vaaw Bawipaw mua tuh mua thyaapaw cite ko athua cih.
4 Vaaw Bawipaw nynh hynhte a ho: Nungpi te paawpi hae tuh mih kum myarya a tang vae keiccuze hoitang ccarou ccyngkute Jerusalem laanpi hae kya bua a haung cih hae.
5 Khuapi kya-e laanpi hae tuh a zue hae paw imua nopi pise hae te phe abeih cih hae.
6 Vaaw Bawipaw nynh hynhte a ho: Tuh-e tuh atu she kya a laehy hae paw hynh-e ccungccaw hae hanlan athua kho lei lanpaw alo zemah, kae ka hanlan tuh athua kho leipaw alo cih zawtou? cite vaaw Bawipaw nynh a ho.
7 Vaaw Bawipaw nynh hynhte a ho: Ka ccungccaw hae kha nithua lang e ram te niccaw lang e ram kyate ka khum cih hae zah,
8 Jerusalem kya um khylan ka cciakhae cih hae. Lungzinaw te dingnaw liate minmin tuh ka ccungccaw hae athua cih hae zah kae tuh mih Pachia ka thua cih.
9 Vaaw Bawipaw nynh hynhte a ho: Vaaw Bawipaw inn, beikinn kha sak khylan athonaw kha bing athua lyaze a la um hae paw profeh hae nynh a ho hae paw hynh-e bya hae hynh atu she kya a thae hae paw nanning nynh nae thawsaesakuh oh.
10 Pawccecize tuin ccyh athua maw tuh ccungccaw hae hanlan te sarangpaw hae hanlan ryalaw mee um khyh, a tee hae paw hanlan te a pou hae paw hanlan rhaw hae kyate khynnaw um khyh, ccungccaw hae balyn kha lu kheit te lu kheit ka dousaku hae.
11 Thuasalama a laehypaw hynh-e ccungccaw hae hynh langmawlya hawte ka ccuepe vae lan khyh hae, cite vaaw Bawipaw nynh a ci.
12 Lungdaete ccacii kha a vua vae cih hae; misu ku nynh athae thae cih, laephi nynh ccathae a pousah cih zah, vaawlui nynh dangtui a ccawsah cih; e uccaw hae balyn hynh a laehypaw hynh-e ccungccaw hae ka ccousah cih hae.
13 Pou Judah hae te Israel hae, nanning tuh minphuin ccangpaw hae laku kya thyalawnawpaw lang na la tang oh hawte, nanning kha kae khum cih oh zah hythua ccounawpaw lang na tang cih oh. Rih nan oh, nae thawsae sah.
14 Vaaw Bawipaw nynh hynhte a ho: Nae minpaaw hae nynh ka thin he yn riasah hae tuh, synpyaku leite nae tungvaw kya ronaw thuasah lan ka paccynku hawte,
15 atu she kya mah Jerusalem te Judah hae tungvaw kya hoynaw rae lan bua ka paccynku; rih nan oh, cite vaaw Bawipaw nynh a ci.
16 E hae hynh na cyi lan oh paw nynh thua: Lu kheit te lu kheit byaccing kha hokuh oh, nae koikua hae kya ahmete byapia oh lah, daenaw hanlan rae oh,Ref 8.16: Efe 4.25
17 lu kheit te lu kheit nae thinlung kya ahoy leipaw kha paccynnuakuh nan oh, ahme leipaw byakinkunaw kha ry nan oh; pawccecize hynh-e uccaw hae balyn hynh ka hua, cite Bawipaw nynh a ci.
Lungtua lan umpaw Looh-aesungnaw
18 Vaaw Bawipaw bya tuh ka kya yn thua zah:
19 Vaaw Bawipaw nynh hynhte a ho: Sawpaw sah palinaw kya looh-aesungnaw, sah pangawnaw kya looh-aesungnaw, sah sarinaw kya looh-aesungnaw te sah hawnaw kya looh-aesungnaw tuh Judah hae hanlan lungtua lungpawnaw poi kha tua ccyh athua cih hae: tukeiccuze byaccing te daenaw kha ry oh.
Jerusalem lang Ccianaw
20 Vaaw Bawipaw nynh hynhte a ho: Minphuin hae, khuapi patae kya um hae paw tuh oun cceih cih hae;
21 khuapi khuakheit kya um hae paw nynh ccangpaw khua lang a cceih cih hae zah, “Rang oh, Bawipaw thawccinaw ngia khylan te vaaw Bawipaw kha ccung khylan cceih oh sih; kae mah ka cceih cih,” a ci cih hae.
22 Ccungccaw patae te athungpaw minphuin hae tuh vaaw Bawipaw kha Jerusalem kya ccung khylan te Bawipaw thawccinaw kha ngia khylan a cceih cih hae.
23 Vaaw Bawipaw nynh hynhte a ho: Tuin nin vae tuh bya aphuinphuin ho hae paw minphuin kya-e pise lu haw nynh Judah ccungccaw lu kheit kha a boeining te a kyng cih hae zah, “Pachia tuh na kya a um cipaw kha kae thae keiccuze nang ryte cceihkheih oh sih,” cite a hopah cih hae.