7
Athyaruhpaw Looh-aesungnaw Seibenaw
1 Darias nynh siapharan lang a tangnaw kum palinaw, Kislev acikuhpaw sawpaw sah takuanaw, nin pali nin khe Bawipaw bya tuh Zekhariah kalan yn thua.
2 Bethel khuaccaaw hae nynh Sharezer te Regem-melek kha mih ccungccaw hae ryte Bawipaw thawccinaw kha ngia khylan te
3 vaaw Bawipaw inn kya umpaw ranpibawi hae te profeh hae kyakhe, “Kum patae rya kae la law vae hawte, sawpaw sah pangawnaw kya rawkhuite looh-aesungte tou kae um ung cih?” cite khia khylan a saw hae.
4 Te vaaw Bawipaw bya tuh ka kya yn thua zah:
5 Ram lungkhu e ccungccaw balyn te ranpibawi hae kha hopah hae: Kum sung sari lungkhu, sawpaw sah pangawnaw te sah sarinaw kya looh-ae na sung oh zah rawkhuite na um vae oh ze, looh-ae na sung oh paw kha kae ka hanlan athua zawtou?
6 Na ae na nia vae oh ze, naemaw hanlan kyalya na ae na neih khyh oh tou?
7 Jerusalem tuh ccungccaw um zah a kaethung lya te a pepan e khua hae, Negeb te Shefelah kya mah ccungccaw a um lya hae ze, Bawipaw nynh langmaw profeh hae kyate a la phypaw bya kha hynh-e bya hae hynh thua khyh tou?
Pachia Kaw-einaw te Detahnaw
8 Bawipaw bya tuh Zekhariah kalan yn thua zah a hopaw tuh:
9 Vaaw Bawipaw nynh hynhte a ho: Hmerarih lan byapia oh, lu kheit te lu kheit ngaethyaumsakunaw te thawccikunaw kha langsakuh oh;
10 nomae hae, ngawraw hae, ramccang ccungccaw hae te ryachi hae kha tuaasah nan oh; lu kheit te lu kheit laku nae thinlung kya ahoy leipaw tuanaw hoikuh nan oh, a ci.
11 Thuasalama minmin nynh ngae ry khyh hae, mih lungkhung zah a thae khyh nawlan hae mih nakaring kha a huku hae.
12 A ccangpyanaw kha thuasah, vaaw Bawipaw nynh a muisaw te langmaw profeh hae kyate a hopaw bya hae kha thuasah a thae khyh nawlan hae mih thinlung kha a khungsahku hae. Tukeiccuze vaaw Bawipaw kyate myarya lepaw thin-unaw tuh yn thua.
13 Ka ko hae zah a thae khyh hae hawte, minmin nynh yn ko hae zemah ka thae khyh, cite vaaw Bawipaw nynh a ci,
14 te minmin nynh a ny lei hae paw minphuin hae balyn laku khe khiccung khate phiariphiarae ka nung hae. Tukeiccuze a cciataw hae paw ram tuh a cceih bungthungpaw lu kheit san a um lei lan ciate ccungccaw phe dae zah, um ry a umpaw ram tuh accakaepaw lang rae athua vae.