12
Jerusalem nynh Taenaw
1 Hodaebya.
Israel te asekuhpaw Bawipaw bya: Vaawlui kha tharae daw zah laephi kha mah rae zah ccungccaw lungkhu kya muisaw a raetupaw Bawipaw nynh hynhte a ho:
2 Dotua, Jerusalem tuh a pepan umpaw minphuin hae hanlan ruinawpaw banang lang ka rae cih; Jerusalem kha he a koihlu hae te, Judah kha mah a koihlu cih hae.
3 Tuin nin khe Jerusalem kha minphuin hae balyn hanlan aripaw lungtung lang ka rae cih; tuh-e lungtung a hang hae paw balyn tuh mimaw toulou kha vaemaw a muesakuh cih hae. Laephi vaw e minphuin hae balyn tuh Jerusalem dou khylan pynkheihlan a sueluakuh cih hae.
4 Bawipaw nynh a hopaw tuh, tuin nin khe marang miakaw kha ka siisakuh cih hae zah, a ccikuh hae paw kha ka ngaeesah cih hae. Thuasalama Judah hae kha tuh ka do-oih cih hae, minphuin ccangpaw hae kya-e marang miakaw kha mih mit ka mohsah cih.
5 Tetuh Judah phin hae nynh, “Jerusalem khuaccaaw hae tuh vaaw Bawipaw mih Pachia liate thawzung a hoi hae,” cite a hokuh cih hae.
6 Tuin nin khe Judah phin hae tuh maeething pumnuapaw maeephupi hawte thuasah, loohcce hae laku aruapaw maee hawte thuasah ka thuasah cih hae; minmin nynh mih pepan voilang ranglang umpaw minphuin hae balyn kha a roh cih hae, Jerusalem khua tuh amaw umnaw hmin, Jerusalem kya mawkhe bua a um cih.
7 David ciihan hae phu-enaw te Jerusalem khuaccaaw hae phu-enaw tuh Judah phu-enaw laeze hangthung athua khyh nawlan, Bawipaw nynh Judah rhawkaw hae kha taenaw a pyaty cih hae.
8 Tuin nin khe Bawipaw nynh Jerusalem khuaccaaw hae kha a thungkhaw cih hae, tuhteze nynh minmin laku e thawzung zya hae paw tuh tuin nin khe David hawte thuasah, David ciihan hae tuh Pachia hawte thuasah, mih malang umpaw Bawipaw vaawpaw hawte thuasah athua cih hae.
9 Tuin nin khe Jerusalem dou khylan oun cceih hae paw minphuin hae balyn kha ro khylan ka ccung cih hae.
Thuingpaw hanlan Rawnaw
10 David ciihan te Jerusalem khuaccaaw hae tungvaw kya ngaethyaumsahnaw thinlung te sawsang rynaw thinlung kha ka bu cih, tuhteze nynh minmin nynh a thuing hae paw ccungccapaw kha he a do hae te, lu kheit kyalyapaw ccaaw hanlan a rahpaw hawte, tuh-e paw hanlan a rah cih hae, ccatawccaw hanlan a rahpaw hawte, tuh-e paw hanlan thawte a rah cih hae.Ref 12.10: Joh 19.37; Bya 1.7Ref 12.10-14: Mat 24.30; Bya 1.7
11 Tuin nin vae tuh Jerusalem khua e rawnaw tuh Megiddo accya kya umpaw Hadad-rimmon hanlan rawnaw ciate ale cih.
12 Ram tuh a rah cih, innbyn raveih tuh mawmaw raveihte a rah cih hae; David ciihan kya-e innbyn tuh amaw taekhiate, mih zu hae tuh mimaw taekhiate a rah cih hae; Nathan ciihan kya-e innbyn tuh amaw taekhiate, mih zu hae tuh mimaw taekhiate a rah cih hae.
13 Levi ciihan kya-e innbyn tuh amaw taekhiate, mih zu hae tuh mimaw taekhiate a rah cih hae; Shimei innbyn tuh amaw taekhiate, mih zu hae tuh mimaw taekhiate a rah cih hae;
14 te tuhlaepaw innbyn hae tuh mawmaw innbyn raveihte, mih zu hae tuh mimaw taekhiate a rah cih hae.