2
Sawsangpyanaw Kong Thuiheinaw
Ngiapyanaw, sawsangpyanaw, alaku te ngiapyanaw te lungtuabya honaw kha ccungccaw balyn hanlan na raepya nawlan oh masaty lan kae ngia oh, aening nynh Pachia nyhpaw hiinnaw kya te sawtua lan umpaw hiinnaw balyn kyakhe daenaw te ah hiin kho nawlan oh te daebabipaw hiinnaw ah hoi kho nawlan oh, siapharan hae te kawhoitu hae balyn hanlan saw la sangpah oh cite kae ngia oh. Tuh-e cyisahnaw tuh aening oun Khumtu Pachia malang ahoypaw te ry lan umpaw nynh thua. Ccungccaw balyn nynh khumnaw mue hae sah lah byaccing kha nyh hae sah cite Pachia nynh a ry. Pawccecize
Pachia ccangkheit nynh a um;
Pachia te ccungccaw hae laku kya
Hopiatu Ccungccapaw
Khri Jesu lu kheit rou nynh a um.
Aning nynh ccungccaw balyn
shawkhaw nawlan
amaw kha a pyaku,
—tuh-e tuh accyh azawpaw kya ccaekia a khanpaw nynh thua. Tuh-e khylan kae tuh phunghotu lang, locceihtu lang, zynnaw te byaccing kha Zenta hae kya ccangpahtu lang khangpaw nynh ka thua. Byaccing nynh ka ho, ka hyn khyh.Ref 2.7: 2 Tim 1.11
Khriccaawbuu kya Nopi hae
Te pise hae nynh hmin takyh kya thinrianaw te eikunaw um leite athyaapaw kuih kha hangte sawsang hae sah ci ka ry. Tuhawte nopi hae nynh mah maethyaum leipaw boeining dohoypaw kha lawkute, ozia hoypaw te angaekuh lante ccaankuh hae sah lah, akhekuhpaw sang, sui, palee hae te amee rupaw boeining te ccaankuh nan hae sah;Ref 2.9: 1Pe 3.3 10 Pachia tungvaw rawri sawtuanaw a hoipaw nopi hae nynh cyi lan accan thyhte ahoypaw cyisahnaw khate ccaankuh hae sah ci ka ry. 11 Nopi nynh tuh kawngaenaw abalynte daebabi lan ccangkuh sah. 12 Nopi nynh ccangpya lan, pise tungvaw kaw hoi lan ka ua khyh, daebabi lan zya um sah. 13 Pawccecize Adam tuh masaty rae athua, tukoute nynh Evi kha rae athua.Ref 2.13: Gen 2.7, 21-22 14 Adam kha hynpya thua khyh; nopinung kha hynpya thua zah misei lang a tang.Ref 2.14: Gen 3.1-6 15 Thuasalama nopi hae nynh ningccehoyte zynnaw, sungsakunaw te thyaanaw kya atyn hae ze, ccaawsaahnaw kya khum athua cih hae.