SOLOMON HLAW
Song of Solomon
Solomon Hlaw cikuhpaw hynh Hlaw kyaze Ahoy huaccepaw Hlaw cite Hebru Baebu kya a um. Nopi te pise sungsakunaw byarui thua zah, Solomon nynh a phuapaw nynh thua cite a tua hae keiccuze Solomon Hlaw a ci hae.
E hlaw hae hynh Judah hae nynh tuh Pachia te a ccungccaw hae laku ccuepekunaw a langsakuhpaw sakhung nynh thua cite ho hae zah, Khriccaaw hae nynh tuh Khri te khriccaawbuu laku ccuepekunaw a langsakuhpaw sakhung nynh thua a ci hae.
1
Hlaw hae kyaze ahoy huaccepaw Solomon hlaw.
 
Akaenung Liaccanung te A Ban haeRef 1.1: 1Si 4.32
A mung te kae hynh
yn myng sah!
Pawccecize na sungsahnaw tuh
misutui laeze athuahua,
na thuhkupaw chitui tuh
amynkhuh, na min tuh zimuin
alaekuhpaw hawte amynkhuh;
tukeiccuze liaccady hae nynh
nang kha ae sungsah hae.
Kae hynh yn cciakhae lah,
rangsakuh sih.
Siapharan nynh a khaan
lungkhu lang yn teekhae vae.
Na kya kae lungtua cih zah
kae lungpaw cih; na sungsahnaw kha
misutui laeze kae thehoysah cih;
nang kha ae sungsah ccaccing hae.
 
Pou Jerusalem ccanung hae,
kae tuh Kedar bu hawte nynh ka thua,
ka ngesaw tuh aman zemah
Solomon inn kya-e
zokhawpaw boei hawte ka puithya.
Khuanin nynh phang yn e zah
ka ngesaw aman keiccuze
kae hynh yn dobung nan oh.
Ka nung ccapaw hae nynh
mih thin yn rianua hae,
minmin nynh misu khokhu
ngawtu lang yn nung hae,
ka misu khokhu kha
ka ngawkuh khyh!
Ka hiinnaw nynh a sungsahpaw nang,
na tuuphu na paeesakunaw te
ninthu kya na ryasahnaw hae kha
yn hopya tua; pawccemou
kae tuh na ban hae tuuphu pe kya
thuruh athuapaw hawte
ka thua lanpaw tuh?
 
Pou nopi hae laku kyaze
sungsah lan um huaccepaw,
na ny khyh ze, tuuphu hae
ccunoh kha zui lah,
tuurin hae bu pe khe
na tuutaw hae kha paeesakuh hae.
 
Zudy Ccangvaepaw, Ruiban hae, Akaenung
Ka sungsahnung, nang hynh
Faro marangle a sue hae paw laku e
rangpinung te kae touse.
10 Na byaki tuh ccaankunawpaw te
kou puithya zah, na nging tuh
aphutepaw lung suisi te kou puithya.
11 Kaening nynh ngun te ccaankuhpaw
suisi kha kae raepah ung cih.
 
12 Siapharan tuh a haungnaw vawlan
a um lyakhe, ka zimuin myn tuh akhuh.
13 Ka sungsah tuh ka hanlan
ka by vawlan umpaw
mura mynkhuh hawte nynh thua.
14 Ka sungsah tuh ka hanlan
En-gedi misu khokhu kya
a pawpaw henna nge hawte nynh thua.
 
15 Pou ka sungsahnung,
nang tuh na puithya;
myarya na puithya;
na mit tuh vahu te nynh aloku.
16 Pou ka sungsahpaw,
nang tuh na puithya;
sungsah lan na um ccaccing.
Aening iphae tuh ahinpaw zong nynh thua;
17 aening inn kya-e
atung accaw hae tuh sidar thing thua zah,
aening inn kya dawkuhpaw tuh
maeccaw ku nynh thua.