7
David tungvaw Pachia Byakinnaw
(1Sh 17.1-15)
1 Bawipaw nynh David kha a pepan e a rhaw hae balyn kyate haeungnaw pya zah, a inn kya a um lyakhe,
2 siapharan nynh profeh Nathan kha, “Dotua, kae tuh sidar thing inn kya ka um, thuasalama Pachia thingkua tuh bu kya nynh a um,” a cipya.
3 Nathan nynh siapharan kha, “La cceih lah, na thinlung kya a umpaw balyn kha la cyih, pawccecize Bawipaw tuh na kya a um,” a cipya.
4 Thuasalama tuin khuazi khe Bawipaw bya tuh Nathan kalan yn thua zah:
5 La cceih lah, ka ryalahtu David kha la hopah: Bawipaw nynh hynhte a ho: Ka um nawlan inn nae sakpah cih tou?
6 Israel ccungccaw hae kha Izip ram kyate ka cciakhae nin hae kyate atunin cia inn lungkhu kya ka um boi khyh, bu te beikbu lungkhu umte ka nuekuh bungthung.
7 Israel hae balyn ryte kae ccia bungthungnaw takyh kya ka ccungccaw Israel hae kha do-oih khylan kaw ka pyapaw Israel phin cciakhaetu lukhakheit kha, “Pawccemou sidar thing inn nae sakpya khyh?” cite ka hopah boi tou?
8 Tukeiccuze ka ryalahtu David kha hynhte na hopah cih: Vaaw Bawipaw nynh hynhte a ho: Nang tuh ka ccungccaw Israel hae kya bawi lang tang khylan tuu rampaeekunaw hmin kyate, tuu hae na zuinaw kyakhate kae ko;
9 na ccianaw takyh kya na kya ka um zah, na rhaw hae balyn kha na malang te ka vua hae; laephi vawlan e alesae hae paw min hawte alesaepaw min kha kae raepah cih.
10 Ka ccungccaw Israel hae elang hmin ccangkheit ka raepah cih hae zah, mimaw hmin kya a um nawlan hae te kaccohkale nung athua khyh nawlan hae, ka tynsah cih hae;
11 langmawlya ka ccungccaw Israel hae kya byapiatu hae ka nungpya lya hae hawte ccungccaw hoylei hae paw nynh vawsawnaw pya vae lan khyh hae; na rhaw hae balyn kyate nang kha haeungnaw kae pya cih. Tuhpiaze Bawipaw nynh nang kha inn innkheit ae raepah cih cite, Bawipaw nynh nang kha ae thaesah.
12 Na ccyh zaw vae zah na minpaaw hae ryte he na ihkheih oh te, na pyn kyate a pou cih paw na ciihan tuh namaw koute ka hangthung cih zah a peenaw kha ka tynsah cih.Ref 7.12: Sam 89.3-4, 132.11; Joh 7.42; Loc 2.30
13 Aning nynh ka min hanlan inn a sak cih zah a peenaw kha ka tynsah cih.
14 Kae tuh a paaw ka thua cih zah aning tuh ka ccapaw athua cih, hoyleinaw a rae ze, ccungccaw nynh a mangthyapaw ccungngue khate thuasah, ccungccaw nynh a buanaw thyapaw ruising khate thuasah de ka tah cih.Ref 7.14: Sam 89.26-27; 2Ko 6.18; Heb 1.5
15 Thuasalama na malang te ka vua vae paw Saul kyate atynpaw ka sungsahnaw kha ka law hawte aning kyate ka lah lan khyh.
16 Na inn te na peenaw tuh ka malang khe zungzae atyn lante rae athua cih; na bawitungkhung tuh zungzae atyn cih, a ci cite David kha la hopah, a cipya.Ref 7.16: Sam 89.36-37
17 E bya hae balyn thyhte, e vizin hae balyn thyhte Nathan nynh David kha a hopya.
David Sawsangnaw
(1Sh 17.16-27)
18 Tetuh David siapharan nynh alungkhu lang tee zah Bawipaw malang haung zah, “Pou Bawipaw PACHIA, kae tuh ahum ka thua zah, ka innbyn tuh pawcihawpaw innbyn athua keiccu mou hynhcih ciate nae hangthung?
19 Thuasalama pou Bawipaw PACHIA, e hynh tuh nang na muihnaw kya uccaw dihpaw nynh thua; na ryalahtu innbyn kong hynh mah malang ccyh hynhsepi hanlan cia na hoty vae. Pou Bawipaw PACHIA, e hynh ccungccaw hae elang thuiheinaw thua vae sah!
20 David nynh na kalan pawmou a ho kholae ung cih? Pawccecize pou Bawipaw PACHIA, na ryalahtupaw kha phe na ny!
21 Na byakinnaw keiccu thuasah, na thinlung thyhte thuasah na ryalahtupaw nynh a ny nawlan, e lesaenaw balyn hynh na rae vae.
22 Tukeiccuze pou Bawipaw Pachia, nang tuh na lesae; pawccecize kae nakaring te kae thaepaw balyn thyhte nang ae lopaw lu kheit san um khyh zah namaw laelan ccangpaw Pachia um khyh.
23 Na ccungccaw hae alopaw, Israel hae alopaw hummou a um? Minphuin hae te mih pachia hae kha a ccungccaw hae malang te ccaring deete, minmin elang alesaepaw te ngaeang lan umpaw uccaw hae kha raete a ccungccaw hae lang tang lan shawkhaw khylan te amaw hanlan min ccangkheit raeku khylan Pachia nynh a ccianua hae paw laephi vawlan ccangpaw minphuin a um tou?Ref 7.23: Deu 4.34
24 Na ccungccaw Israel hae kha na ccungccaw lang zungzae tang khylan namaw hanlan na tynsah hae; pou Bawipaw , nang tuh mih Pachia lang na tang.
25 Atu pou Bawipaw Pachia, na ryalahtupaw konglang te a innbyn konglang na ho vae paw bya kha zungzae tynsah tua; bya na kinku hawte beih cyitua.
26 ‘Vaaw Bawipaw tuh Israel a uktu Pachia nynh thua,’ cite na min tuh zungzae hangthung thua sah; na ryalahtu David innbyn tuh namaw malang tyn vae sah.
27 Pawccecize pou vaaw Bawipaw , Israel Pachia, nang nynh e byaphy hynh na ryalahtu hanlan na rae zah, ‘Nang kha inn innkheit kae raepah cih,’ na ci; tukeiccuze na ryalahtu nynh namaw kalan hynh-e sawsangnaw hynh ka sang ngan.
28 Pou Bawipaw PACHIA, nang tuh Pachia nynh na thua, na bya tuh kyh zah, e uccaw hoypaw hynh na ryalahtu kya bya na kinpyaku vae;
29 tukeiccuze atu tuh na ryalahtu innbyn hynh namaw malang zungzae tyn sah cite hythuapya khylan na lungrythua sah; pawccecize pou Bawipaw PACHIA, na ho vae hawte na ryalahtu inn tuh na hythuanaw khate zungzae hythuaccou vae sah,” a ci.