21
David nynh Gibeon hae Phulawnaw
David ccyh lyakhe kum thum lungkhu, kum kheit koute kum kheit ccakanccih zah, David nynh Bawipaw kha a khia. Bawipaw nynh, “Saul te a innbyn tungvaw kya chiise luasahpaw seinaw a um, pawccecize aning nynh Gibeon hae kha a chia hae,” a ci. Tukeiccuze siapharan nynh Gibeon hae kha ko hae zah a hopya hae. (Gibeon hae tuh Israel hae thua khyh hae, Amor hae a laehy hae paw nynh thua hae; Israel hae nynh minmin kha kae haang cih oh cite bya a la kinpyaku hae zemah, Saul nynh Israel hae te Judah hae kha myarya pankhae hae zah minmin kha maemih lan a zuaku.)Ref 21.2: Jos 9.3-15 David nynh Gibeon hae kha, “Pawmou kae cyipah cih oh? Nanning nynh Bawipaw rho kha hythua na pya nawlan oh, pawtemou seithyaanaw kae rae cih?” a cipya hae. Gibeon hae nynh amaw kha, “Kaening te Saul te a innbyn laku e byathan hynh sui te ngun kong thua khyh; Israel ccungccaw lu kheit sanmah kae theih lan khyh,” a cipya hae. Aning nynh, “Nae hanlan pawmou cyipyaku na ry oh?” a cipya hae. Minmin nynh siapharan kha, “Kaening nynh Israel ram pynpi kya umnaw hmin kae hoi khyh nawlan, kaening hynh oun maemih zah ro lan a paccyntupaw a ccapaw hae kya-e lu sari kha kae kuih kalan oun pya lah, Bawipaw mua vawlan Gibeon khua kya Bawipaw malang khe minmin kha kae sae cih hae,” a cipya hae. Siapharan nynh, “Minmin kha kae pya cih oh,” a cipya hae.
Thuasalama siapharan nynh Saul ccapaw Jonathan a ccapaw Mefibosheth kha tuh a haang, pawccecize David te Saul ccapaw Jonathan nynh Bawipaw malang khe byakinkunaw a la rae hae.Ref 21.7: 1Sa 20.15-17; 2Sa 9.1-7 Aiah ccanung Rizpah te Saul nynh a saah hae paw ccapaw lu ning Armoni te Mefibosheth kha thuasah, Saul ccanung Merab te Meholah khuapaw Barzillai ccapaw Adriel nynh a saah hae paw ccapaw lu pangaw kha thuasah siapharan nynh a ko hae;Ref 21.8: 1Sa 18.19 David nynh minmin kha Gibeon hae kuih kalan a pya hae, Gibeon hae nynh minmin kha Bawipaw malang mua vawlan khe thuing hae zah, lu sari mawte a chihkheih hae. Minmin tuh barli loohrue takaw lyakhe a chia hae.
10 Tetuh Aiah ccanung Rizpah nynh loohrue takaw ccyh kyate vaawlang te khuaa a raw makhia buriboei kha lah zah lung vawlan khe a phaeku; khuadae ccyh kyaze mih rhua vawlan khe azouthyapaw pavaw hae kha ccusah khyh hae, khuazi ccyh kya mah sarepaw hae kyate a thungkhaw hae. 11 Aiah ccanung Rizpah, Saul a lovaenung nynh tuhte a cyipaw kha David kya he a hopah hae tuh, 12 David nynh cceih zah Filistin hae nynh Saul kha Gilboa mua kya a chia nin hae ze, Filistin hae nynh a saenaw hae Bethshan khua e zapi tungkunaw laanpi kya-e mih rhua a ruhtu hae Jabesh-gilead khuaccaaw hae kyakhate Saul ru te a ccapaw Jonathan ru kha a law.Ref 21.12: 1Sa 31.8-13 13 Aning nynh tuin kya umpaw Saul ru te a ccapaw Jonathan ru kha a cciakhae; a thuing hae paw ccungccaw hae mih ru kha a pum hae. 14 Saul ru te a ccapaw Jonathan ru kha Benjamin ram Zela khua umpaw a paaw Kish shawku kyakhe a uu hae; siapharan nynh kaw a pya hae paw miakaw kha a cyi hae. Tuh-e koute ram hanlan a ngia hae paw kha Pachia nynh a ccoupya hae.
David Ccungccaw hae tungvaw Amia Ccungkunaw
(1Sh 20.4-8)
15 Filistin hae nynh Israel hae kha bua tuk hae zah, David te a ryalahtu hae tuh a cceihbung hae. Filistin hae kha tuk hae zah, David tuh myarya a thawbang. 16 Ccungccaw lepaw hae mintaw lu kheit athuapaw Ishbi-benob nynh sohin shekel za thum aripaw ccoi te zunghe thawpaw kha ccyngkuh zah, David kha ka theih cih, a ci. 17 Thuasalama Zeruiah ccapaw Abishai nynh amaw kha bawm khylan yn thuanua zah, Filistin paw kha tuk zah a chia. Tetuh David kha a ccungccaw hae nynh, “Israel maeekhua kha na thesei khyh nawlan, rhawtuknaw lang kae kya na cceihbua vae lan khyh,” cite byakinkute a hopya hae.Ref 21.17: 1Si 11.36; Sam 132.17
18 E koute Gob kyakhe Filistin hae ryte rhawtukkunaw bua a um; Hushath ccungccaw Sibbekai nynh ccungccaw lepaw hae mintaw lu kheit athuapaw Saf kha a chia. 19 Te Gob kyakhe Filistin hae ryte ccangpaw rhawtukkunaw bua a um; Bethlehem khuapaw Jaare-oregim ccapaw Elhanan nynh boeikuanawpaw phaeccya cia acihpaw ccoi alua a kyngpaw Git ccungccaw Goliath kha a chia. 20 Te Gath kyakhe rhawtukkunaw bua a um, tuin kyakhe a pyn myarya lepaw ccungccapaw lu kheit, a kuihdung ccangtaruh cci, a ccudung ccangtaruh cci, abalynte ccangkuin lae pali asaepaw a um; aning mah ccungccaw lepaw hae ciihan nynh athuabua. 21 Aning nynh Israel hae kha he a theihrya hae tuh, David a upaw Shimei ccapaw Jonathan nynh amaw kha a chia. 22 E lu pali hae tuh Gath khua kya um hae paw ccungccaw lepaw hae ciihan nynh athua hae; David te a ryalahtu hae kuih te a chih hae.