19
1 “Siapharan tuh palei rah zah Absalom elang ngaethya rawkhuite a um,” cite Joab kha a hopya hae.
2 Tukeiccuze tuin nin e taenaw tuh rhawkaw hae balyn hanlan rawkhui nawlan a tang; pawccecize rhawkaw hae nynh tuin nin khe, “Siapharan tuh a ccapaw elang myarya a ngaethah,” cite a thae hae.
3 Rhawtuknaw kyate a ccuepaw rhawkaw hae nynh mih maethah zah aruh lante a ccue hae hawte, tuin nin khe rhawkaw hae tuh khua lungkhu lang aruh lante a tee hae.
4 Siapharan tuh a mae kha bongkuh zah, “Pou ka ccapaw Absalom, pou Absalom, ka ccapaw, ka ccapaw!” cite siapharan tuh roi myarya ccae lante a rah.
5 Tetuh Joab nynh siapharan kalan inn lungkhu lang tee zah, “Na hiinnaw, na ccapaw hae te na ccanung hae hiinnaw, na zu hae te na lovae hae hiinnaw a khumtu hae na kuihkaw e bawi hae mae miakaw kha maethyanaw te atunin na bong vae hae,
6 pawccecize nang ae hua hae paw kha na sungsah hae zah, ae sungsah hae paw kha na hua hae. Na rhawbawi hae te na kuihkaw e bawi hae tuh pawpaw mah thua khyh hae cipaw kha atunin ccaerarih lan na langsaku vae; pawccecize atunin kya Absalom tuh la hiin sah lah, kaening balyn tuh kae la chi lanze, nang tuh na lungrythua cih, cipaw ka muih.
7 Tukeiccuze atu palou toikuh lah, na ryalahtu hae kha nebaleih lante hopah hae; pawccecize Bawipaw min phyate bya ka kinku, na ccia khyh lanze, atu khuazi lu kheit sanmah na kya um vae lan khyh hae; tuh-e tuh na di lyate atu cia na tungvaw accah boi paw ronaw balyn laeze athah huapaw athua cih,” a cipya.
8 Tetuh siapharan tuh thokuh zah koikua kya a haung. “Dotua oh, siapharan tuh koikua kya a haung,” cite rhawkaw hae kha a hopya hae; te rhawkaw hae balyn tuh amaw malang oun thua hae.
David kha Jerusalem lang A Ko hae
Tuh ccyh lyakhe Israel hae balyn tuh mih inn raveih lang a ccue vae hae.
9 Israel phin hae balyn kyakhe ccungccaw balyn tuh bya eikuh hae zah, “Siapharan nynh ah rhaw hae kuih kyate oun luesah zah, Filistin hae kuih kyate oun khum; atu tuh Absalom keiccuze ram kyate a ccue vae.
10 Thuasalama oun uktu lang chitui ah thuh oh paw Absalom tuh rhawtuknaw kya a chih vae. Tukeiccuze atu pawccemou siapharan kikhae lanpaw kong kha pawpaw san na ho khyh oh?” a ciku hae.
11 David Siapharan nynh ranpibawi hae Zadok te Abiathar kalan ccungccaw saw zah, “Judah piccan hae kyakhe, ‘Siapharan kha a inn lang kikhae khylan nanning tuh pawccemou nya na thya oh? Israel hae balyn nynh a ho hae paw bya kha siapharan kalan phe thua vae.
12 Nanning tuh ka puizia, ka ru te ka saw nynh na thua oh; athua lanze, siapharan kha kikhae khylan pawccemou nya na thya oh?’ cite la hopah oh.
13 Te Amasa kha, ‘Nang tuh ka ru te ka saw na thua khyh tou? Nang tuh Joab ccelang ka rhawkaw hae bawipaw lang na tang khyh lanze, Pachia nynh ka tungvaw kya tuh-e ciate thuasah, tuhlaeze alung lante mah cyih vae sah,’ cite la hopah oh,” a cipya hae.
14 Aning nynh Judah hae thinlung kha ccungccaw lu kheit thinlung hawte a law kho keiccuze minmin nynh siapharan kha byataw hae zah, “Nang tuh na ryalahtu hae balyn ryte oun ki oh,” a cipya hae.
15 Tukeiccuze siapharan tuh Jordan lang a ki; Judah hae tuh siapharan kha cciadue khylan te Jordan vaw zuakhae khylan Gilgal lang a cceih hae.
16 Benjamin phinpaw, Gera ccapaw Shimei tuh Judah hae ryte David Siapharan kha cciadue khylan Bahurim khua kyate arangte a cceih;Ref 19.16: 2Sa 16.5-13
17 amaw kyakhe Benjamin phin hae thong kheit a um hae. Te Saul innbyn kya ryalahtu Ziba tuh a ccapaw hae lu haw lae pangaw te a ryalahtu hae lu kuin ryte siapharan malang khe Jordan vaw kalan a ccuebung hae,
18 siapharan innbyn kha zuakhae khylan te siapharan a ry hawte cyipya khylan vaw kha a zua hae.
David nynh Shimei Thaw A Cci
Te siapharan nynh Jordan vaw a zua dyn khe Gera ccapaw Shimei nynh a malang bakhung zah,
19 siapharan kha, “Siapharan ka bawipaw nynh Jerusalem lang na pou nin kya na ryalahtupaw nynh ka cyiseinaw kha ka bawipaw nynh yn ccuinpah nan lah, yn liathuipah nan; siapharan nynh na lung kya beih nung nan.
20 Pawccecize ka sei vae cipaw kha na ryalahtupaw nynh ka nyku vae; tukeiccuze, dotua, atunin siapharan ka bawipaw kha cciadue khylan Josef ciihan hae balyn kyaze masaty kae thua vae,” a cipya.
21 Zeruiah ccapaw Abishai nynh, “Bawipaw nynh chitui a thuhpaw kha thya a law keiccuze Shimei hynh chia lan ccan khyh tou?” cite a khung.
22 Thuasalama David nynh, “Nanning Zeruiah ccapaw hae, atunin ka rhaw hae lang tang lan ciate kae te nanning tuh pawmou asekuh? Atunin Israel ccungccaw lukhakheit kha chia lan accan zawtou? Pawccecize atunin Israel hae kya siapharan ka thuapaw hynh ka nyhkuh khyh tou?” a cipya hae.
23 Siapharan nynh Shimei kha, “Na chih lan khyh,” a cipya. Te siapharan nynh bya a kinpyaku.
David te Mefibosheth Tungkunaw
24 Saul mintawpaw Mefibosheth tuh siapharan kha cciadue khylan yn cceihbung; siapharan a pou nin kyate khyndadyh lan a ki nin kyacia, a ccu mah ccikankuh khyh, a khawming mah ngokuh khyh, a boeining mah sukuh khyh.Ref 19.24: 2Sa 9.1-13, 16.1-4
25 Siapharan cciadue khylan Jerusalem kyate he a cceih te, siapharan nynh Mefibosheth kha, “Mefibosheth, pawccemou ka kya na cciabua khyh?” a cipya.
26 Aning nynh, “Pou siapharan, ka bawipaw, ka ryalahtupaw nynh phe yn ling; pawccecize na ryalahtupaw kae nynh amaw kha, ‘Ka hanlan lann kha khungnin yn depah, ka ccikuh cih zah siapharan kya ka cceihbua cih,’ ka cipya. Pawccecize na ryalahtupaw tuh ka ccukhou.
27 Aning nynh siapharan ka bawipaw kha ka konglang ae hynpya. Thuasalama siapharan ka bawipaw tuh Pachia vaawpaw te nynh na loku oh; tukeiccuze ahoy na ci hawte cyitua.
28 Pawccecize ka paaw innbyn hae balyn tuh siapharan ka bawipaw malang chi lan accan hae paw nynh thua hae; thuasalama na ccaboi kya a ae hae paw laku kya na ryalahtupaw hynh nae nungbua. Tukeiccuze siapharan kalan ccangpaw ngianaw kaw ka hoi ung cih zawtou?” a cipya.
29 Siapharan nynh amaw kha, “Na konglang tuh pawccemou na ho ung? Nang te Ziba nynh ram kha na neekuh cih oh, cite bya phe ka pae vae,” a cipya.
30 Mefibosheth nynh siapharan kha, “Siapharan ka bawipaw tuh inn lang khyndadyh lan nae thua nyngkae tuh, aning nynh marya lawkuh sah,” a cipya.
David nynh Barzillai Ngaethyaumsahnaw
31 Gilead ccungccaw Barzillai tuh Rogelim khua kyate yn cceihbung zah, siapharan kha Jordan khuraw lang cia saw khylan siapharan ryte a cceih hae.Ref 19.31: 2Sa 17.27-29
32 Barzillai tuh kum sung tarya cih vae zah myarya a taw vae. Siapharan tuh Mahanaim khua a um lyakhe aning nynh looh a pya; pawccecize aning tuh myarya a hoipaw nynh thua.
33 Siapharan nynh Barzillai kha, “Ka kalan cceihbua lah, Jerusalem khua kya kae do-oih cih,” a cipya.
34 Thuasalama Barzillai nynh siapharan kha, “Siapharan ryte Jerusalem lang ka cciabua thung lanpaw tuh kae hynh kum hohzeihmou ka hiin ung cih?
35 Atu hynh kum sung tarya ka cih vae; ahoypaw te athahpaw kha ka phiathya ung cih tou? Na ryalahtupaw nynh ka aepaw te ka niapaw hynh a thua thua khyh cipaw ka nyh kho ung cih zawtou? Hlawsahpaw pise hae te hlawsahpaw nopi hae roi kha ka ngae kho ung cih zawtou? Tukeiccuze na ryalahtupaw hynh siapharan ka bawipaw hanlan pawccemou phupaw ari chihpaw lang ka tang lanpaw tuh?
36 Na ryalahtupaw nynh Jordan vaw khuraw lang syngtaraw cia siapharan kya ka cceihbua cih. Siapharan nynh tuhcihawpaw lasung tuh pawccemou yn pya cih?
37 Ka khua kya, ka nung ka paaw hae shawku pe khe ka chi nawlan, na ryalahtupaw hynh thawccinawte beih yn kisah. Thuasalama hein kya na ryalahtu Khimham a um; aning hynh siapharan ka bawipaw kya cceihbua sah; ahoy na ci hawte amaw kha la cyipah,” a cipya.
38 Siapharan nynh, “Khimham tuh ka kya a cceihbua cih, te nang nynh ahoy na ci hawte ka cyipah cih; nae ngiapaw miakaw kha kae cyipah cih,” cite a khung.
39 Te ccungccaw balyn tuh Jordan vaw kha zua hae zah siapharan mah a zua; siapharan nynh Barzillai kha myng zah hythua a pya, te Barzillai tuh a inn lang a ki.
40 Siapharan tuh Gigal lang po cceih zah Khimham tuh a kya a cceihbua; Judah hae balyn te Israel hae angankuh nynh siapharan kha a cciakhae hae.
41 Te Israel hae balyn tuh siapharan kalan oun cceih hae zah, “Pawccemou kae uno Judah hae nynh nang kha ae ruh hae zah, siapharan ryte na innbyn hae te David ccungccaw hae kha Jordan vaw khuraw lang ae cciakhae oh?” a cipya hae.
42 Judah hae balyn nynh Israel hae kha, “Siapharan tuh kae naekuhpaw kae puizia athua keiccu nynh thua. E kong kyahin pawccemou nae thinria? Kaening nynh siapharan looh kha kae ae zawtou? Tuhkhyhze aning nynh lasung ccangkhakheit oun pya zawtou?” cite a khung hae.
43 Te Israel hae nynh Judah hae kha, “Kaening nynh siapharan tungvaw kya ccoupaw ccanghaw kae hoi, te David tungvaw kya mah nanning laeze alunghua kae hoi. Pawccemou nae theihrya oh? Kae siapharan kikhae lanpaw kong kha kaening nynh masaty kae ho khyh tou?” cite a khung hae. Thuasalama Judah hae bya tuh Israel hae bya laeze arehua.