18
Absalom Chinaw
David nynh a kya umpaw ccungccaw hae kha pum hae zah, milu thong kheit uktu, za kheit uktu cite rhawbawi hae kha a khang hae. David nynh rhawkaw hae kha phu thum lang a phia hae: pum thum pum kheit kha Joab nynh a uk, pum thum pum kheit kha Zeruiah ccapaw Joab a neitaw Abishai nynh uk zah, pum thum pum kheit kha Git minphuinpaw Ittai nynh a uk. Siapharan nynh ccungccaw hae kha, “Kamaw mah nae kya ka cceihbua cih,” a cipya hae. Thuasalama ccungccaw hae nynh, “Na cceihbua lan khyh. Pawccecize kaening tuh kae ccue zemah pawlang oun ria lan khyh hae. Kaening angankuh kae chi zemah pawlang oun ria lan khyh hae. Thuasalama nang tuh kaening thong haw zeih na phupaw nynh thua; tukeiccuze khua kyate bawmnaw nae pya ze ahoyhua cih,” a ci hae. Siapharan nynh minmin kha, “Nanning nynh ahoyhua na ci oh paw kha ka cyih cih,” a cipya hae. Tukeiccuze siapharan tuh koikua pe khe thadyn zah rhawkaw hae tuh azaza athongthong te a cceih hae. Siapharan nynh Joab, Abishai te Ittai kha, “Kae ka liate ccangvaepaw Absalom kha nebaleih lante la ccuepe vae oh,” a cipya hae. Siapharan nynh Absalom te asekuh lante rhawbawi hae balyn kaw a pya hae paw kha ccungccaw balyn nynh a thaebua hae.
Tuhcite rhawkaw hae tuh Israel hae kha tuk khylan ramkaw lang cceih hae zah, Efraim tuhpi kyakhe rhaw a tukkuh hae. Israel ccungccaw hae kha David ryalahtu hae nynh a tae hae, tuin nin kya ccungccaw patae chiakunaw um zah thong kuin a chih hae. Rhawtuknaw tuh ram pynpi kya a pazaekuh; tuin nin kya thaloi te a chihpaw laeze tuhpi kya a chihpaw alunghua.
Absalom tuh David a ryalahtu hae ryte tualeipite a tungkuh hae. Absalom tuh a lann kha ccikuh zah, lann tuh aran myarya lungpaw phaesi ku kaw khe a cceih. Absalom lu tuh phaesi ku kya phang takeihkuh zah, vaaw te lae laku kya a saekuh, a ccikupaw lann tuh po a cceih. 10 Ccungccapaw lu kheit nynh tuh-e tuh muih zah Joab kha, “Phaesi ku kya phang saekuhpaw Absalom kha ka muih,” a cipya. 11 Joab nynh a hopahtupaw kha, “Pawte-e, Absalom na muih tou! Athua lanze, pawccemou tuin kya maw chiate laekhu lang na saw khyh? Ngunphua kia haw te taeccia kha he kae pya cih paw,” a cipya. 12 Thuasalama tuh-e paw nynh Joab kha, “Ka kuih kya ngunphua thong kheit yn pya hae ze heize, siapharan ccapaw kha ka kuih ka hangnua lan khyh; pawccecize kae thaebuanaw kya khaw siapharan nynh namaw, Abishai te Ittai kha, ‘Kae ka liate ccangvaepaw Absalom kha thungkhaw oh!’ cite kaw ae pya oh. 13 Tuhlae lanze, lungzinaw hoi leite aning kha ka la chia ze (siapharan kya tuh pawpaw mah phei kho um khyh zah), nang hynh mah nae pankhae tali lan khyh,” a cipya. 14 Joab nynh, “Nang te hynhcite accyh ka thangsah han vae lan khyh,” a cipya. A kuih kya ccoi ccangthum ccyngkuh zah, phaesi ku kya phang a hiin ungpaw Absalom bung kha a thuing. 15 Te Joab kya-e rhawtuk-zunghe ccyngtu hae lu haw nynh Absalom kha koihlute thuing hae zah a chia hae.
16 Tetuh Joab nynh mungkae tu zah rhawkaw hae kha a khee hae keiccuze Israel hae a deehuitu rhawkaw hae tuh oun ki hae. 17 Absalom kha lah hae zah tuhpi kya-e hunghuapi kalan vua hae zah, myarya lepaw lungpum a pumthin hae. Israel hae balyn tuh mih inn lang a ccue vae hae. 18 Absalom nynh a hiin lyakhe, “Ka min liathuinaw lanpaw ccapaw ka hoi khyh,” ci zah, Siapharan Accya kyakhe lungbing ccangkheit bingkuh zah amaw min kha a phu. Tuh-e tuh atunin cia Absalom Lungbing a ci hae.
David nynh Absalom A Chipaw A Thae
19 Tetuh Zadok ccapaw Ahimaaz nynh, “Ka la ccue sah lah, siapharan kha Bawipaw nynh na rhaw hae thungnaw kyate ae luesah vae, cite the ka la thaesah cih,” a ci. 20 Joab nynh amaw kha, “Nang nynh atunin the na thaesah lan khyh; nyalang nin kya na thaesah cih; atunin tuh siapharan ccapaw a chi keiccuze na thaesah lan khyh,” a cipya. 21 Joab nynh Kush minphuinpaw lu kheit kha, “La cceih lah, na muihpaw kha siapharan la hopah,” a cipya. Kush minphuinpaw tuh Joab malang bakhung zah a ccue. 22 Zadok ccapaw Ahimaaz nynh Joab kha, “Pawpawte athua zemah, Kush minphuinpaw nulang te kae mah ka la ccue sah,” bua a cipya. Joab nynh, “Ka ccapaw, pawccemou na ccue cih? Tuh-e the na thaesah liate lasung na mue lan khyh,” a cipya. 23 Ahimaaz nynh, “Pawpawte thua zemah, ka ccue cih,” a ci. Tukeiccuze Joab nynh, “Ccue,” a cipya. Ahimaaz tuh Bialae laanpi te ccue zah, Kush minphuinpaw kha po a thoih.
24 David tuh koikua thyh ning laku kya a haung. Rhawviapaw nynh khualungrua kyate koikua adawkuhpaw innccuvaw lang po kae zah, ngaw he a do tuh a makhaete yn ccue cciamangpaw ccungccapaw lu kheit kha a muih. 25 Rhawviapaw nynh sia zah siapharan kha a hopya. Siapharan nynh, “A makhaepaw athua zetuh, thongpang yn phupaw nynh athua cih,” a ci. Aning tuh po yn cceih zah yn naekuh vae. 26 Te rhawviapaw nynh yn ccue cciamangpaw ccangpaw lu kheit kha a muih; rhawviapaw nynh koikua a ngawpaw kha ko zah, “Dotua, mingccangpaw a makhaete yn ccue cciamang!” a cipya. Siapharan nynh, “Aning mah thongpang yn thuakhae cih,” a ci. 27 Rhawviapaw nynh, “Masaty e paw nynh a ccuepaw tuh Zadok ccapaw Ahimaaz nynh a ccuepaw te nynh aloku,” a ci. Siapharan nynh, “Aning tuh ccungccaw hoypaw thua zah, thehoypaw yn thuakhae cih,” a ci.
28 Te Ahimaaz nynh siapharan kha ko zah, “Marya ahoy!” a cipya. Siapharan malang laekhu khe bakhung zah, “Siapharan ka bawipaw ae doutu hae paw kha ae pyatupaw Bawipaw na Pachia tuh thehoyte um sah,” a cipya. 29 Siapharan nynh, “Ccangvaepaw Absalom kha a dan tou?” a ci. Ahimaaz nynh, “Joab nynh na ryalahtupaw yn saw lya tuh ngaluin-ngaluin ccae hae paw kha ka muih zah, pawte nynh athua cipaw ka nyh khyh,” a cipya. 30 Siapharan nynh, “Nuekuh lah, hein kya thadyntua hin,” a cipya. Tukeiccuze aning nynh nuekuh zah, phang a thadyn.
31 Te Kush minphuinpaw tuh yn thua zah Kush paw nynh, “Siapharan ka bawipaw hanlan thehoypaw a um! Pawccecize Bawipaw nynh nang ae doutu hae balyn thungnaw kyate nang kha ae luesah zah, atunin phu ae lawpya vae,” a cipya. 32 Siapharan nynh Kush minphuinpaw kha, “Ccangvaepaw Absalom kha a dan tou?” cite a khia. Kush minphuinpaw nynh, “Siapharan ka bawipaw rhaw hae te nang kha vawsawnaw pya lan ae thonuakuh hae paw balyn tuh tuh-e ccangvaepaw hawte thua vae hae sah,” a cipya.
Absalom elang David A Rah
33 Siapharan tuh myarya a ngaethah zah, koikua vawlan umpaw akhaan kalan kae zah a rah; a cceih lalia lante, “Pou ka ccapaw Absalom, ka ccapaw, ka ccapaw Absalom! Nang na hanpaw kha kamaw ka la chih ravo nyn, pou Absalom, ka ccapaw, ka ccapaw!” a ci.