17
1 Tuhpiaze Ahithofel nynh Absalom kyakhe, “Ccungccaw thong haw lae ning kha pote atu khuazi ka la thokuh sah lah, David kha ka la deehui sah.
2 A thawbang lya te a lungthang lyakhe ka la phah cih zah ka la siisakuh cih; a kya umpaw ccungccaw balyn tuh a ccue cih hae. Siapharan kyalya kha ka la theih cih zah,
3 ccungccaw balyn tuh a vawpaw inn lang a cceihpaw akaenung liaccanung hawte na kalan kae kikhae cih hae. Ccungccapaw lu kheit hiinnaw kyalya kha na ccungpaw thua zah ccungccaw balyn tuh daebabi lan a um cih hae,” a cipya.
4 Tuh-e tuanaw pyapaw bya nynh Absalom te Israel piccan balyn kha mih lungrythuasah.
Hushai kya-e Tuanaw Pyanaw
5 Tetuh Absalom nynh, “Arkhi phin Hushai kha mah oun kotua oh, ho lan a hoipaw bya kha thaebua tua oh sih,” a ci.
6 Hushai tuh Absalom kalan he yn thua tuh, Absalom nynh amaw kha, “Ahithofel nynh hynhte a ho vae; aning nynh tuanaw oun pyapaw hawte ah cyih cih oh tou? Athua khyh ze, nang nynh oun hopya tua,” a cipya.
7 Hushai nynh Absalom kha, “Ahithofel nynh tuanaw oun pyapaw hynh atu ccyh kya tuh hoy khyh,” a cipya.
8 Hushai nynh po ho zah, “Na paaw te a ccungccaw hae tuh athungpaw rhawkaw hae nynh athua hae cipaw te ramkaw kya a taw lawpyapaw vong hawte myaryamaw mih thinria cipaw kha phe na ny. Tuhpiaze, na paaw tuh rhawtuk myarya thyapaw thua zah, rhawkaw hae kya khuazi rya lan khyh.
9 Atumaw heize laekarung sankhakheit kya khyhze ccangpaw hmin sankhakheit kya a rekuh vae cih. Masaty rhawtuknaw kya aening rhawkaw hae beihtaraw a chi hae ze, tuh-e bya a thaepaw miakaw nynh, ‘Absalom a zuipaw rhawkaw hae kha patae a chia vae hae,’ cite a ho cih hae.
10 Tetuh chindeih thinlung alopaw thinlung a hoi hae paw mih rawthungpaw rhawkaw hae heize myarya a rih vae cih hae; pawccecize Israel hae balyn nynh na paaw tuh a thungpaw thua zah a kya um hae paw tuh mih rawthung cipaw kha a ny hae.
11 Tukeiccuze hynhte tuanaw kae pya: Israel hae balyn tuh Dan kyate Beersheba kyacia, rili kin e laesia zeih alung hae paw zapi hae kha namaw kalan pum lan hae zah, rhawtuknaw kalan namaw ccaccei phe na cceihbua cih.
12 Aning kha muih khonaw pawpaw hmin kya zemah ccianua lan zah, dangtui nynh laephi a ccawphu hawte ccawphu lan; amaw thuasah, a kya um hae paw thuasah lu kheit san hiin lan khyh hae.
13 Khua lungkhu lang yn tee ze, Israel hae balyn nynh khua lungkhu lang liarui ccyngkute khua kya-e lung taraw ccangkheit san a laehy lei lan ciate, tuh-e khua tuh accya langkhe sue lan,” a cipya.
14 Absalom te Israel ccungccaw balyn nynh, “Arkhi phin Hushai tuanaw tuh Ahithofel tuanaw laeze ahoyhua,” a ci hae. Pawccecize Bawipaw nynh Absalom tungvaw ronaw a thuakhae nawlan, Bawipaw nynh Ahithofel tuanaw ahoypaw kha ro khylan a paccyn vae.
Hushai nynh David A Ccuesah
15 Tetuh Husai nynh ranpibawi Zadok te Abiathar kha, “Ahithofel nynh Absalom te Israel piccan hae kha hynhte khahte tuanaw a pya hae; kae nynh mah hynhte khahte tuanaw ka pya hae.
16 Tukeiccuze arangte ccungccaw saw oh lah, David kha, ‘Atu khuazi ramkaw e vaw zuanaw kya la um nan, pawpawte athua zemah vaw kha po la zua; tuhkhyhze tuh siapharan te a kya umpaw ccungccaw balyn tuh maemih na thua vae cih oh,’ cite la hopah oh,” a cipya hae.
17 Jonathan te Ahimaaz tuh Enrogel kya a ngaw hae; ryalahtunung lu kheit nynh leih cceih zah minmin kha a hopya hae, te minmin nynh leih cceih hae zah David Siapharan kha a hopya hae; pawccecize khua lungkhu lang a tee hae paw kha muihsakuh ry khyh hae.
18 Thuasalama imuapaw lu kheit nynh minmin kha muih hae zah Absalom kha a hopya; tukeiccuze parouh mawte arangte ccue hae zah, Bahurim khua e ccungccapaw inn kya a thua hae, tuh-e paw nynh a voidu lungkhu khe tuisung ccangkheit hoi zah, tuh-e lungkhu langkhe a rungbung hae.
19 Tuh-e ccungccapaw zu nynh tuisung akhu kha ahu hu zah, a vawlan khe looh a rei; tuh-e kong tuh humhung nynh mah nyh khyh.
20 Absalom a ryalahtu hae nynh inn kya umpaw nopinung kya he a thua hae te, “Ahimaaz te Jonathan teimou a um hae?” cite a khia hae. Nopinung nynh, “Khuraw lang phe zua vae hae,” a cipya hae. Minmin nynh ccung hae zah a muih khyh hae keiccuze Jerusalem lang a ki hae.
21 Minmin a ki kou hae te, Ahimaaz te Jonathan tuh tuisung lungkhu te oun pou hae, te cceih hae zah David Siapharan kha a hopya hae. Minmin nynh David kha, “Thokuh lah, khuraw lang arangte zua; pawccecize Ahithofel nynh nang kha rawsete hynhte khahte tuanaw kha a pya vae,” a cipya hae.
22 Tukeiccuze David te a kya um hae paw balyn tuh thokuh hae zah Jordan vaw a zua hae; khua yn dae tuh Jordan vaw a zua leipaw lu kheit san um vae khyh.
23 Ahithofel nynh tuanaw a pya hae paw kha zui khyh hae cipaw he a muih tuh, a lann kha khungnin de zah amaw khua lang a inn lang a cceih. Innbyn khuasahkunaw kha a hopah kou hae te, amaw toulou kha a nging saekuh zah a chih; te a paaw shawku kya a uu hae.
24 Absalom te Israel hae balyn nynh Jordan vaw he a zua kou hae tuh, David tuh Mahanaim khua a thua vae.
25 Absalom nynh Amasa kha Joab ccelang rhawkaw hae uktu lang a khang. Amasa tuh Ishmael ccungccaw a min Ithra cikuhpaw ccapaw nynh thua; Ithra nynh Abigail kha zu lang a umkhae, Abigail tuh Joab nung Zeruiah a neitawnung Nahash ccanung nynh thua.
26 Absalom te Israel hae tuh Gilead ram kya ryahmin a tahku hae.
27 David tuh Mahanaim khua he a thua te, Ammon hae ram e Rabbah khuapaw Nahash ccapaw Shobi, Lodebar khuapaw Ammiel ccapaw Makhir te Gilead ccungccaw Rogelim khuapaw Barzillai nynh
28 ikhung hae, pakepi hae, laephi ang hae, chanvuih, barli, aepaw, thoupaw ccathae, pei hae, bia hae,
29 khoitui, samateitui ahaawpaw, tuu, vaetua zaw kya-e mateitui haawsahpaw kha David te a kya um hae paw nynh a ae lan hae cite a ccyngpya hae; pawccecize minmin nynh, “Rhawkaw hae tuh ramkaw kya mih vuelaw zah thawbangte tui a haw hae,” a ci hae.