15
Absalom nynh David A Rawse
1 Tukoute Absalom nynh marangle ccangkheit, marang hae te a malang a ccuety lanpaw ccungccaw sung pangaw kha a paccyn hae.
2 Absalom tuh awkhua takaw te leih tho zah koikua kalan ccianaw laanpi pe khe leih a thadyn; te lukhakheit nynh a byathan kha byapiaku khylan siapharan malang a thuakhae ze, Absalom nynh ko zah, “Nang hynh tei khuapaw mou na thua?” cite leih a khia. Tuh-e paw nynh, “Na ryalahtu tuh Israel ram kya-e tuh phin khah phin nynh ka thua,” cite he a khung vae ze,
3 Absalom nynh, “Dotua, na bya tuh hoy zah akyh; thuasalama na byathan ngaepya khylan siapharan nynh a nawpaw ccungccaw um khyh,” cite leih a hopya hae.
4 Tuhpiaze Absalom nynh, “E ram kya byapiatu lang ka tang ravo nyn! Kaethekunaw bya te byathan a hoipaw balyn nynh ka kalan oun cceih cih hae zah, hmerarih lan bya ka piapah cih hae,” cite leih a ho.
5 Ccungccaw hae nynh sawtuanaw pya khylan amaw kalan a naeku vae hae ze, a kuih kha leih dyng zah leih a myng hae.
6 Byapiaku khylan siapharan kalan oun cceih hae paw Israel hae miakaw kha Absalom nynh tuhcite leih a cyi hae; tukeiccuze Absalom nynh Israel ccungccaw hae thinlung kha a ru hae.
7 Kum pali aro koute, Absalom nynh siapharan kha, “Bawipaw kya bya ka kinkupaw kha ccingsah khylan Hebron khua lang ccianaw kaw beih yn pya.
8 Pawccecize na ryalahtu nynh Siria ram Geshur khua ka um lyaze byakinkunaw ccangkheit ka rae zah: Bawipaw nynh Jerusalem lang yn cciakhae ccaccing zetuh, Bawipaw kha Hebron khua kya ka beik cih, ka la ci,” a cipya.
9 Siapharan nynh, “Ngaengante la cceih,” a cipya. Tukeiccuze thokuh zah Hebron lang a cceihthung.
10 Thuasalama Absalom nynh Israel phin hae balyn kalan khe locceihtu hae kha aruh lante saw hae zah, “Mungkae roi ccahe na thae oh te, ‘Absalom tuh Hebron khua kya siapharan lang a tang vae!’ cite na sia cih oh,” a cipya hae.
11 Absalom nynh a ko hae paw ccungccaw za ning tuh Jerusalem kyate a cceih hae; tuh-e hae tuh pawningkhua ny leite, thinlung thyaararihte a cceih hae paw nynh thua hae.
12 Absalom nynh silawnaw a rae cciamang lyakhe, Giloh khua lang ccungccaw saw zah David kya-e tuanaw pyatu, Gilon minphuinpaw Ahithofel kha a kosah hae. Tuh-e aruh lante khuakhannaw tuh thawzung houhouh hoi zah Absalom a zuipaw ccungccaw hae tuh houhouh a lungchih hae.
Jerusalem te David A Ccue
13 Locceihtu lu kheit tuh David kalan yn thua zah, “Israel hae thinlung tuh Absalom nulang nynh a zuiku vae,” a cipya.
14 Tetuh David nynh Jerusalem kya a umkheih hae paw a kuihkaw e bawi hae balyn kha, “Thoku oh! Ccue oh sih, tuhkhyhze tuh Absalom kuih kyate ah lue vae lan khyh oh. Rangsakuh oh, tuhkhyhze tuh aning nynh aro mawze oun phah cih zah, ah tungvaw kya ronaw thuakhaete khuapi hynh thaloi te a bae vae cih,” a cipya hae.
15 Siapharan kuihkaw e bawi hae nynh siapharan kha, “Siapharan kae bawipaw nynh bya na paepaw miakaw kha na ryalahtu hae nynh cyi lan paccynkute kae um,” a cipya.
16 Tukeiccuze siapharan tuh thokuh zah a innbyn hae balyn nynh a zui hae; tuhzemah a lovaenung hae lu haw kha tuh inn do-oih khylan a cciatawsya hae.
17 Siapharan te a ccungccaw hae balyn tuh pou hae zah, innte lang kou umpaw inn kyakhe a haeung hae.
18 A kuihkaw e bawi hae balyn tuh a kya a zuikuh hae; Khereth hae balyn, Peleth hae balyn te Gath khua kyate amaw a zui hae paw Git minphuin za taruh hae balyn tuh siapharan malang a cceih hae.
19 Te siapharan nynh Git minphuinpaw Ittai kha, “Pawccemou nang hynh kae kya na cciabua? La ki lah, siapharan ryte la um oh; pawccecize nang tuh ramccangpaw na thua zah, na inn kyate a ccuepaw mah na thua.
20 Inkhawnin dede nae thua zah, atunin kaemaw ryte kae vaevuisah bua cih tou? Teilang ccia lan cipaw san ka nykuh khyh. La ki lah, na puizia hae mah la kikhae hae; Bawipaw nynh atynpaw sungsahnaw te a lungzinaw kha ae la muihsah vae sah,” a cipya.
21 Thuasalama Ittai nynh siapharan kha, “Bawipaw tuh a hiin thyhte, siapharan ka bawipaw mah a hiin thyhte, siapharan ka bawipaw a umnaw takyh kya, chi zemah hiin zemah, tuin kyakhe na ryalahtupaw mah ka umbua cih,” a cipya.
22 David nynh Ittai kha, “Athua lanze, po cceih ccaleih,” a cipya. Tukeiccuze Git minphuinpaw Ittai tuh a ccungccaw hae balyn ryte, te amaw kya um hae paw imua hae balyn ryte po a cceih hae.
23 David a zui hae paw balyn tuh a ccia hae keiccuze ram pynpi tuh thawte a rah; siapharan nynh Kidron vaw kha zua zah, ccungccaw balyn tuh ramkaw langkhe a cceih hae.
24 Abiathar tuh yn thua zah, Zadok mah Levi hae balyn ryte Pachia byakin thingkua kha puihte oun thua hae. Ccungccaw hae tuh khua lungkhu te pong a pou kou makhia hae, Pachia thingkua kha laekhu khe a nung hae.
25 Te siapharan nynh Zadok kha, “Pachia thingkua kha khua lungkhu lang la kikhae. Bawipaw malang maehoynaw ka mue zetuh, aning nynh bua yn kikhae cih zah, e thingkua te thingkua a umnaw hmin kha yn muihsah cih.
26 Thuasalama aning nynh, ‘Na tungvaw ka lungrythua khyh,’ a ci lanze, kae tuh hein kya mang ka um, ahoy a ci thyhte ka tungvaw cyih vae sah,” a cipya.
27 Siapharan nynh ranpibawi Zadok kha, “Dotua, daebabi lan khua lungkhu langkhe, nang te Abiathar tuh, nae ccapaw hae lu ning, namaw ccapaw Ahimaaz te Abiathar ccapaw Jonathan ryte la ki oh.
28 Dotua, nanning kyate ka kalan thaesah lanpaw bya yn thua mawlaezung ramkaw e vawkhu zuanaw kyakhe ka la ngaw cih,” a cipya.
29 Tukeiccuze Zadok te Abiathar nynh Pachia thingkua kha Jerusalem langkhe kikhae hae zah, tuin kya a umsya hae.
30 David tuh raw biate, a lu bongkute a ccu ccakaete Oliv Mua langkhe a kaethung; amaw kya um hae paw balyn tuh raw biate mih lu bongkute a kaethung hae.
31 Ahithofel tuh aruh lante khuakhantu hae kyakhe Absalom ryte a umkheih hae cipaw kha David kya a hopya hae. Te David nynh, “Pou Bawipaw , Ahithofel nynh a pyapaw tuanaw kha ngaeenaw lang tangsah tua, cite na kalan saw ka sang,” a ci.
David kya-e Dophitu Hushai
32 David tuh Pachia a beiknaw hae mua dung kya he a thua tuh, Arkhi phin athuapaw Hushai tuh a angkile seiikute, a lu kya laephi phingkute David kha tungku khylan yn cceih.
33 David nynh, “Nang tuh ka kya na cciabua ze, ka hanlan phupaw ripaw lang na tang cih.
34 Thuasalama khua lungkhu lang na cceih zah Absalom kha, ‘Pou siapharan, na ryalahtu lang ka tang cih; langmawlya na paaw ryalahtu lang ka la tang hawte, atu tuh na ryalahtu lang ka tang vae cih,’ cite na hopya lanze, Ahithofel nynh a pyapaw tuanaw kha nae taepah kho cih.
35 Ranpibawi Zadok te Abiathar tuh khua lungkhu kya nang ryte a um hae. Tukeiccuze siapharan inn e na thaepaw miakaw kha ranpibawi Zadok te Abiathar kha hopah hae.
36 Mih ccapaw hae lu ning, Zadok ccapaw Ahimaaz te Abiathar ccapaw Jonathan tuh minmin ryte a umkheih hae; na thaepaw miakaw kha minmin kyate nae thaesah cih,” a cipya.
37 Tukeiccuze Absalom nynh Jerusalem lang he a tee lyakhe, David banpaw Hushai tuh khua lungkhu lang a tee.