14
Jerusalem lang Absalom A Ki
1 Siapharan thinlung tuh Absalom kya nynh a um cipaw kha Zeruiah ccapaw Joab nynh a ny.
2 Joab nynh Tekoa lang ccungccaw saw zah ahawpaw nopinung kha a kosah. Joab nynh nopinung kha, “Michi elang a ngaethahpaw hawte umsaku nyn tua; chitui thuhku leite michi chi lya lawkupaw boeining kha lawkuh lah, michi elang khaw cia a rah vae paw nopinung hawte umsaku tua.
3 Siapharan kalan cceih lah, hynhte na hopah cih,” a cipya. Te a ho lanpaw bya kha Joab nynh a hopya.
4 Tekoa khua e nopinung nynh siapharan kalan he a thua te, laekhu kya bakhungte sawtuanaw pya zah, “Pou siapharan, beih yn bawmtua!” a cipya.
5 Siapharan nynh, “Pawmou na vawsaw?” cite a khia. Nopinung nynh, “Thanccingte, kae tuh nomaenung nynh ka thua; ka vawpaw nynh yn chitaw vae.
6 Na ryalahtunung nynh ccapaw lu ning ka hoi zah ramkaw kya a ziakuh hae; a phiatu lu kheit san a um khyh keiccuze lu kheit nynh lu kheit kha zia zah phe a chia.
7 Atu tuh ka puizia hae balyn nynh na ryalahtunung hynh yn thonuakuh hae zah, ‘A unopaw a theihtupaw kha oun pya, a unopaw hiinnaw kha a chia keiccuze amaw kha kae theihru cih, a rho kha heize kae roh cih,’ a ci hae. Tuhcite a laehy ungpaw ka maee-e ccangkheit kha minmin nynh a the cih hae zah, ka vawpaw hanlan min thuasah, a laehypaw kha thuasah laephi vawlan te a zosah vae cih hae,” a cipya.
8 Tetuh siapharan nynh nopinung kha, “Na inn lang la cceih, nang te asekuh lante kaw ka tho cih,” a cipya.
9 Tekoa khua e nopinung nynh siapharan kha, “Siapharan ka bawipaw, seinaw tuh kae te ka paaw ciihan kya ccah vae sah; siapharan te a bawitungkhung kya seinaw um nan sah,” a cipya.
10 Siapharan nynh, “Lukhakheit nynh hankhakheit ae hopya ze, ka kalan yn ko lah, aning nynh nang kha bua ae ty vae lan khyh,” a cipya.
11 Te nopinung nynh, “Chiise phulahtu nynh a chia vae khyh nawlan te ka ccapaw tuh chia athua khyh nawlan, siapharan nynh Bawipaw na Pachia kha na lung kya beih ccyke tua,” a cipya. Siapharan nynh, “Bawipaw tuh a hiin thyhte, na ccapaw sangrua ccangkheit sanmah laekhu lang khuakuh lan khyh,” a cipya.
12 Te nopinung nynh, “Na ryalahtunung nynh siapharan ka bawipaw kha bya kaw kheit beih kae hopya tua sah,” cipah zah, aning nynh, “Hotua,” a cipya.
13 Nopinung nynh, “Athua lanze, Pachia ccungccaw hae kha rawsete hynhcihawpaw uccaw hynh pawccemou na paccyn? Pawccecize siapharan nynh hynh-e byapaenaw a raenaw kyahin, siapharan nynh a deepaw lu kheit kha inn lang bua a kisah khyh keiccuze amaw toulou kha bya a piaku vae.
14 Aening balyn tuh ah chih cih oh; laekhu kya tui alaekuhpaw suelua kho leipaw te nynh ah aloku oh. Thuasalama Pachia nynh ccungccaw hiinnaw kha ccaring lah lan khyh; dee vae paw ccungccaw kha Pachia nynh a muihnaw kyate zungzae dee athua khyh nawlan a paccyn mamin cih.
15 Ccungccaw hae nynh ka thin yn phangsah hae keiccuze e hynh siapharan ka bawipaw kha hopya lan kae cceih; na ryalahtunung nynh, ‘Siapharan kha ka hopah cih; a ryalahtunung nynh ka ngiapaw hynh siapharan nynh poh yn cyipah kho vosi.
16 Siapharan nynh a thae cih zah, Pachia rho lungkhu te kae te ka ccapaw parouh mawte oun roh cih paw ccungccapaw kuih kyate a ryalahtunung hynh yn luesah cih,’ cite a tua.
17 Na ryalahtunung nynh, ‘Siapharan ka bawipaw bya nynh kae kha ngaengannaw yn pya cih,’ a ci; siapharan ka bawipaw tuh Pachia vaawpaw hawte athya te ahoy phiathyanaw a hoi. Bawipaw na Pachia tuh na kya um vae sah!” a cipya.Ref 14.17: 2Sa 19.27
18 Tetuh siapharan nynh nopinung kha, “Nang kae khiapaw bya miakaw hynh yn phei nan,” a cipya. Nopinung nynh, “Siapharan ka bawipaw, yn hotua,” a cipya.
19 Siapharan nynh, “E konglang balyn kyahin Joab nynh tuanaw ae pya tou?” cite a khia. Nopinung nynh, “Siapharan ka bawipaw, nang tuh na hiin thyhte, siapharan ka bawipaw nynh na ho vae paw bya miakaw kha lukhakheit nynh voilang thuasah, ranglang thuasah mae kho lan khyh. Kaw yn pyatu tuh na ryalahtu Joab nynh thua; aning nynh e bya balyn hynh na ryalahtunung kha yn hopah.
20 Uccaw acyikuzia hynh paleih khylan na ryalahtu Joab nynh e hynh a cyih. Thuasalama ka bawipaw tuh laephi vawlan a umpaw uccaw balyn kha ny nawlan Pachia vaawpaw kya-e hawnaw alopaw hawnaw kha na hoi,” a cipya.
21 Tetuh siapharan nynh Joab kha, “Myarya hoy, e hynh ka ua; cceih lah, ccangvaepaw Absalom kha yn kikhae,” a cipya.
22 Joab tuh laekhu kya bakhung zah sawtuanaw pyate siapharan kha hythua a pya; te Joab nynh, “Siapharan ka bawipaw, na ryalahtupaw nynh kae ngiapaw kha siapharan nynh nae ua keiccuze na malang maehoynaw ka mue vae cipaw kha na ryalahtupaw nynh atunin ka ny,” a cipya.
23 Tukeiccuze Joab tuh thokuh zah Geshur lang cceih zah Absalom kha Jerusalem lang a hoei.
24 Siapharan nynh, “Amaw inn lang cceih sah; ka umnaw lang yn cceih nan sah,” a ci. Tukeiccuze Absalom tuh amaw inn lang cceih zah siapharan a umnaw lang cceih khyh.
David nynh Absalom A Ngaethya
25 Israel hae balyn kya Absalom hawte a puithyanaw kya thehoysah lanpaw lu kheit san um khyh. A ccuphe kyate a lu kya-e bawilukhung kyacia ccaenaw um khyh.
26 A sang a ngoku vae ze, a sang kha tounawpaw te leih tou zah siapharan kya-e tounawpaw te shekel za ning acih, (kum takyh kum thang khe leih a ngokuh; a sang eih ari vae ze leih a ngokuh).
27 Absalom nynh ccapaw lu thum te a min Tamar cikuhpaw ccanung lu kheit a saah; aning tuh myarya puithyapaw nopi nynh thua.
28 Tukeiccuze Absalom tuh Jerusalem kya siapharan a umnaw lang thua leite kum ning phe ccing lan a um.
29 Siapharan kalan yn saw ccaw cite Absalom nynh Joab kalan ccungccaw saw zah, Joab tuh yn thua khyh. Vae ningnaw ccungccaw saw zahmah yn thua lae khyh.
30 Tetuh Absalom nynh a ryalahtu hae kha, “Dotua oh, Joab loo tuh ka loo pe um zah barli a hoi; la cceih oh lah, maee te la soi oh,” a cipya hae. Tukeiccuze Absalom a ryalahtu hae nynh a loo kha maee te a soi hae.
31 Joab nynh thokuh zah Absalom kha a inn lang ccianua zah, “Pawccemou na ryalahtu hae nynh ka loo kha maee yn soipya hae?” a cipya.
32 Absalom nynh Joab kha, “Dotua, nang kha bya kae taw zah: Hynhlang yn cciatua, ‘Pawccemou Geshur kyate kae ccia? Khuing kya maw po ka la um ze kamaw elang ahoyhua,’ cite byakhia khylan siapharan kalan kae saw cih, kae cipya. Atu siapharan a umnaw lang yn cciasah; ka cyiseinaw a um ze, yn theih sah!” a cipya.
33 Joab nynh siapharan kalan cceih zah a hopya; te siapharan nynh Absalom kha a ko. Te siapharan kalan cceih zah siapharan malang laekhu khe a bakhung; te siapharan nynh Absalom kha a myng.