13
Amnon te Tamar
1 Ccyh tuh sya aro vae. David ccapaw Absalom nynh Tamar cikuhpaw apuithyapaw ccianung lu kheit a hoi; David ccapaw Amnon nynh Tamar kha a sungsah.
2 Amnon tuh a ccianung Tamar keiccuze a lungria myarya thae zah amaw te amaw kha a ccisaku, pawccecize aning tuh liaccady thua zah a tungvaw hankhakheit cyi lanpaw kha Amnon elang thua kho khyh.
3 Amnon nynh Jonadab cikuhpaw ruiban lu kheit hoi zah, aning tuh David a upaw Shimeah ccapaw nynh thua; Jonadab tuh myarya athyaruhpaw ccungccaw nynh thua.
4 Aning nynh Amnon kha, “Pou siapharan ccapaw, pawccemou nin kheit koute nin kheit na mitsung houhouh khu? Nae hopah lan khyh tou?” a cipya. Amnon nynh, “Ka neitaw Absalom ccianung Tamar kha ka sungsah,” a cipya.
5 Jonadab nynh amaw kha, “Na ikhung kya huekuh lah, ccisakuh nyn; na paaw nynh nang do lan he yn thua te, ‘Ka ccianung Tamar kha ka kalan yn cceih sah lah, ae lanpaw looh yn pya sah, aepaw yn hyngpyapaw kha ka muih zah a kuih kya-e kha ka ae ccaw, ka muihnaw kyahin aepaw yn paccynpah sah,’ cite na hopah cih,” a cipya.
6 Tukeiccuze Amnon tuh huekuh zah a ccisaku nyn; siapharan nynh Amnon kha do lan he yn thua tuh, Amnon nynh siapharan kha, “Ka ccianung Tamar kha beih yn cceih sah, a kuih kya-e kha ka ae ccaw, ka muihnaw kyahin sanlou phe ning kha beih yn raepah sah,” a cipya.
7 Te David nynh Tamar inn lang ccungccaw saw zah, “Na raeepaw Amnon inn lang la cceih lah, aepaw la hynpah,” a cipya.
8 Tukeiccuze Tamar tuh a raeepaw Amnon inn lang cceih zah Amnon tuh a la huekuh. Tamar nynh vaekhui kha lah zah a non koute a muihnaw khe sanlou lang rae zah a rua.
9 Te talyng-ang kha lah zah Amnon malang khe a nungpya, thuasalama ae lan a mya. Amnon nynh, “Ka kyate ccungccaw miakaw pou hae sah,” a ci. Tukeiccuze a kyate ccungccaw miakaw a pou hae.
10 Tetuh Amnon nynh Tamar kha, “Na kuih kya-e kha ka ae ccaw, looh kha akhaan lungkhu lang yn ccyng,” a cipya. Tukeiccuze Tamar nynh a raepyapaw sanlou kha lah zah a raeepaw Amnon kalan akhaan lungkhu lang a teekhae.
11 A ae ccaw cite a kalan he a naekuh tuh, Amnon nynh Tamar kha kyng zah, “Rang, ka kya yn itua, ka ccianung,” a cipya.
12 Tamar nynh, “Thua khyh, ka raeepaw, yn nangse nan; pawccecize hynhcihawpaw hynh Israel hae kya cyih boi khyh hae; e anungsikuhpaw hynh cyih nan!
13 Kae ka hanlan te, ka maethyanaw hynh teilangmou ka cciakhae kho cih? Te namaw hanlan te mah, Israel hae kya a ccouseikuhpaw lu kheit hawte na thua cih. Tukeiccuze siapharan kha hopya tua cite kae ngia; pawccecize nang te umkheih lanpaw hynh yn khee lan khyh,” a cipya.
14 Thuasalama Amnon nynh ngaepah khyh; aning tuh Tamar laeze a thawsaehua keiccuze kyngde zah a ikhae.
15 Te Amnon nynh Tamar tuh myaryamaw bua a hua; langmawlya a la sungsahnaw laeze a huanaw tuh alehua vae. Amnon nynh amaw kha, “Thokuh lah cceih ccavae!” a cipya.
16 Thuasalama Tamar nynh amaw kha, “Thua khyh, ka raeepaw; kae nae deepaw hynh-e cyiseinaw hynh ka tungvaw kya ccangpaw na cyipaw laeze alehua,” a cipya. Thuasalama Amnon nynh ngaepah khyh.
17 A ryalahpaw ccangvaepaw kha ko zah, “E nopinung hynh ka malang te pousah lah, thuakaw kha tou,” a cipya.
18 (Aning nynh angkiccua kuihsae kha a kiku; pawccecize langmaw lyaze siapharan ccanung liaccady hae nynh tuhcite leih a kiku hae.) Tukeiccuze a ryalahtupaw nynh amaw kha a pousah koute thuakaw kha a tou.
19 Te Tamar nynh a lu vawlan buhhaw phingkuh zah a kikupaw angkiccua kha a seii; a lu vawlan a kuih khang zah a cceih, a cceih lalia lante thawte a siabia.
20 A raeepaw Absalom nynh amaw kha, “Na raeepaw Amnon nynh ae ikhae vosi? Ka ccianung, daebabi lan zya um vae ii; aning tuh na raeepaw nynh thua; e hynh na thinlung kya ccyke nan,” a cipya. Tukeiccuze Tamar tuh a raeepaw Absalom inn khe daebabi lan lanmete zya a um.
21 E kong balyn hynh David Siapharan nynh he a thae tuh, myarya a thinria, thuasalama a ccapaw Amnon tuh a ccatawccaw athua keiccuze myarya sungsah zah detah khyh.
22 Thuasalama Absalom nynh Amnon kya bya hoypaw thuasah, bya thahpaw thuasah ho khyh; pawccecize Amnon nynh a ccianung Tamar kha a ikhaede keiccuze Absalom nynh Amnon kha a hua.
Absalom nynh Amnon A Liaru
23 Kum ning accing koute, Efraim khua pe umpaw Baal-hazor kyakhe Absalom nynh tuuming ngo poi kha tua zah siapharan ccapaw hae balyn kha a ko hae.
24 Absalom nynh siapharan kalan cceih zah, “Na ryalahtupaw nynh tuuming ngo poi kha ka tua; siapharan te na ryalahtu hae nynh ka kalan beih oun cceih oh,” a cipya.
25 Siapharan nynh Absalom kha, “Thua khyh, ka ccapaw, kae balynte kae cceih nan sah, na hanlan phupaw ripaw lang kae tangsei cih,” a cipya. Absalom nynh palei a soihbia, siapharan nynh a ccia khyh zemah hythuanaw tuh a pya.
26 Te Absalom nynh, “Namaw na thua khyh ze, ka unopaw Amnon tuh yn cceih sah,” a cipya. Siapharan nynh, “Pawccemou aning tuh na kalan yn cceih cih?” a cipya.
27 Thuasalama Amnon te siapharan ccapaw hae balyn tuh a kalan a cciasah makhia hae, Absalom nynh siapharan kha a soihbia. Absalom nynh siapharan poi hawte a paccyn.
28 Te Absalom nynh a ryalahtu hae kha, “Amnon tuh misutui neih zah a lung he yn paw te, phang ngaw oh lah, kae nynh, ‘Amnon kha theih oh,’ cite he kae hopah oh te, aning kha na theih cih oh. Rih nan oh; kamaw ccaccei nynh kaw kae pya oh paw thua khyh tou? Nae rawthung sah lah, nae rawhoy sah,” cite kaw a pya hae.
29 Tukeiccuze Absalom nynh kaw a pya hae thyhte, Absalom a ryalahtu hae nynh a cyi hae. Tetuh siapharan ccapaw hae balyn tuh thokuh hae zah mih lann raveih kha ccikute a ccue hae.
30 Laanryng a um lya hae khe, Absalom nynh siapharan ccapaw hae balyn kha pong a chia hae, lu kheit san hiin khyh hae, cite David kha a thaesah hae.
31 Siapharan tuh thokuh zah a boeining seiikute laekhu kya a huekuh; a ryalahtu hae balyn tuh mih boeining seiikute a pe a thadyn hae.
32 David a upaw Shimeah ccapaw Jonadab nynh, “Siapharan ccapaw hae ccangvae hae balyn kha a chia hae, cite ka bawipaw nynh tua nan; Amnon makhae nynh a chih. Amnon nynh a ccianung Tamar kha a ikhaede nin kyate e ryalaw hynh Absalom nynh a paccynku vae paw nynh thua.
33 Tukeiccuze siapharan ccapaw hae balyn tuh a chih vae hae cite siapharan ka bawipaw nynh na thinlung kya tua nan; pawccecize Amnon makhae nynh a chih,” a cipya.
34 Absalom tuh a ccue. Rhawviatu ccangvaepaw nynh ngawdo zah, mua zong e Horonaim laanpi kya ccungccaw patae oun cceih hae paw kha a muih.
35 Jonadab nynh siapharan kha, “Dotua, siapharan ccapaw hae oun cceih vae hae; na ryalahtupaw nynh ka ho hawte, akyh vae,” a cipya.
36 Te he a ho koute, siapharan ccapaw hae tuh oun thua hae zah mih roisawte a rah hae; siapharan te a ryalahtu hae balyn mah thawmawte a rah hae.
37 Absalom tuh ccue zah, Geshur siapharan Ammihud ccapaw Talmai kalan a cceih. David tuh a ccapaw elang nin takyh a rah.Ref 13.37: 2Sa 3.3
38 Absalom tuh Geshur lang ccue zah kum thum a um.
39 David siapharan tuh Amnon a chinaw konglang te lungtangnaw a hoi vae keiccuze a lungdae vae zah Absalom kha a ngae.