11
David te Bathsheba
Hawnin yn thua zah siapharan hae nynh rhawtuknaw lang ccia ccyh he yn thua tuh, David nynh Joab te a kuihkaw e bawi hae te Israel hae balyn kha a saw hae; minmin nynh Ammon hae kha roh hae zah Rabbah khua kha a koihlu hae. Thuasalama David tuh Jerusalem khua kya a um.Ref 11.1: 1Sh 20.1
Nin kheit tuh zetesang khe David nynh a ikhung kyate thokuh zah siapharan inn innccuvaw kya a ccia bungthung lyakhe, tui singkuhpaw nopinung lu kheit kha innccuvaw kyate a muih; tuh-e nopinung tuh myarya a puithya. David nynh tuh-e nopinung kong khiatua khylan ccungccaw saw zah, “Eliam ccanung Bathsheba, Hit minphuinpaw Uriah zu nynh thua,” cite a hopya. David nynh tuh-e nopinung kha ko khylan locceihtu hae kha a saw hae, te a kalan yn thua zah amaw nynh a ikhae. (Aning tuh nopiny a nyh koute a ccikanku lya nynh thua.) Tukoute nopinung tuh a inn lang a ki. Tuh-e nopinung tuh ccaaw a poi; te David kalan ccungccaw saw zah, “Ccaaw ka hoi,” cite bya a taw.
Tukeiccuze David nynh Joab kha byataw zah, “Hit minphuinpaw Uriah kha ka kalan yn saw,” a cipya. Te Joab nynh Uriah kha David kalan a saw. Uriah he yn thua tuh, David nynh Joab te ccungccaw hae konglang te rhawtuk konglang kha a khia. Te David nynh Uriah kha, “Na inn lang la cceih lah na ccu la singkuh,” a cipya. Uriah tuh siapharan inn kyate pou zah, a nulang te siapharan nynh lasung a pyasah hae. Thuasalama Uriah tuh a inn lang ki leite a bawipaw a ryalahtu hae balyn ryte siapharan inn thuakaw kyakhe a ryabua. 10 “Uriah tuh a inn lang cceih khyh,” cite David kha he a hopah hae tuh, David nynh Uriah kha, “Pawccemou na inn lang na ccia khyh? Khuaccongnaw langte khaw nae thua?” a cipya. 11 Uriah nynh David kha, “Byakin thingkua te Israel hae te Judah hae tuh bu kya nynh a um hae; ka bawipaw Joab te ka bawipaw ryalahtu hae tuh ramkaw kya nynh a rya hae; kae tuh ae lan nia lan te ka zu ryte ikheih khylan ka inn lang ka cceih cih zawtou? Nang tuh na hiin thyhte, na hiinnaw mah a hiin thyhte, tuhcihawpaw tuh ka cyih lan khyh,” a cipya. 12 Te David nynh Uriah kha, “Atunin mah hein kya um hin, awkhualan kae cciasah cih,” a cipya. Tukeiccuze Uriah tuh tuin nin khe Jerusalem kya a um. Awkhualan tuh, 13 David nynh ae khylan te nia khylan a kalan ko zah a ruisah; zete tuh a bawipaw ryalahtu hae ryte ryakheih khylan a pou, thuasalama a inn lang tuh cceih khyh.
David te Uriah
14 Awkhualan awkhua tuh David nynh Joab kalan ccaw zei zah Uriah kuih kyate a ky. 15 Ccaw kyakhe, “Uriah hynh rhawtuk aso huanaw malang kou khe nung lah, amaw kha tuk hae zah a chi ccaw, nulang na kitaw cih,” cite a zei. 16 Joab nynh khuapi a koihlu lyakhe, mih rawthung hae paw a umnaw hae hmin cite a nynaw kyakhe Uriah kha a nung. 17 Tuh-e khuapi kya-e ccungccaw hae tuh oun pou hae zah Joab te a tukkuh hae; tuh-e hae kya-e David a ryalahtu hae abang tuh a chih hae. Hit minphuinpaw Uriah mah a chihbua. 18 Te Joab nynh ccungccaw saw zah rhawtuknaw konglang thongpang balyn kha David kalan a thaesah; 19 tuh-e locceihtupaw kyakhe, “Rhawtuknaw konglang thongpang balyn kha siapharan kya he na hopah koute, 20 siapharan tuh a thinria zah nang kha, ‘Pawccemou khuapi kalan thawte na naeku oh? Khualungrua kyate oun kaw cih hae cipaw na nyh khyh oh tou? 21 Jerusbbaal ccapaw Abimelek kha hum nynh mou a theih? Nopinung lu kheit nynh sungmia-lung avawlan e khate khualungrua kyate sawphu zah Thebez khua kya chih khyh tou? Pawccemou khualungrua kalan thawte na naeku oh?’ ae cipya ze, nang nynh, ‘Na ryalahtupaw Hit minphuinpaw Uriah mah a chih,’ cite na la hopah cih,” a cipya.Ref 11.21: Bpt 9.53
22 Tukeiccuze locceihtupaw tuh cceih zah Joab nynh ho lan a tawpaw bya balyn kha David kya a hopya. 23 Locceihtupaw nynh David kha, “Rhaw hae nynh oun tae hae zah, ramkaw khe oun pounua hae; thuasalama khua koikua teenaw kyacia bua kae dee hae. 24 Tetuh thekawthya hae paw nynh na ryalahtupaw kha khualungrua kyate a kaw hae; siapharan na ryalahtu hae abang tuh a chih hae; te na ryalahtupaw, Hit minphuinpaw Uriah mah a chihbua,” a cipya. 25 David nynh locceihtupaw kha, “Joab kyakhe, ‘E uccaw keiccuze na lungriathae nan sah, pawccecize thaloi nynh tuh atu lu kheit, tukoute lu kheit cite chia phungpaw nynh thua; khuapi kha thawte tuk oh lah, roh oh,’ a ci cite thawpyanaw bya na la hopah cih,” a cipya.
26 Uriah zu nynh a vawpaw a chih vae cipaw kha he a nyh tuh, rawkhuite a um. 27 He a rah koute, David nynh ccungccaw sawte a inn lang kosah hae zah a zu lang a tang, te ccapaw lu kheit a saahpya. Thuasalama David a cyisahnaw nynh Bawipaw kha a lunghoysah khyh.