9
Siapharan lang Saul Ponaw
Benjamin phin, a min Kish cikuhpaw mihoipaw lu kheit a um; Kish tuh Abiel ccapaw, Abiel tuh Zeror ccapaw, Zeror tuh Bekorath ccapaw, Bekorath tuh Afiah ccapaw nynh thua. Kish nynh a min Saul cikuhpaw ccapaw lu kheit a hoi, aning tuh apuithyapaw ccangvae nynh thua. Israel ccungccaw hae laku kya aning laeze a puithyapaw pise um khyh; aning tuh ming hae laeze a lu te a raw ahanghua.
Saul a paaw Kish kya-e lann hae tuh a zo hae. Tukeiccuze Kish nynh a ccapaw Saul kha, “Mikung lu kheit hoeikute cceih lah, lann hae kha la ccungtua,” a cipya. Minmin nynh Efraim muaram te Shalishah ram kya po lekuh lan a ccung hae zemah muih khyh hae. Te Shaalim ram kya po lekuh lan a ccung hae zemah, tuin ram kya mah muih khyh hae. Te Benjamin pee kya po lekuh lan a ccung hae zemah muih khyh hae.
Zuf pee kya he a thua hae tuh, Saul nynh a cceihkheih hae paw a mikungpaw kha, “Ki ccavae sih, tuhkhyhze tuh ka paaw nynh lann hae elang a thinphang leite aening elang a thinphangsei cih,” a cipya. Thuasalama a mikungpaw nynh, “E khua kya Pachia ccungccapaw lu kheit a um, aning tuh sawtuanaw a ccoupaw nynh thua. A hopaw bya miakaw tuh accing. Amaw kalan cciatua sih; ah zui lanpaw laanpi kong kha poh oun hopah kho,” a cipya. Saul nynh a mikungpaw kha, “Ah ccia lanze ccungccapaw kha pawmou ah ccyngpah cih? Pawccecize ah zaw lungkhu kya sanlou phe thang vae, Pachia ccungccapaw elang ccyngpya lanpaw lasung um khyh. Pawmou ah hoi?” a cipya. Mikungpaw nynh Saul kha, “Dotua, ngun shekel tamae ka hoi; ah laanpi oun hopya nawlan tuh-e tuh Pachia ccungccapaw ka pya cih,” a cipya. (Israel ram kya langmawlya tuh Pachia kha byakhia khylan a cceihpaw lukhakheit nynh, “Rang, muihtu kalan cceih sih,” cite leih a la ci; pawccecize atu profeh cikuhpaw hynh langmawlya tuh muihtu a la ci hae.) 10 Saul nynh a mikungpaw kha, “Ahoy; rang, cceih sih,” a cipya. Tetuh Pachia ccungccapaw a umnaw khua lang a cceih hae.
11 Khua kalan ccia lan sangpyng kya a kaethung lya hae khe tui the lan oun cceih hae paw liaccaw hae kha tungkuh hae zah, “E kya muihtu a um tou?” cite a khia hae. 12 Minmin nynh, “A um, nae malang khe mang um. Rangsakuh oh, atunin khuaccaaw hae nynh hminthyaa kya silawnaw rae lan a ci hae keiccuze khua lungkhu lang atasy mawkhe nynh a ccia. 13 Khua lungkhu lang he na tee takaw oh te, hminthyaa kalan ae lan a cciathung mawkhe amaw kha na la muih cih oh. Aning nynh silawnaw kha hythua a pya cih keiccuze aning a thua makhia ccungccaw hae nynh ae lan khyh hae; tukoute kopaw ccungccaw hae nynh a ae cih hae. Atu la cceihthung oh, amaw kha palou na la tungkuh cih oh,” a cipya hae. 14 Tukeiccuze khualae lang a cceihthung hae. Khualae he a tee hae tuh, hminthyaa kalan ccia khylan mih kalan yn cceihpaw Samuel kha a muih hae.
15 Saul yn thua maw nin khe, Bawipaw nynh Samuel kya phykuh zah: 16 “Awkhualan atu ccyh kya Benjamin pee kya-e ccungccapaw lu kheit kha na kalan kae saw cih zah, tuh-e paw kha ka ccungccaw Israel hae uktu lang chitui na thuh cih. Aning nynh ka ccungccaw hae kha Filistin hae kuih kyate a khum cih hae; pawccecize mih siaruanaw tuh ka kya yn thua zah ka ccungccaw hae teingnaw kha ka muih vae,” a ci. 17 Samuel nynh Saul kha he a muih te, Bawipaw nynh Samuel kha, “Kae hopyapaw ccungccapaw kha khah-e paw nynh thua. Aning nynh ka ccungccaw hae kha a uk cih hae,” a cipya. 18 Te Saul nynh Samuel kha koikua kalan khe naenuakuh zah, “Pawkyamou muihtupaw inn a um? Beih yn hopya tua,” a cipya. 19 Samuel nynh Saul kha, “Muihtupaw tuh kamaw nynh ka thua; hminthyaa kalan ka malang khe cceih, pawccecize atunin kae te looh aekheih lan, te awkhualan awkhua nang kha kae cciasah cih zah na thinlung kya umpaw balyn kha kae hopah cih. 20 Nin thum azo vae paw na lann hae kha tua nan vae hae, pawccecize phe muih vae hae. Te Israel hae balyn nynh hummou a ry hae? Nang te na minpaaw ccaawno hae kha thua khyh tou?” a cipya. 21 Saul nynh, “Kae tuh Israel phin hae kyaze adih huaccepaw Benjamin phinpaw ka thua khyh tou? Kae innbyn tuh Benjamin phin kya-e innbyn hae balyn kyaze anyaa huaccepaw nynh thua. Pawccemou tuhcite nae hopya?” a ci.
22 Tetuh Samuel nynh Saul te a mikungpaw kha cciakhae hae zah innkhaan lungkhu lang a teekhae hae, te a ko hae paw ccungccaw sung thum loukaw kyaze sawtua huanaw hmin kyakhe a haungsah hae. 23 Te Samuel nynh anghyngpaw kha, “Nang kae pyapaw, taekhiate kae nungsahpaw hanpaw kha yn lawtua,” a cipya. 24 Anghyngpaw nynh aphae te akyngkuhpaw kha lah zah Saul malang khe a nung. Samuel nynh, “Dotua, kae ccypyapaw tuh na malang nung athua vae. Aetua; pawccecize kopaw mikhia hae ryte na aekheih ccaw oh cite khah-e kha accyh khyapaw kya na malang nung athua vae,” a cipya.
Tuhcite tuin nin khe Saul tuh Samuel ryte a aekheih hae. 25 Minmin tuh hminthyaa kyate khua lungkhu lang he a cceih hae tuh, innccuvawnote9.25 innccuvaw: Tuh ccyh lya tuh innccuvaw kha abialae lante rae hae zah, tuin kyakhe ccungccaw hae tuh leih a ih hae. khe Saul elang inaw phaepah hae zah a ih. 26 Te khuadaetakaw khe Samuel nynh innccuvaw umpaw Saul kha ko zah, “Tho ccavae, kae saw cih,” a cipya. Saul tuh tho zah, Samuel ryte parouhte laanpi lang a cceih hae.
Samuel nynh Saul Chitui Thuh
27 Khuate lang he a thua hae te, Samuel nynh Saul kha, “Na mikungpaw kha ah malang a la ccia lalo nawlan hopah, aning po a cceih lalo koute, nang tuh hein kya sosoh umhy hin, Pachia bya kha kae nysah cih,” a cipya.