6
Israel lang Thingkua A Kikhae hae
Bawipaw thingkua tuh Filistin ram kya sawpaw sah sari a um. Te Filistin hae nynh ranpibawi hae te apawe hae paw kha ko hae zah, “Bawipaw thingkua hynh pawtemou kae cyih cih? A umnaw langkhe paw uccaw te mou kae kyde cih cipaw oun hopya tua oh,” a cipya hae. Minmin nynh, “Israel Pachia thingkua kha na ky oh ze, amaw makhaete ky nan oh, cyiseinaw silawnaw khate kisah oh. Tetuh nae ngedan cih zah shawkhaw na thua cih oh,” a ci hae. Te minmin nynh, “Amaw kae pyathui lanpaw cyiseinaw silawnaw tuh pawmou athua?” cite khia hae zah, minmin nynh, “Filistin bawi hae milu thyhte, sui te raepaw balyh azuh ccangpangaw te sui pazu ccangpangaw kha na pya cih oh; pawccecize nae balyn tungvaw te nae bawi hae balyn tungvaw kya a thuapaw shethya tuh alokuh. Tukeiccuze ram a rosahpaw nae balyh azuh hae te nae pazu azuh hae kha na rae cih oh zah, Israel Pachia kha phu-enaw na pya cih oh; naemaw te nae pachia hae te nae ram kya vawsawnaw pya leite poh ae um kho oh. Izip hae te Faro nynh mih lung a khungsahku hae hawte pawccemou nae lung na khungsakuh bua cih oh? Aning nynh minmin kha phe ccih lan de a tah kou hae te, minmin nynh Israel ccungccaw hae kha cciasah leite umlae khyh hae zah, minmin tuh a pou hae khaw? Tukeiccuze vaetuale thawpaw te matei zukuhpaw vaetua pinung, taphu khangkuh boi leipaw sa ning kha vaetuale taphu khang oh, mih taw hae kha tuh a pi te asawkunaw lang, inn lang cciakhae oh. Bawipaw thingkua kha lah oh lah, vaetuale vawlan khang oh, te cyiseinaw silawnaw lante na pyathui oh paw sui te raekuhpaw azuh hae kha tuh-e thingkua pe khe ccangpaw thingkua kyakhe nung oh. Te saw oh lah, cceih hae sah. Te dotua oh; amaw ram lang a cceihpaw laanpi Beth-shemesh khua langkhe a ccia zetuh, aening tungvaw kya hynh-e vawsawnaw lepaw a raetupaw tuh amaw nynh thua; thuasalama tuhte athua khyh zetuh, aening oun tuktupaw tuh aning kuih thua khyh, aening tungvaw acyihkuh seipaw nynh thua cipaw ny lan,” a ci hae.
10 Ccungccaw hae nynh tuhcite a cyi hae; matei zukuhpaw vaetua pinung sa ning kha vaetuale taphu khang hae zah, mih taw hae kha inn kya a khung hae. 11 Bawipaw thingkua ryte sui te raekuhpaw mih balyh azuh hae te sui pazu hae a nungnaw hae paw thingkua kha vaetuale vawlan a khang hae. 12 Vaetua hae tuh Beth-shemesh laanpi langkhe lawbabin lan sia biate a cceih hae; voilang ranglang maekuh khyh hae, Filistin bawi hae nynh Beth-shemesh ramri cia a zui hae.
13 Beth-shemesh khuaccaaw hae tuh accya kya mih chanvuih a rue cciamang hae. Ngawdo hae zah thingkua kha he a muih hae tuh, lungpawte a cciadue hae. 14 Vaetuale tuh Beth-shemesh khuapaw Joshua loo lungkhu lang tee zah tuin kya a thadyn. Tuin kya lungtungpi a um; vaetuale thingphe kha koi hae zah vaetua hae kha Bawipaw kalan maee-ute silawnaw lang a mang hae. 15 Levi phin hae nynh Bawipaw thingkua te a pe umpaw thingkua, sui uccaw hae a umnahpaw kha lah hae zah, lungtungpi vawlan a nung hae. Te Beth-shemesh khuaccaaw hae nynh maee-ute silawnaw kha rae hae zah, tuin nin khe Bawipaw kalan silawnaw a rae hae. 16 Filistin bawi lu pangaw hae nynh tuh-e tuh he a muih hae te, tuin nin khe Ekron khua lang a ki hae.
17 Filistin hae nynh Bawipaw kalan cyiseinaw silawnaw lang a pyathui hae paw sui balyh azuh hae tuh: Ashdod khua hanlan ccangkheit, Gaza khua hanlan ccangkheit, Ashkelon khua hanlan ccangkheit, Gath khua hanlan ccangkheit, Ekron khua hanlan ccangkheit nynh thua; 18 Filistin bawi hae nynh a uk hae paw khuapi hae balyn kha alung azya thyhte, akoihkuhpaw khuapi hae thuasah, akoihkuh leipaw khuapi hae thuasah sui pazu azuh hae kha a pya hae. A pe kya Bawipaw thingkua a nungnaw hae lungtungpi tuh Beth-shemesh khuapaw Joshua loo kya atunin cia ccaekia lang a um ung.
Kiriath-jearim kya Thingkua
19 Bawipaw nynh Beth-shemesh khuaccaaw hae abang, sung sari kha a chia hae, pawccecize minmin nynh Bawipaw thingkua kha a do hae, Bawipaw nynh minmin kha patae a chia hae keiccuze ccungccaw hae tuh rawkhuite a um hae. 20 Te Beth-shemesh khuaccaaw hae nynh, “E athyaapaw Pachia, Bawipaw malang hummou a thadyn kho cih? Aening kya a um khyh nawlan hum kalan mou a cceih cih?” a ci hae. 21 Tukeiccuze minmin nynh Kiriath-jearim khuaccaaw hae kalan khe locceihtu hae kha saw hae zah, “Filistin hae nynh Bawipaw thingkua kha bua oun ky vae hae. Oun cceih oh lah, lawkuh oh,” a cipya hae.