30
Ziklag Rohtu David Phulaw hae
1 David te a ccungccaw hae tuh nin thumnaw nin kya Ziklag khua he a thua hae te, Amalek hae nynh Negeb te Ziklag kha a la thiing hae. Ziklag khua kha tuk hae zah maee te a soi hae,
2 nopi hae te khua kya um hae paw balyn kha adih ale marya a kyng hae; lu kheit sanmah chia leite marya a cciakhae hae.
3 David te a ccungccaw hae nynh khua kya he a thua hae tuh, khua kha maee te marya la soi hae zah, mih zu hae, mih ccapaw hae te mih ccanung hae tuh kyngte marya a la cciakhae hae paw kha a muih hae.
4 Tetuh David te a umkheih hae paw tuh thawte sia hae zah, rawnawpaw thawzung phe thang lan ciate a rah hae.
5 David zu hae lu ning, Jezreel khuanung Ahinoam te Nabal nynh a chitawpaw nomaenung, Karmel khuanung Abigail kha mah kyngte a cciakhae hae.Ref 30.5: 1Sa 25.42-43
6 David tuh myaryamaw a lungriathae; pawccecize ccungccaw balyn tuh mih ccapaw hae te mih ccanung hae elang myarya mih ngaethya keiccuze David kha lung te deih lan cite a hoku hae. Thuasalama David nynh Bawipaw a Pachia kyakhe thawzung a lawku.
7 David nynh Ahimelek ccapaw ranpibawi Abiathar kyakhe, “Ranpibawi angki kha yn pyatua,” a cipya. Tukeiccuze Abiathar nynh ranpibawi angki kha David kalan a ccyng.Ref 30.7: 1Sa 22.20-23
8 David nynh Bawipaw kha khia zah, “E aphu hae hynh ka deehui cih hae tou? Ka phah cih hae tou?” a cipya. Aning nynh, “Deehui hae; solei na phah cih hae zah solei na luesah cih hae,” a cipya.
9 Tukeiccuze David te a kya um hae paw za taruh tuh cceih hae zah Besor Vaw kya a thua hae, tuin kyakhe abang kha a cciataw hae.
10 David te a ccungccaw hae za pali nynh po a deehui hae; thuasalama Besor Vaw zua lan myaryasankae mih thawbang vae hae paw za ning tuh nulang a um hae.
11 Ramkaw khe Izip paw lu kheit kha muih hae zah David kalan a cciakhae hae. Sanlou kha pya hae zah a ae, nia lanpaw tui kha mah a pya hae;
12 thaeku thae sanlou apaekua te misu thae aroupaw nge ning kha mah a pya hae. He a ae kou tuh, a thaw yn umthui; pawccecize nin thum te zi thum lungkhu sanlou ae lei, tui mah nia leite a la um.
13 Te David nynh amaw kha, “Nang hynh hum ccungccaw mou na thua? Tei kyate mou nae thua?” cite a khia. Aning nynh, “Kae tuh Izip ccangvaepaw ka thua zah Amalek ccungccapaw kya ryalahpaw nynh ka thua. Anuhlang nin thum lyakhe ka cci keiccuze ka bawipaw nynh nulang phe yn cciataw.
14 Khereth hae kya-e Negeb, Judah ram kya-e Negeb te Kaleb ram kya-e Negeb kha kae thiing hae zah, Ziklag khua kha maee te kae soi,” a ci.
15 David nynh amaw kha, “Tuh-e ccungccaw thiingtu hae paw aphu kalan tuh nae cciakhae cih tou?” a cipya. Aning nynh, “Kae theih lan khyh, na bawipaw kuih kalan mah kae pya lan khyh, cite Pachia min phyate bya nae kinpyaku zetuh, mih kalan kae cciakhae bung cih,” a cipya.
16 Aning nynh David tuh cciakhae bung zah, tuh-e hae tuh Filistin hae ram te Judah ram kya-e myarya lungpaw luadepaw uccaw hae keiccuze ae hae, neih hae, lawbia hae zah hmin takyh kyakhe pong a pazaekuh hae.
17 David nynh zetepakaw te awkhualan zete cia minmin kha a tuk hae. Kalauh ccikuh hae zah a ccue hae paw ccangvae hae za pali holeite lu kheit sanmah lue khyh hae.
18 Amalek hae nynh a cciakhae hae paw balyn kha David nynh bua a muethui. David nynh a zu hae lu ning kha a luesah hae.
19 Ccungccaw adih ale, ccanung ccapaw hae, luadepaw uccaw hae te a law hae paw uccaw miakaw kha pawpaw mah zo khyh; David nynh atyn-are kha bua a kikhae.
20 Ccangpaw sahiin hae malang a dee hae paw tuuphu hae te vaetua phu hae balyn kha David nynh a kyng hae; ccungccaw hae nynh, “E hynh David kya-e luadepaw uccaw,” a ci hae.
21 Myaryasankae bang hae zah David nulang zuiku kho leite Besor Vaw kya a cciataw hae paw ccungccaw za ning kyakhe David tuh a thua. Minmin nynh David te a kya um hae paw kha tungku khylan a cceih hae; David nynh tuh-e hae pe a thua te, minmin kha bya a beih hae.
22 David kya a zuikuh hae paw ccungccaw hoylei hae paw te ccungkia lei hae paw balyn nynh, “Minmin tuh aening kya a cciabua khyh hae keiccuze bua ah muethui oh paw luadepaw uccaw hae hynh pawpaw mah pyabua lei lan hae, mih zu hae te mih ccaaw hae raveih kha kokuh hae sah lah, cceih hae sah,” a ci hae.
23 Thuasalama David nynh, “Ka u te ka neitaw hae, Bawipaw nynh aening oun pyapaw uccaw kong kya tuhcite na cyih lan khyh oh; aning nynh oun khynsah zah oun thiingtu hae phu kha aening kuih kya oun pya vae.
24 E kong kyahin hum nynh mou nae bya kha ae ngaepah cih oh? Rhawtuknaw kalan a cceihpaw nynh a mue zeihte, uccawvaenia a ngawpaw nynh mah a muebua cih; phe ngankuh lante a neekuh cih hae,” a ci.
25 Tuin nin te vae tuh David nynh Israel hae elang phungbya te phungzae kha rae zah, atunin cia po atyn.
26 David nynh Ziklag khua kya he a thua te, luadepaw uccaw abang kha a ruiban hae, Judah piccan hae kalan ky hae zah, “Bawipaw a rhaw hae kya-e luadepaw uccaw lungkhu e nanning elang lasung nynh thua,” a cipya hae;
27 tuh-e tuh Bethel khua, Negeb kya-e Ramoth khua, Jattir khua,
28 Aroer khua, Sifmoth khua, Eshtemoa khua,
29 Rakal khua, Jerahmeel minphuin khua hae, Ken minphuin khua hae,
30 Hormah khua, Bor-ashan khua, Athak khua,
31 Hebron khua, David te a ccungccaw hae nynh khuaccongnaw khua hae balyn kalan khe a ky hae.