29
Filistin hae nynh David A Vua hae
Filistin hae nynh mih rhawkaw hae kha Afek khua kya a pum hae, Israel hae tuh Jezreel khua umpaw tuisung pe khe ryahmin a tahku hae. Filistin bawi hae tuh rhawkaw za kheit phu, thong kheit phu cite aphuphute a cceih hae, David te a ccungccaw hae tuh nulangte Akhish ryte a cceih hae. Filistin rhawbawi hae nynh, “E Hebru hae hynh hein kya pawmou a cyi hae?” cite khia hae zah, Akhish nynh Filistin rhawbawi hae kha, “E paw tuh Israel Siapharan Saul a ryalahtu David thua khyh tou? Ka kya nin patae te kum patae a um vae, ka kya yn thua takaw te atunin cia a cyiseinaw ccangkheit san ka muih khyh,” a cipya hae. Thuasalama Filistin rhawbawi hae tuh a tungvaw mih thinria; te Filistin rhawbawi hae nynh amaw kyakhe, “E paw hynh kisah tua, na pyapaw hmin lang la ki sah; tuhkhyhze tuh rhawtuknaw kya aening rhaw lang yn tangsei cih. Aning nynh a bawipaw kha bua ccawkuthui nawlan pawtemou a rae kho cih? Ah ccungccaw hae lu kha pyate ccawkuthuinaw kha rae lan khyh tou? Nopi hae nynh law biate hlaw liakuh hae zah,
‘Saul nynh athong thong te,
David nynh accong ccong te
a chia hae,’ cite
hlaw a sahpya hae paw kha
hynh-e David hynh thua khyh tou?” a cipya hae.Ref 29.5: 1Sa 18.7, 21.11
Te Akhish nynh David kha ko zah, “Bawipaw tuh a hiin thyhte, nang tuh a lungzipaw na thua zah rhawtuknaw kya kamaw ryte na ccia bungthungpaw hynh ahoy cite ka muih; pawccecize ka kya nae thua nin te atunin cia na cyiseinaw ccangkheit san ka muih khyh. Thuasalama Filistin bawi hae nynh tuh nang hynh mih nawccah khyh. Tukeiccuze atu la ki ccavae; lungdaete la cceih; Filistin bawi hae kha mih thinria nawlan pawpaw mah cyih nan,” a cipya. David nynh Akhish kha, “Kae nynh pawmou ka cyi? Siapharan ka bawipaw a rhaw hae kha ccianuate tuk lei lan ciate, na ryalaw kya ka tee takaw te atu cia, na ryalahtu tungvaw kya paw cyiseinaw mou na muih?” a cipya. Akhish nynh David kha, “Nang tuh ka muihnaw kya Pachia vaawpaw hawte ccaenaw um leipaw nynh na thua cipaw ka ny; thuasalama Filistin rhawbawi hae nynh, ‘Aning tuh kaening ryte rhawtuknaw lang cceihbua lan khyh,’ a ci hae. 10 Tukeiccuze nang tuh na kya a zuikuh bua hae paw na bawipaw Saul a see hae ryte awkhua takaw te thokuh oh lah, nang kae pyapaw hmin langkhe la cceih oh. The thyapaw kha na thinlung kya nung nan, pawccecize ka malang kou hoy lan rya na law vae. Awkhua takaw te thokuh oh lah, khua he adae takaw te la cceih ccavae oh,” a cipya hae. 11 Tukeiccuze David te a ccungccaw hae tuh Filistin hae ram lang ki khylan awkhua takaw te a thokuh hae. Thuasalama Filistin hae tuh Jezreel lang a cceihthung hae.