28
1 Tuh ccyh lyakhe Filistin hae nynh Israel hae kha tuk khylan mih rhawkaw hae kha a pum hae. Akhish nynh David kha, “Nang te na ccungccaw hae tuh kamaw ryte rhawkaw hae kya cciabua lanpaw kha solei la nykuh,” a cipya.
2 David nynh Akhish kha, “Myarya hoy, na ryalahtu nynh ka cyi khonaw kha na nyh cih,” a cipya. Akhish nynh David kha, “Myarya hoy, nang tuh na hiin lungkhu balyn ka pyn rhawviatu lang kae nung cih,” a cipya.
Saul nynh Chihiinleihthyapaw A Khia
3 Samuel tuh chih vae zah Israel hae balyn tuh rawkhuite um hae zah a khua Ramah khua khe a uu hae. Saul nynh chihiinleihthya hae paw te mitleihthya hae paw kha ram kyate khaleih a dee hae.Ref 28.3: Lev 20.27; Deu 18.10-11; 1Sa 25.1
4 Filistin hae tuh a sueluakuh hae, te cceih hae zah Shunem khua kya ryahmin a tahku hae. Saul nynh Israel hae balyn kha pum hae zah Gilboa khua kya ryahmin a tahku hae.
5 Saul nynh Filistin rhawkaw hae kha a muih hae tuh, rih zah myarya a thyngkuh.
6 Saul nynh Bawipaw kha he a khia tuh, Bawipaw nynh maan te thuasah, Urim te thuasah, profeh hae kyate thuasah khungru khyh.Ref 28.6: Nam 27.21
7 Tetuh Saul nynh a ryalahtu hae kyakhe, “Chihiinleihthyapaw nopi kha yn ccungpah oh, a kalan ka cceih cih zah ka khia cih,” a cipya hae. A ryalahtu hae nynh, “Endor khua kya lu kheit a um,” a cipya hae.
8 Te Saul tuh a boeining kha liakute ccangpaw boeining kha lawkuh zah pise hae lu ning ryte cceih hae zah khuazi khe tuh-e nopinung kya a thua hae. Saul nynh, “Chihiin yn leihpya tua, na kya a min kae hopyapaw muisaw kha yn kopya tua,” a cipya.
9 Nopinung nynh, “Chihiinleihthya hae paw te mitleihthya hae paw kha Saul nynh ram kyate a dee hae cipaw tuh hoyte phe na ny. Pawccemou kae hynh chisah khylan ka hiinnaw hynh kaang nae syakhaw?” a cipya.
10 Thuasalama Saul nynh amaw kha Bawipaw min phyate thyalawkute byakinpakuh zah, “Bawipaw tuh a hiin thyhte, e ryalaw keiccuze na tungvaw detahnaw ccah lan khyh,” a cipya.
11 Te nopinung nynh, “Hummou kae kopah cih?” cite khia zah, Saul nynh, “Samuel kha yn kopah,” cite a khung.
12 Nopinung nynh Samuel kha a muih tuh, thawte sia zah, “Pawccemou nae ling? Nang hynh Saul nynh na thua!” cite Saul kha a hopya.
13 Siapharan nynh amaw kha, “Rih nan, pawmou na muih?” a cipya. Nopinung nynh Saul kha, “Laephi kyate pachia yn poupaw kha ka muih,” a cipya.
14 Aning nynh nopinung kha, “A muinsan tuh pawtemou a um?” cite khia zah, nopinung nynh, “Paawpipaw lu kheit yn kaethung; angkiccua nynh a kiku,” a cipya. Te Saul nynh Samuel nynh thua cipaw nyh zah, laekhu kya bakhungte sawtuanaw a pya.
15 Te Samuel nynh Saul kha, “Pawccemou kae hynh pousahte kaccohkale nae nung?” a cipya. Saul nynh, “Myaryamaw ka lungriathae, pawccecize Filistin hae nynh yn tuk hae, Pachia tuh ccanglang yn hawitaw vae zah profeh hae kyate thuasah, maan kyate thuasah bya yn khung vae khyh; tukeiccuze pawmou ka cyih cih cipaw kha nae hopya ccaw cite nang kha kae ko,” a cipya.
16 Samuel nynh, “Nang kha Bawipaw nynh ccanglang ae hawitaw vae zah na rhaw lang a tang vae ze, pawccemou kae tuh nae khia ung?
17 Bawipaw nynh ka kyate a ho hawte na tungvaw a cyi vae; Bawipaw nynh peenaw kha na kuih kyate lah zah, na innpaw paw David kha a pya vae.Ref 28.17: 1Sa 15.28
18 Nang nynh Bawipaw bya kha na zui khyh zah, Amalek tungvaw myarya lepaw a thinrianaw kha na ccingsah khyh, tukeiccuze Bawipaw nynh hynh-e uccaw hynh na tungvaw kya atunin a cyi vae.Ref 28.18: 1Sa 15.3-9
19 Tuhpiaze Bawipaw nynh nang te Israel hae kha Filistin hae kuih kya ae pya cih oh; awkhualan khe nang te na ccapaw hae tuh kamaw ryte umkheih lan; Bawipaw nynh Israel rhawkaw hae kha mah Filistin hae kuih kalan a pya cih hae,” a cipya.
20 Vaekheitmawte Saul tuh laekhu kya tharae dyngkuh lan khuliakuh zah, Samuel bya keiccuze myarya a rih; anin ninlang te azi zidae pawpaw mah a ae khyh keiccuze thawzung hoi vae khyh.
21 Tuh-e nopinung nynh Saul kalan yn cceih zah, Saul tuh myarya a rikawthua cipaw he a muih tuh, a kyakhe, “Na seenung nynh na bya kha ka la ngae; ka chi ze ka chih cite nae hopyapaw kha ka ngae.
22 Tukeiccuze atu, nang nynh mah na seenung bya hynh beih ngaetua; na malang hin sanlou beihtaraw kae nungpah sah; he na cceih te na thaw a um ccaw, aetua,” a cipya.
23 Saul nynh phe mah zah, “Ka ae lan khyh,” a ci. Thuasalama a ryalahtupaw te nopinung nynh thawte soihbia hae zah mih bya kha a ngae. Tukeiccuze laekhu kyate thokuh zah ikhung vawlan a haung.
24 Tuh-e nopinung nynh a inn kya thobaleihpaw vaetuataw sa kheit hoi zah arangte a chia, vaekhui kha lah zah a nonde koute ransi phing leipaw sanlou lang a rae.
25 Tuh-e tuh Saul te a ryalahtu hae malang nungpah hae zah, minmin nynh a ae hae. Te thokuh hae zah tuh-e khuazi khe a cceih hae.