20
David te Jonathan Ruiban Tangnaw
David tuh Ramah khua pe e Naioth khua kyate a ccue, te Jonathan kya thua zah, “Pawmou ka cyi? Ka cyiseinaw pawmou a um? Na paaw nynh ka hiinnaw law lan a zuakupaw hynh a tungvaw pawmou ka sei?” a cipya. Jonathan nynh, “Tuh-e tuh cyihkuh nan sah! Na chih lan khyh. Ka paaw nynh byathan alepaw thuasah, adihpaw thuasah kae kha thaesah leite cyih boi khyh; pawccemou ka paaw nynh hynh-e hynh yn phei cih? Papin yn phei lan khyh!” a cipya. Thuasalama David nynh, “Kae nae sungsahnaw kha na paaw nynh nyh zah, ‘E hynh Jonathan nynh nyh nan sah, a ngaethah cih,’ cite a tua cih. Thuasalama thanccingte, Bawipaw tuh a hiin thyhte, nang mah na hiin thyhte, kae te chinaw laku kya ccu kaw kheit rou nynh a um,” cite thyalawkute a ho. Jonathan nynh David kha, “Na hopaw miakaw kha kae cyipah cih,” a cipya. David nynh Jonathan kha, “Awkhualan tuh sawpaw thawpaw thua vae zah, siapharan ryte zerya mangkheihnaw kya ka haung khyh ze thuathya khyh; thuasalama nin thumnaw nin zete cia ramkaw kya zya reku khylan ka la cceih cih.Ref 20.5: Nam 28.11 Na paaw nynh ka konglang yn la khia ze, ‘David tuh a khua Bethlehem lang ccia lan kae kha pekite yn ngiaku; pawccecize mih puizia hae balyn hanlan kum takyhte leih a rae hae paw silawnaw kha tuin khua kya a um,’ cite na la hopah cih. Na paaw nynh, ‘Ahoy!’ a ci ze, na ryalahtu ka hanlan ahoy cih; thuasalama a thinria ze, hoyleinaw rae lan a paccynkuh cipaw la nyh. Tukeiccuze na ryalahtupaw hynh thaw yn ccitua, pawccecize athyaapaw byakinnaw kha na ryalahtupaw tuh phe na raekhae vae. Thuasalama ka tungvaw cyiseinaw a um ze, namaw ccaccei nynh yn theih; pawccemou na paaw kalan tuh nae cciakhae cih?” a cipya. Jonathan nynh, “Tuh-e tuh na tungvaw cyihkuh nan sah! Na tungvaw kya hoyleinaw ccawsah lanpaw kha ka paaw nynh a paccyn cipaw ka ny ze, nang kha hopya leite kae um cih zawtou?” a cipya. 10 Te David nynh Jonathan kha, “Na paaw nynh byarepaw te ae khung ze, hum nynh mou kae kha yn hopah cih?” a cipya. 11 Jonathan nynh David kha, “Rang, ramkaw lang cceih sih,” a cipya. Tukeiccuze parouh mawte ramkaw lang a cceih hae.
12 Jonathan nynh David kha, “Bawipaw , Israel Pachia tuh aening ccaekia lang tang vae sah! Awkhualan khyhze sarukheih atu ccyh loukaw kya ka paaw kha ka la khiatua cih zah, David tungvaw kya tuanaw hoypaw a hoi ze, na kalan ccungccaw sawte tuh-e tuh hosahpya leite kae um cih zawtou? 13 Thuasalama ka paaw nynh nang kha vawsawnaw pya lan ae ry ze, khyndadyh lan na ccia nawlan, nang kha hopya leite kae um zah kae cciasah khyh ze, Bawipaw nynh Jonathan ka tungvaw kya tuhcite cyih sah lah, tuhlaeze mah cyih vae sah. Bawipaw tuh ka paaw kya a la um hawte na kya um vae sah. 14 Ka hiin ung ze, Bawipaw kya-e zyn lan umpaw sungsahnaw kha ka tungvaw langsah tua; thuasalama ka chi ze, 15 Bawipaw nynh David a rhaw hae balyn kha laephi vawlan te a vua hae ze heize, zyn lan umpaw na sungsahnaw kha ka inn kyate papin vua nan,” a cipya.Ref 20.15: 2Sa 9.1 16 Jonathan nynh David ciihan te byakinnaw rae zah, “Bawipaw nynh David a rhaw hae kha phulah vae hae sah,” a ci. 17 Jonathan nynh amaw a hiinnaw kha a sungsah hawte David kha a sungsah keiccuze amaw kha mah a sungsahru nawlan David kha bya bua a kinsaku.
18 Jonathan nynh David kha, “Awkhualan tuh sawpaw thawpaw thua vae zah, na umnaw hmin accawnghan cih keiccuze na um khyhpaw a la langkuh cih. 19 Sarukheih tuh na la cceihbung cih; langmaw na rekunaw hmin langkhe la cceih lah, tuin kya umpaw lung pe khe na la um cih. 20 Themuing ka diapaw hawte lung pe langkhe the ccangthum kae kaw cih. 21 Te imuapaw kha kae saw cih, ‘Cceih, the hae kha yn ccung hae,’ kae cipah cih. Imuapaw kha, ‘Dotua, the hae tuh nang te hynhlang sang nynh a um hae, yn khuin hae,’ ka cipya ze, nang tuh nae cceih cih, pawccecize Bawipaw tuh a hiin thyhte, na hanlan khynnaw um zah ri lanpaw um khyh. 22 Thuasalama ccangvaepaw kha, ‘Dotua, the hae tuh na khunglang nynh a um hae,’ ka cipya ze, na cceih vae cih; pawccecize Bawipaw nynh nang kha asawnaw lang ae cciasah vae. 23 Nang te kae ah hokupaw konglang hynh, Bawipaw tuh nang te kae laku kya ccaekia lang zungzae a tang cih,” a cipya.
24 Tukeiccuze David tuh ramkaw kya a rekuh. Sawpaw thawpaw he yn thua tuh, siapharan tuh looh ae khylan a haung. 25 Siapharan tuh ninhyn a haungnaw, pang pe e haungnaw kyakhe a haung. Jonathan tuh thadyn zah, Abner tuh Saul pe khe a haung; thuasalama David umnaw tuh accawnghan.
26 Tuin nin kya Saul tuh pawpaw bya mah ho khyh; pawccecize, “A tungvaw hankhakheit acyihkuh vosi, aning tuh a thyaa khyhpaw nynh thua cih, a thyaa leinaw a um ccaccing cih,” cite a tua. 27 Thuasalama nin ningnaw nin, sawpaw thawpaw awkhualan khe David umnaw tuh accawnghan. Te Saul nynh a ccapaw Jonathan kha, “Pawccemou Jesse ccapaw tuh inkhawnin thuasah, atunin thuasah looh-aenaw kalan yn thua khyh?” a cipya. 28 Jonathan nynh Saul kha, “David nynh Bethlehem khua lang ccia lan pekite yn ngiakuh zah, 29 ‘Beih yn ccia sah; pawccecize ka puizia hae tuh tuin khua kya silawnaw poi rae hae zah, ka upaw nynh tuin kya umbua lan bya yn taw. Tukeiccuze na malang maehoynaw ka mue zetuh yn cciasah lah, ka upaw hae tuh beih yn muihsah hae,’ yn cipya. Tuh-e keiccuze siapharan aenaw ccaboi kalan yn thua khyh,” a cipya.
30 Tetuh Saul nynh Jonathan tungvaw myarya a thinria zah, “A ccouseikuhnung te rhawthonung ccapaw! Namaw toulou maethyalawku nawlan te na nung kha a ccakaete maethyalaw khylan, Jesse ccapaw na pokupaw nyh lan khyh nae ci tou? 31 Jesse ccapaw nynh laephi vawlan a hiin lungkhu balyn tuh nang thuasah, na peenaw thuasah tyn lan khyh. Atu ccungccaw saw lah, ka kalan yn thuakhae, aning tuh a chih ccaccing cih,” a cipya. 32 Te Jonathan nynh a paaw Saul kha, “Pawccemou aning tuh chia athua cih? Pawmou a cyi?” cite a khung. 33 Tetuh Saul nynh Jonathan kha a ccoi te tungsah khylan a khoih; tukeiccuze a paaw nynh David kha chia lan a tuaku ccaccing vae cipaw Jonathan nynh a ny. 34 Jonathan tuh myarya thinriate ccaboi kyate thokuh zah, tuh-e sawpaw nin ningnaw nin tuh looh ae khyh, pawccecize a paaw nynh David kha a thethyasah keiccuze David elang myarya a ngaethah.
35 Awkhualan awkhua khe Jonathan tuh imuapaw kha hoeikuh zah David te tungku lan a hokunaw hae ramkaw langkhe a cceih. 36 Aning nynh imuapaw kha, “Ccue lah, ka kawpaw the kha yn ccung hae,” a cipya. Imuapaw a ccue lyakhe, the ccangkheit kha tuh-e paw po a khunglang a kaw. 37 Imuapaw tuh Jonathan the a ccawnaw kya he a thua te, Jonathan nynh imuapaw kha ko zah, “The ccangkheit tuh na khunglang khe um khyh tou?” a cipya. 38 Jonathan nynh imuapaw kha ko zah, “Rangsakuh, arangte cceih, um nan,” a cipya. Tukeiccuze Jonathan a imuapaw nynh the hae kha khuin zah a bawipaw kalan a cceih. 39 Thuasalama imuapaw nynh pawpaw mah nyh khyh; Jonathan te David rou nynh tuh-e paccynnaw tuh a nyh hae. 40 Jonathan nynh a zunghe hae kha imuapaw kalan pya zah, “La cceih lah, e hae hynh khualae lang la phu,” a cipya. 41 Imuapaw he a cceih takaw te, David tuh lungpum pe te yn thokuh zah laekhu kya a bakhung. Vae thum a bakhung koute, minmin tuh myngkuh hae zah a rawkhaekuh hae; David tuh a rahhua. 42 Te Jonathan nynh David kha, “Ngaengante la cceih, pawccecize, ‘Kae te nang laku kya, ka ciihan hae te na ciihan hae laku kya Bawipaw tuh zungzae um sah,’ cite parouh mawte Bawipaw min phyate bya ah kinku vae,” a cipya. Te David tuh thokuh zah a cceih; Jonathan tuh khualae lang a tee.