17
David te Goliath
1 Filistin hae nynh mih rhawkaw hae kha rhawtuk lan Judah ram Sokoh khua kya a pum hae; Sokoh te Azekah laku umpaw Efes-dammim kya a rya hae.
2 Saul te Israel hae tuh sueluakute Elah accya kya rya hae zah, Filistin hae kha dou khylan paccynkute a um hae.
3 Filistin hae tuh accya voikheit lang raw e mua vawlan khe thadyn hae zah, Israel hae tuh accya voikheih lang raw e mua vawlan khe a thadyn hae, mih laku khe accya a um.
4 Dong taruh te khaw ning hang zah myarya thungpaw, Gath khuapaw Goliath cikuhpaw tuh Filistin hae ryahmin kyate yn pou.
5 A lu kya sohin lukhung khungkuh zah sohin shekel thong pangaw aripaw sivaw angki kha a kiku.
6 A ccu kya sohin mawccae nawkuh zah a raw hae laku kya sohin ccoi kha a vawku.
7 A ccoi alua tuh phaeccya cia cih zah, a ccoi dung kya-e sivaw tuh shekel za taruh ari; a khawriaphua ccyngtu tuh a malang khe a cceih.
8 Goliath nynh thadyn zah Israel rhawkaw hae kha o hae zah, “Nanning nynh pawccemou rhawtukku lan nae pou oh? Kae tuh Filistin ccungccaw ka thua zah, nanning tuh Saul ryalahtu hae na thua khyh oh tou? Naemaw hanlan ccungccaw lu kheit oun po oh lah, ka kalan yn cceihbung sah.
9 Aning nynh kae kha yn tae zah yn chia kho ze, kaening tuh nae ryalahtu lang kae tang cih; thuasalama kae nynh ka tae zah ka chia ze, nanning tuh kae ryalahtu lang na tang cih oh zah kae rya na lah cih oh,” a cipya hae.
10 Tuh-e Filistin paw nynh, “Atunin kya Israel rhawkaw hae kha tukku lan kae hyy oh! Ccungccaw lu kheit oun po oh lah, kae tukku tua cih,” a ci.
11 Filistin paw bya kha Saul te Israel hae balyn nynh a thae hae tuh, mih bungzou zah myarya a rih hae.
12 David tuh Judah ram Bethlehem khua e Efrath phin Jesse ccapaw nynh thua, Jesse tuh ccapaw lu tarya a hoi. Saul she lyakhe tuh-e ccungccapaw tuh taw vae zah a kum tang vae.
13 Jesse ccapaw hae kya-e atawccaw hae lu thum nynh rhawtuknaw kalan Saul kha a zui hae; rhawtuknaw kalan a cceih hae paw Jesse ccapaw lu thum hae min tuh ccatawccaw Eliab, a zuitu Abinadab te lu thumnaw Shammah nynh thua hae.
14 David tuh asoi huapaw nynh thua; atawccaw hae lu thum nynh Saul kha a zui hae,
15 thuasalama David tuh Bethlehem kya a paaw tuu kha rin khylan Saul kyate a ki.
16 Filistin paw nynh nin sung pali lungkhu awkhua takyh zete takyh pounua hae zah a thadynnua hae.
17 Jesse nynh a ccapaw David kha, “Na upaw hae hanlan hynh-e vae-u ephah ccangkheit te sanlou ccanghaw hynh lah lah, ryahmin lang na u hae kalan khe arangte la cciakhae;
18 te rhawkaw thong kheit uktu mih rhawbawipaw hanlan vaetua mateitui ahaawpaw ccanghaw kha mah la phubia. Na upaw hae tuh la viatua hae lah, minmin kyate a dan hae cinawpaw muihsahnaw ccangkhakheit nae ccyng cih,” a cipya.
19 Saul te David a upaw hae te Israel hae balyn tuh Elah accya kyakhe Filistin hae ryte rhaw a tukkuh hae.
20 David tuh awkhua takaw te tho zah tuu hae kha tuurinpaw kya cciataw hae zah Jesse nynh a naw thyhte, looh kha ccyngbia zah a cceih. Rhawkaw hae tuh siarua biate rhawtuknaw hmin lang a ccia lya hae khe David tuh ryahmin kya a thua.
21 Israel rhawkaw hae te Filistin rhawkaw hae tuh tukku khylan rawsekute a um hae.
22 David nynh uccaw kha uccaw a rintu kyakhe a nungsya koute rhawkaw hae kalan ccue zah a upaw hae kha bya a beih hae.
23 Minmin ryte bya a hoku lya hae khe, myarya thungpaw Filistin ccungccapaw, Gath khuapaw Goliath cikuhpaw tuh Filistin rhawkaw hae kyate yn pou zah, langmaw a homaepaw bya kha a ho. David nynh a bya kha a thae.
24 Israel hae balyn nynh tuh-e paw kha a muih hae tuh, myarya rih hae zah a ccue hae.
25 Israel hae nynh, “Khuh-e ccungccapaw yn poupaw khuh na muih oh tou? Thanccingte Israel kha theihrya khylan nynh yn pou. Amaw a theihpaw kha siapharan nynh sisua patae a pya cih, a ccanung kha a pya cih zah a paaw innbyn kha Israel ram kya ngunto a luesah cih,” a ci hae.
26 David nynh a pe a thadyn hae paw kyakhe, “E Filistin paw hynh theih zah Israel kha maethyanaw kyate a luesahpaw tuh pawmou cyipya athua cih? Ahiinpaw Pachia rhawkaw hae kha theihrya lan ciate vingdungawkuh leipaw hynh-e Filistin paw hynh hummou athua?” a cipya hae.
27 Tuh-e ccungccaw hae nynh, “Amaw a theihpaw kha tuhcite cyipya athua cih,” cite atakaw lya-e bya kha a hopya hae.
28 David nynh minmin a hopya hae paw kha a upaw atawccapaw Eliab nynh a thae tuh, David tungvaw a thinria zah, “Pawccemou hynhlang nae ccia? Beihtarawpaw ka tuu kha ramkaw kya humkyamou nae cciataw? Na lysakunaw te na thinlung a hoyleinaw kha phe ka ny; rhawtuk do khylan nynh nae cciabung,” a cipya.
29 David nynh, “Pawmou ka cyisei? Bya kaw kheit rou khaw ka khia,” a cipya.
30 Tuh-e paw kyate ccangpaw lu kheit kalan maekuh zah a homae hawte a hopya; ccungccaw hae nynh atakaw lya hawte bua a khung hae.
31 David nynh a hopaw bya kha a thae hae tuh, Saul kha a hopya pathy hae; te aning nynh David kha a ko.
32 David nynh Saul kha, “Aning keiccuze humhung mah a lungthang nan sah; na ryalahtupaw nynh ka cceih cih zah, e Filistin paw hynh ka tuk cih,” a cipya.
33 Saul nynh David kha, “Nang nynh e Filistin paw hynh tuk lan na ccianua kho lan khyh; pawccecize nang tuh imua na thua ung zah, aning tuh a ccangvae takaw lya mawte rhawkaw lang a tang vae,” a cipya.
34 Thuasalama David nynh Saul kha, “Na ryalahtupaw nynh ka paaw hanlan tuu leih ka rin zah, chindeih khyhze vong yn thua zah tuuphu kya-e tuutaw kha a tei ze,
35 ka deehui zah ka theih koute a khalang lungkhu e tuutaw kha leih ka luesah; chindeih khyhze vong nynh yn zounua ze, a khaw te leih ka kyng zah ka bua zah ka chia.
36 Na ryalahtupaw nynh chindeih te vong kha parouh mawte ka chia hae; e vingdungawkuh leipaw Filistin paw hynh ahiinpaw Pachia rhawkaw hae kha a theihrya hae keiccuze tuh-e loramsaw hae kya-e sa kheit hawte athua cih,” a cipya.
37 David nynh, “Chindeih ccutin te vong ccutin kyate yn khumpaw Bawipaw nynh e Filistin paw kuih kyate yn khum cih,” a ci. Tukeiccuze Saul nynh David kha, “La cceih, Bawipaw nynh ae umkhae vae sah!” a cipya.
38 Saul nynh David kha a rhawtuk-uccaw a lawsahku; sohin lukhung kha a lu kya khungsah zah sivaw angki kha a kisah.
39 David nynh Saul thaloi kha rhawtuk-uccaw vawlan khe khangkuh zah ccia lan zuaku tua zah cceih kho khyh; pawccecize tuh-e uccaw hae tuh lawkuh boi khyh. Tetuh David nynh Saul kha, “E hae ryte tuh ka cceih kho khyh; pawccecize e hae hynh ka lawkuh boi khyh,” a cipya. Tukeiccuze David nynh tuh-e uccaw hae tuh a khahku.
40 Te David nynh a hoitang kha ccyngkuh zah vawkhu e naebabingpaw lungpyng ccangpangaw kha pokuh zah, a tuurin uccaw athuapaw a zaw lungkhu khe a sangku; a zae kha a kuih te ccyngkuh zah Filistin paw kha a naenuaku.
41 Filistin paw nynh David kha naenuakuh zah a khawriaphua ccyngtu tuh a malang khe a cceih.
42 Filistin paw nynh do zah David kha a muih tuh a theihrya, pawccecize aning tuh ccangvae taraw thua zah, a ngesaw selalyng lan cih zah a puithya.
43 Filistin paw nynh David kha, “Kae tuh ui tou ka thua, ccungngue te nae ccianua?” a cipya. A pachia hae min phyate David kha thya a law.
44 Filistin paw nynh David kha, “Ka kalan yn cceih, na saw kha azouthyapaw pavaw hae te laephi kya-e sarepaw hae kalan ka pya cih hae,” a ci.
45 Thuasalama David nynh Filistin paw kha, “Nang nynh thaloi, ccoi te ccoi dihpaw khate nae ccianua; thuasalama kae nynh tuh nang nynh na theihryapaw vaaw Bawipaw , Israel rhawkaw hae Pachia min te kae ccianua.
46 Atunin ccaccei kya Bawipaw nynh nang kha ka kuih kalan yn pya cih, nang kha kae theih cih zah na lu kae pae cih; te Filistin rhawkaw hae rhua kha azouthyapaw pavaw hae te laephi kya-e sarepaw hae kalan atunin ccaccei kya ka pya cih hae, tetuh laephi pynpi nynh Israel hae kya Pachia a um cipaw kha a nyh cih hae.
47 Bawipaw nynh thaloi te ccoi khate khum khyh hae cipaw kha e zapi hae balyn nynh a nyh cih hae; pawccecize rhawtuknaw tuh Bawipaw kya-e thua zah aning nynh nanning kha kae kuih kalan oun pya cih,” a cipya.
48 Filistin paw nynh David kha tungku khylan he a naenuakuh tuh, David nynh mah Filistin paw te tungku khylan rhawkaw hae kalan khe arangte a ccue.
49 David nynh a zaw lungkhu lang a kuih pu zah lung ccangkheit kha thuaakute henuanawpaw zae te henua zah Filistin paw tuh a terui kya a tung; lung tuh a terui lungkhu lang po sungkuh zah laekhu kya a mae lante a khuliakuh.
50 Tuhcite David nynh Filistin paw kha henuanawpaw zae te lung ccangkheit khate tae zah Filistin paw kha tungsah zah a chia; David kuih kya thaloi um khyh.Ref 17.50: 2Sa 21.19
51 Tetuh David nynh ccuenua zah Filistin paw vawlan khe a thadyn; a thaloi kha abu kyate poh thuaa zah a chia; tuh-e thaloi te a lu kha a pae.Ref 17.51: 1Sa 21.9
Filistin hae nynh athung huapaw mih ccungccapaw a chih vae cipaw a muih hae tuh, a ccue hae.
52 Israel te Judah rhawkaw hae tuh sia biate thokuh hae zah Filistin hae kha Gath te Ekron koikua kyacia a dee hae, vaemaw muepaw Filistin hae tuh Shaaraim kyate Gath te Ekron kyacia laanpi kya po a khuliakuh hae.
53 Israel hae tuh Filistin hae a deehuinaw hae kyate oun ki hae zah, mih ryahmin kha a law hae.
54 David nynh Filistin paw lu kha lah zah Jerusalem lang a cciakhae; a rhawtuk-uccaw kha tuh a bu kya a nungsya.
55 David nynh Filistin paw a ccianuapaw kha Saul nynh a muih tuh, rhawbawipaw Abner kyakhe, “Abner, e ccangvaepaw hynh hum ccapaw mou athua?” cite khia zah, Abner nynh, “Pou siapharan, nang tuh na hiin thyhte, aning kha ka nyh khyh,” a cipya.
56 Siapharan nynh, “Ccangvaepaw kha hum ccapaw mou athua, khiatua oh,” a ci.
57 David tuh Filistin paw a chianaw kyate he yn ki tuh, Abner nynh aning kha ko zah Filistin paw lu kha a kuih te ccyng biate Saul malang a thuakhae.
58 Saul nynh, “Ccangvaepaw, hum ccapaw mou na thua?” cite a khia. David nynh, “Bethlehem khuapaw na ryalahpaw Jesse ccapaw nynh ka thua,” a cipya.