16
Siapharan lang David Chitui Thuhnaw
1 Bawipaw nynh Samuel kha, “Hohseciamou Saul elang na ngaethah cih? Israel hae kya siapharan thuanaw kyate aning kha ka vua vae. Na saki kya chitui ruinkuh lah, cciatua; nang kha Bethlehem khuapaw Jesse kalan kae saw cih, pawccecize a ccapaw hae kyakhe kamaw elang siapharan lu kheit kha ka paccyn vae,” a cipya.
2 Samuel nynh, “Pawtemou ka cceih kho cih? Saul nynh tuh-e tuh a thae ze, yn theih cih,” a ci. Bawipaw nynh, “Vaetua tohlaw sa kheit kha cciakhae lah, ‘Bawipaw kalan silaw lan kae thua vae,’ cite na ho cih.
3 Silaw lan Jesse kha ko lah, na cyi lanpaw kha kae muihsah cih; a min kae hopyapaw kha kamaw elang nang nynh chitui na thuh cih,” a cipya.
4 Bawipaw nynh kaw a pya thyhte Samuel nynh cyih zah, Bethlehem khua lang a cceih. Khua kya-e piccan hae tuh amaw kha tungku khylan thyngkute oun thua hae zah, “Daenaw lante tou nae thua?” a ci hae.
5 Samuel nynh, “Daenaw lante; Bawipaw kalan silaw khylan kae thua vae; thyaasakuh oh lah, silaw lan ka kya cceihbua oh,” a cipya hae. Jesse te a ccapaw hae kha thyaasah hae zah silawnaw kalan a ko hae.
6 He a thua hae te, Eliab kha do zah, “Bawipaw kya-e chitui thuh athuapaw tuh atu Bawipaw malang a umpaw hynh nynh athua ccaccing,” cite a tua.
7 Thuasalama Bawipaw nynh Samuel kha, “A muinsan te a pynrua ahangpaw kha do nan, pawccecize amaw kha ka vua vae; pawccecize Bawipaw nynh tuh ccungccaw nynh do hawte do khyh; ccungccaw nynh tuh atolang e muinsan kha a do, thuasalama Bawipaw nynh tuh thinlung kha a do,” a cipya.
8 Te Jesse nynh Abinadab kha ko zah Samuel malang khe a cciasah. Samuel nynh, “E paw hynh mah Bawipaw nynh a popaw thua khyh,” a cipya.
9 Te Jesse nynh Shammah kha cciasah zah, Samuel nynh, “E paw hynh mah Bawipaw nynh a popaw thua khyh,” a ci.
10 Jesse nynh a ccapaw hae lu sari kha Samuel malang cciasah hae zah, Samuel nynh Jesse kha, “Bawipaw nynh hynh-e hae hynh lu kheit sanmah po khyh hae,” a cipya.
11 Samuel nynh Jesse kha, “Hein kya na ccapaw hae mih balynte a um hae tou?” cite a khia. Jesse nynh, “Asoi huapaw a um ung, thuasalama aning tuh tuu a rin,” a cipya. Te Samuel nynh Jesse kha, “Ccungccaw saw lah, amaw kha kosah hae; aning yn thua mawlaezung hein kya haung lei lan,” a cipya.
12 Jesse nynh saw hae zah aning kha a thuakhae hae. Aning tuh a ngesaw selalyng lan cih zah, a mitdae puithya zah a puithyapaw nynh thua. Bawipaw nynh, “Thokuh lah, amaw kha chitui thuh; pawccecize hynh-e paw hynh nynh athua,” a cipya.
13 Samuel nynh chitui ruinkuhpaw saki kha lah zah, a uno hae malang khe chitui a thuh; tuin nin te vae tuh Bawipaw muisaw tuh David tungvaw kya thawmawte a thua. Samuel tuh thokuh zah Ramah khua lang a cceih.
David nynh Saul Tintang A Khuapya
14 Bawipaw muisaw tuh Saul kyate pou zah, Bawipaw kyate yn thuapaw muisaw hoyleipaw nynh aning kha vawsaw a pya.
15 Saul a ryalahtu hae nynh Saul kha, “Dotua, Pachia kyate yn thuapaw muisaw hoyleipaw nynh nang kha vawsaw ae pya.
16 Ae do-oihtu hae paw na ryalahtu hae nynh tintang a khuathyapaw kha kae ccung nawlan kaw oun pyatua; Pachia kyate yn thuapaw muisaw hoyleipaw nynh he ae thuanua ze, aning nynh tintang ae khuapah cih zah na dan cih,” a cipya hae.
17 Tukeiccuze Saul nynh a ryalahtu hae kha, “Tintang hoyte a khuathyapaw kha yn ccungpah oh lah, yn thuakhaepah oh,” a cipya hae.
18 Ccangvaepaw lu kheit nynh, “Bethlehem khuapaw Jesse ccapaw tuh tintang a khuathya, a rawthung, rhawtuk a thya, byahonaw kya haw zah a puithya; te Bawipaw tuh a kya a um,” a ci.
19 Tukeiccuze Saul nynh Jesse kalan locceihtu hae kha saw hae zah, “Tuu a rinpaw na ccapaw David kha ka kalan yn saw,” cite bya a taw.
20 Jesse nynh sanlou phupaw lann sa kheit, misutui kha saving tui-ung ccangkheit, miaataw sa kheit kha lah zah a ccapaw David kyate Saul kalan a ky.
21 David tuh Saul kya thua zah, a ryalaw kya a tee. Saul nynh myarya sungsah zah, a rhawtuk-zunghe ccyngtu lang a tang.
22 Saul nynh Jesse kalan ccungccaw saw zah, “David tuh ka malang maehoynaw a ccou keiccuze ka ryalaw kya um sah,” cite bya a taw.
23 Pachia kyate yn thuapaw muisaw hoyleipaw nynh Saul kha a thuanua takyh vae ze, David nynh tintang kha lawkuh zah a kuih te a khua; tetuh Saul tuh hoyhua zah leih a dan, te muisaw hoyleipaw tuh a kyate leih a pou.