14
Nin kheit tuh Saul ccapaw Jonathan nynh a rhawtuk-uccaw a ccyngtu ccangvaepaw kha, “Rang, khuhlang raw e Filistin rhawkaw hae kalan cceih sih,” a cipya. Thuasalama a paaw kha hopah khyh. Saul tuh Gibeah khua atelang e Migron khua kya umpaw ccalee ku kaw khe a um; amaw kya umpaw rhawkaw hae tuh za taruh loukaw acih hae, Shiloh khua kya umpaw Bawipaw ranpibawi Eli ccapaw Finehas a ccapaw Ikhabod a unopaw Ahitub ccapaw Ahijah tuh ranpibawi angki ccyng zah a umbua. Jonathan a cceih vae cipaw kha ccungccaw hae nynh nyh khyh hae. Jonathan nynh Filistin rhawkaw hae kalan ccia lan a paccynkunaw laansi kyakhe voi ning mawte chialungsakan hae um zah, ccangkheit min tuh Bozez thua zah, ccangpaw ccangkheit min tuh Seneh nynh thua. Chialungsakan ccangkheit tuh thahlang khe Mikmash khua lang hawi zah, ccangpaw ccangkheit tuh alia langkhe Geba khua lang a hawi.
Jonathan nynh a rhawtuk-uccaw a ccyngtu ccangvaepaw kha, “Rang, khuh-e vingdungawkuh lei hae paw rhawkaw hae kalan cceih sih; Bawipaw nynh aening hanlan rya poh oun lawpah kho; pawccecize ccungccaw alung liate thuasah, azya liate thuasah Bawipaw khumnaw kha humhung nynh mah khee kho lan khyh,” a cipya. A rhawtuk-zunghe ccyngtu nynh, “Na lung nynh a ry hawte cyih ccaleih. Na kya mang ka um; na tuanaw hawte nynh ka tuanaw tuh athuabua,” a cipya. Tetuh Jonathan nynh, “Khuh-e ccungccaw hae kalan ccia lan zah langsapyaku lan hae. Minmin nynh, ‘Nae kalan kae thua maw cia oun la ngaw oh,’ a ci hae ze, ah umnaw hmin kya thadyn lan zah minmin kalan ccia lei lan. 10 Thuasalama minmin nynh, ‘Kae kalan oun cceih oh,’ a ci hae ze, ccia lan; pawccecize Bawipaw nynh minmin kha aening kuih kya oun pya vae. Tuh-e tuh aening elang muihsahnaw athua cih,” a cipya. 11 Tukeiccuze parouh mawte Filistin rhawkaw hae kalan khe a langsapyaku hae; te Filistin hae nynh, “Dotua oh, Hebru hae tuh a rekunaw hae akhunaw kyate oun pou vae hae,” a ci hae. 12 Rhawkaw hae nynh Jonathan te a rhawtuk-zunghe ccyngtu kha ko hae zah, “Kae kalan rang oh, hankhakheit kae muihsah cih oh,” a cipya hae. Jonathan nynh a rhawtuk-zunghe ccyngtu kha, “Ka nulang te yn zui; pawccecize Bawipaw nynh minmin kha Israel kuih kalan a pya vae hae,” a cipya. 13 Te Jonathan tuh a kuih a ccu te vawthung zah, a rhawtuk-zunghe ccyngtu nynh a nulang te a zui. Filistin hae tuh Jonathan malang khe khuliakuh hae zah, a nulang te a rhawtuk-zunghe ccyngtu nynh a chia hae. 14 Jonathan te a rhawtuk-zunghe ccyngtu nynh masaty a chia hae paw kyatuin, ekah angankuh loukaw akopaw laephi kyakhe, lu kuin loukaw a chia hae. 15 Ryahmin kya, loo kya te ccungccaw balyn kyakhe siikunaw a um; rhawviatu rhawkaw hae te thiingtu hae heize a thyngkuh hae; innrysuekuh zah siikunaw pipi lang a tang.
16 Benjamin ram, Gibeah khua e Saul rhawviatu hae nynh do hae zah, nulang malang phiariphiarae a ccue hae paw Filistin hae kha a muih hae. 17 Saul nynh a kya umpaw rhawkaw hae kha, “Milu ria oh, hummou aening kyate a pou, dotua oh,” a cipya hae. Milu a ria hae tuh, Jonathan te a rhawtuk-uccaw ccyngtupaw um vae khyh hae. 18 Saul nynh Abijah kha, “Pachia thingkua kha hynhlang yn lah,” a cipya. Pawccecize tuin ccyh lya tuh Pachia thingkua tuh Israel hae kya a cceihbua. 19 Saul nynh ranpibawi a hopya lyakhe, Filistin hae ryahmin kya ngaluin-ngaluin ccaepaw roi tuh houhouh athan; Saul nynh ranpibawi kha, “Na kuih kha sawbung tua,” a cipya. 20 Saul te a kya umpaw ccungccaw balyn tuh sueluakuh hae zah rhawtuknaw kalan a cceih hae; Filistin hae tuh mimaw te mimaw thaloi te baekuh hae zah, lungmuanaw pipi a um. 21 Langmaw lyaze Filistin hae kya um hae zah minmin ryte ryahmin kalan a cceihkheih hae paw Hebru hae mah Saul te Jonathan ryte a umkheih hae paw Israel hae kalan maekuh hae zah a umbua vae hae. 22 Tuhawte, Efraim muaram kya a rekuh hae paw Israel hae balyn nynh Filistin hae a ccue vae hae cipaw he a thae hae tuh, rhawtuknaw kya panbua hae zah Filistin hae kha thawte a deehui bua hae. 23 Tuhcite Bawipaw nynh Israel kha tuin nin kya taenaw a pya.
Rhawtuknaw tuh Beth-aven khua khunglang po athua, Saul ryte um hae paw rhawkaw hae tuh ria hae zah mih balynte thong haw loukaw acih hae. Rhawtuknaw tuh Efraim muaram lang cia apazaekuh.
Saul nynh Tuaty leite Thyalawnaw A Rae
24 Saul nynh tuin nin khe tuaty leite rya a lawsei. Rhawkaw hae tungvaw thyalawnaw kha rae zah, “Ka rhaw hae kha phu ka law maw hae, zete ccyh athua maw looh a aepaw miakaw tuh thyalawnaw mue sah,” a ci. Tukeiccuze rhawkaw hae tuh looh ae khyh hae. 25 Rhawkaw hae balyn nynh khoibu kha thuanua hae zah, laekhu kya khoitui a um. 26 Rhawkaw hae nynh ramkaw a thua hae tuh, khoitui tuh accaw cciamang; thyalawnaw kha a ri hae keiccuze mih kuih kha mih khalang lungkhu lang pukuh khyh hae. 27 Thuasalama a paaw nynh rhawkaw hae kya thyalawnaw bya a hopaw kha Jonathan nynh nyh khyh; tukeiccuze a kuih te a ccyngpaw hoitang dung khate khoidaw kha sua zah a kuih te he a ae tuh a mit a ccaethya hua. 28 Rhawkawpaw lu kheit nynh, “Na paaw nynh rhawkaw hae kha thyalawnaw te tynkaring lan hopah hae zah, ‘Atunin looh aepaw miakaw tuh thyalawnaw mue sah,’ a ci. Tukeiccuze rhawkaw hae tuh mih thawzya vae,” a cipya. 29 Tetuh Jonathan nynh, “Ka paaw nynh ram hynh vawsaw a pya; e khoitui ccapyh ka taangtua keiccuze ka mit accaethyapaw hynh dotua oh. 30 Rhawkaw hae nynh mih rhaw hae kya-e luadepaw uccaw kha atunin rythyte a ae hae ze, pawcih baban mou ahoyhua cih; atu tuh Filistin hae kha patae ah theih kho vae khyh oh,” a ci.
31 Tuin nin kya Filistin hae kha Mikmash khua kyate Aijalon khua kyacia a chia hae, rhawkaw hae tuh myarya mih thawzya; 32 tukeiccuze rhawkaw hae nynh luadepaw uccaw kha ccianua hae zah tuu hae, tangnuapaw hae te vaetuataw hae kha lah hae zah laephi kya a theih kou hae te, rhawkaw hae nynh sachii ryte a aede hae. 33 Te tuh-e kong tuh Saul kyakhe, “Dotua, rhawkaw hae nynh chiise ryte aede hae zah Bawipaw kya a sei hae,” cite a hopya hae. Te Saul nynh, “Nanning tuh nae lungzi vae khyh; hynhlang ka malang hin lungtungpi ccangkheit oun tou oh,” a cipya hae.Ref 14.33: Gen 9.4; Lev 7.26-27, 17.10-14, 19.26; Deu 12.16, 23, 15.23 34 Saul nynh, “Rhawkaw hae laku lang la cceih oh lah, minmin kyakhe, ‘Ccungccaw balyn nynh mih tangnuapaw khyhze mih tuu kha oun cciakhae hae sah lah, e kyahin theih hae sah lah, ae hae sah; chiise ryte aedete Bawipaw kya sei nan oh,’ cite hopah oh,” a cipya hae. Tukeiccuze tuh-e khuazi khe rhawkaw hae balyn nynh mih tangnuapaw hae kha oun cciakhae hae zah tuin kyakhe a chia hae. 35 Te Saul nynh Bawipaw hanlan silawhang kha a duapya; tuh-e tuh Bawipaw elang a duapyapaw masaty silawhang nynh thua.
Jonathan A Chinaw Nae
36 Te Saul nynh, “Khuazi khe Filistin hae kha deehui oh sih lah, awkhua khuadae cia minmin kha theih oh sih; lu kheit san haang nan oh sih,” a cipya hae. Minmin nynh, “Ahoy na ci hawte cyih ccaleih,” a ci hae. Thuasalama ranpibawi nynh, “E kyahin Pachia kalan naekuh hin oh sih,” a ci. 37 Tukeiccuze Saul nynh Pachia kha ngia zah, “Filistin hae kha ka deehui cih hae tou? Minmin kha Israel hae kuih kalan na pya cih hae tou?” a ci. Thuasalama tuin nin kya Pachia nynh byakhung khyh. 38 Saul nynh, “Ccungccaw cciakhaetu hae balyn, hynhlang rang oh; e seinaw hynh atunin pawtemou yn tho cipaw kha ccungtua oh sih. 39 Pawccecize Israel a khumtu Bawipaw tuh a hiin thyhte, tuh-e seinaw tuh ka ccapaw Jonathan tungvaw a um lanze heize, aning tuh a chih ccaccing cih!” a ci. Thuasalama ccungccaw hae balyn laku kya bya a khungrupaw lu kheit san um khyh. 40 Saul nynh Israel hae balyn kyakhe, “Nanning tuh san kheit kya na um cih oh zah, kae te ka ccapaw Jonathan tuh san kheit kya kae um cih,” a cipya hae. Ccungccaw hae nynh Saul kha, “Ahoy na ci hawte cyih ccaleih,” a cipya hae. 41 Te Saul nynh, “Pou Bawipaw , Israel Pachia, pawccemou atunin na ryalahtu hynh bya nae khung khyh? E cyiseinaw hynh ka tungvaw thuasah, ka ccapaw Jonathan tungvaw thuasah a um ze, pou Bawipaw , Israel Pachia, Urim kha oun pya; thuasalama e cyiseinaw hynh na ccungccaw Israel hae tungvaw a um ze, Thummim kha oun pya,” a ci. Te ccungthydungnaw tuh Jonathan te Saul tungvaw khe ccah zah ccungccaw hae tuh a lue hae.Ref 14.41: Nam 27.21; 1Sa 28.6 42 Te Saul nynh, “Kae te ka ccapaw Jonathan laku kya ccungthydungnaw kha rae oh,” a ci. Te Jonathan kya accah.
43 Tetuh Saul nynh Jonathan kha, “Pawmou na cyisei, yn hopah,” a cipya. Jonathan nynh, “Ka ccyngpaw hoitang dung khate khoitui beihtaraw kha ka taangtua; hein kya mang ka um, ka chih cih,” a cipya. 44 Saul nynh, “Pachia nynh ka tungvaw tuhcite cyih sah lah, tuhlaeze mah cyih vae sah; na chih ccaccing cih, Jonathan!” a cipya. 45 Te ccungccaw hae nynh Saul kha, “Israel tungvaw kya hynh-e taenaw lepaw a raepaw Jonathan tuh tou a chih cih? Tuh-e tuh cyihkuh nan sah! Bawipaw tuh a hiin thyhte, a lu kya-e a sangrua ccangkheit sanmah laekhu lang ccah lan khyh; pawccecize aning tuh Pachia ryte atunin rya a lahkheih hae,” a cipya hae. Tuhcite ccungccaw hae nynh Jonathan kha shawkhaw hae zah chih khyh. 46 Te Saul nynh Filistin hae kha deehui leite a kitaw hae; Filistin hae tuh mih umnaw hmin lang a cceih hae.
Saul Rhawtuknaw
47 Saul nynh Israel hae siapharan lang he a tang te, a pepan e a rhaw hae balyn—Moab hae, Ammon hae, Edom hae, Zobah siapharan hae te Filistin hae kha rhaw a tuk hae; rhaw a tuknaw miakaw kya minmin kha a tae hae. 48 Rawthungte rhawtuk zah Amalek hae kha a chia hae, Israel hae kha minmin a luadetu hae kuih kyate a luesah hae.
49 Saul ccapaw hae tuh Jonathan, Ishvi te Malkhishua nynh thua hae; a ccanung hae lu ning min tuh: atawccanung min tuh Merab cikuh zah, asoihuanung min tuh Mikhal acikuh. 50 Saul a zu min tuh Ahinoam cikuh zah Ahimaaz ccanung nynh thua. A rhawkaw hae bawipaw min tuh Abner cikuh zah Saul a paaw uno Ner ccapaw nynh thua; 51 Saul a paaw tuh Kish thua zah, Abner paaw Ner tuh Abiel ccapaw nynh thua.
52 Saul a hiin lungkhu balyn tuh Filistin hae kha thawte a tuk hae; Saul nynh athawsaepaw te arawthungpaw a muihpaw miakaw kha a rhawkaw lang a khang hae.