13
Aphung Thua leipaw Saul Silawnaw
Saul nynh a uk takaw lya tuh kum … acih vae; aning nynh … kum te kum ning lungkhu Israel kha a uk.note13.1: hynh Hebru Baebu kya akum phe ccing lan um khyh.
Saul nynh Israel hae thong thum kha a po hae; thong ning tuh Saul ryte Mikmash te Bethel muaram kya um hae zah, thong kheit tuh Janathan ryte Benjamin ram, Gibeah khua kya a um hae; tuhlaepaw ccungccaw hae kha mih umnaw mih bu raveih langkhe a kisah hae. Jonathan nynh Beba khua e Filistin rhawkaw hae kha tae zah, tuh-e tuh Filistin hae nynh a thae hae. Te Saul nynh ram pynpi phe lekuh lan, “Hebru hae nynh thae hae sah!” cite mungkae a tu. Saul nynh Filistin rhawkaw hae a tae hae cipaw te Filistin hae nynh Israel hae kha a hua hae cipaw kha Israel hae balyn nynh he a thae hae tuh, Saul kalan Gigal khua langkhe ccungccaw hae kha a ko hae.
Filistin hae tuh Israel hae te tukku lan marangle thong sung thum, marang rhawkaw thong taruh te rili kin e laesia zeih acih hae paw rhawkaw hae tuh a sueluakuh hae; te cceihthung hae zah Beth-aven khua nithua lang e Mikmash khua khe a rya hae. Israel hae nynh vawsawnaw kya nynh kae um cipaw kha he a nyh hae tuh (pawccecize rhawkaw hae tuh myarya a teing hae), ccungccaw hae tuh lungkarung hae, akhunaw hae, lungpi hae, shawku hae te tuisung hae lungkhu khe a rekuh hae. Abang Hebru hae tuh Jordan vaw kha zua hae zah Gad ram te Gilead ram lang a cceih hae. Saul tuh Gilgal khua kya um ung zah, ccungccaw hae balyn nynh thyngkute a zui hae.
Samuel nynh accyh a khyapya thyhte nin sari a ngaw; thuasalama Samuel tuh Gilgal lang yn thua khyh zah ccungccaw hae tuh Saul kyate a ccue vae hae.Ref 13.8: 1Sa 10.8 Tukeiccuze Saul nynh, “Maee-ute silawnaw te ccawkunaw silawnaw kha hynhlang ka kalan oun cciakhae oh,” a cipya hae. Aning nynh maee-ute silawnaw kha a rae. 10 Maee-ute silawnaw kha he a rae kou takaw khe Samuel tuh yn thua; Saul nynh tungku khylan cciadue zah salaam a pya. 11 Samuel nynh, “Pawmou na la cyi?” a cipya. Saul nynh, “Ccungccaw hae nynh ka kyate a ccue hae paw kha thuasah, khyapaw accyh kya nae thua khyhpaw kha thuasah, Filistin hae tuh Mikmash khua kya a sueluaku hae paw kha thuasah he ka nyh te, 12 ‘Filistin hae nynh ka umnaw Gilgal khua lang yn ccianua vae cih hae, Bawipaw thawccinaw kha ka ngia loh khyh,’ ka ci zah, tukeiccuze kamaw te kamaw nangsekute maee-ute silawnaw kha ka rae,” a cipya. 13 Samuel nynh Saul kha, “Na cyipaw hynh ngaeenaw ccaccing nynh thua; Bawipaw na Pachia nynh ae pyapaw kawbya kha na zui khyh. Na la zui zetuh, Bawipaw nynh na peenaw kha Israel hae kya zungzae a tynsah cih, 14 thuasalama atu tuh na peenaw tyn vae lan khyh; Bawipaw nynh a rypaw thinlung a ccyngkuhpaw ccungccapaw kha a ccung vae; Bawipaw nynh kaw ae pyapaw kha na zui khyh keiccuze, Bawipaw nynh aning kha a ccungccaw hae a uktu lang a khang vae,” a cipya.Ref 13.14: Loc 13.22 15 Te Samuel tuh thokuh zah Gilgal khua kyate Benjamin ram, Gibeah khua lang a cceih. Tuhlaepaw ccungccaw hae tuh rhawkaw hae kalan ccia khylan Saul kha a zui hae; minmin tuh Gilgal khua kyate Benjamin ram, Gibeah khua lang a cceih hae.
Rhawtuk lan Paccynkunaw
Saul nynh a kya umpaw rhawkaw hae kha ria hae zah za taruh loukaw acih. 16 Saul, a ccapaw Jonathan te mih kya umpaw ccungccaw hae tuh Benjamin ram, Geba khua kya a um hae; Filistin hae tuh Mikmash khua kya a rya hae. 17 Filistin hae ryahmin kyate ccungccaw thiingtu hae tuh phu thum lante a pou hae; phu kheit tuh Shual ram, Ofrah khua lang a cceih hae, 18 ccangpaw phu kheit tuh Beth-horon khua lang cceih hae zah, ccangpaw phu kheit tuh ramkaw lang Zeboim accya lang a hawipaw mua langkhe a cceih hae.
19 Israel ram pynpi kya sivawsuhtu lu kheit san um khyh, pawccecize Filistin hae nynh, “Hebru hae nynh thaloi hae, ccoi hae kha raekuh lan khyh hae,” a ci hae; 20 tukeiccuze Israel hae balyn tuh mih tamuin, mih muinzung, hae te rungkou kha phe he lan tawku khylan Filistin hae kalan leih a cceih hae. 21 Tamuin te muinzung tawnaw mee tuh shekel pum thum pum ning thua zah, hae tawnaw mee te thuingnawpaw ccungngue bingnaw mee tuh shekel pum thum pum kheit nynh thua. 22 Tukeiccuze rhawtuk nin kya Saul te Jonathan holeite, mih kya umbua hae paw ccungccaw hae tuh lu kheit sanmah thaloi te ccoi hoi khyh hae.
23 Te Filistin rhawkaw hae phu kheit tuh Mikmash laansi langkhe a cceih hae.