SAMUEL
Samuel
Samuel Uk Kheitnaw kyahin Israel minphuin kya byapiatu hae she kyate siapharan she kalan a paleihkunaw kong a um. Tuhcite a paleihkunaw kyaze abyapi huaccepaw ccungccaw lu thum um hae zah, tuh-e hae tuh: Alesaepaw byapiatu hae kyaze nyathyakou byapiatu athuapaw Samuel, Israel hae kyaze masaty siapharan athuapaw Saul te David nynh athua hae; David nynh kawhoitu lang a la tang mawze rawthungte a la cyipaw kha Samuel te Saul kong ryte a tualeihkuh.
E ccauh nynh abyapi lan a langsahkupaw tuh, Pachia tungvaw lungzinaw nynh laansui-uanaw thuakhae zah, kawngae leinaw nynh ronaw a thuakhae, cipaw nynh thua. E bya hynh Pachia nynh ranpibawi Eli a hopyapaw kya ccaerarih lan ah muih oh: “Saw yn tua hae paw tuh saw ka tua cih hae zah, yn theihrya hae paw tuh theihryanaw a ccou cih hae,” cite 2.30 kya a um.
E ccauh kyahin siapharan uknaw raenaw kong kya thinlung aloku leinaw kha a zei hae. Bawipaw amaw ccaccei hynh Israel siapharan ccaccing cite a tua hae, thuasalama ccungccaw hae nynh a ngia hae keiccuze siapharan kha a popya hae. Abyapipaw ccangkheit tuh siapharan te Israel hae nynh Pachia uknaw te byapianaw zakaw khe hoyte a um hae (2.7-10). Pachia kawbya zakaw khe a hoirumpaw te a ryachipaw, ccungccaw balyn tuh phe lokuh hae.
1
Samuel Puinaw te Thyaasahnaw
1 Efraim muaram kya Ramathaim-zofim khua khe ccungccapaw lu kheit um zah a min tuh Elkanah acikuh; aning tuh Jeroham ccapaw, Jeroham tuh Elihu ccapaw, Elihu tuh Tohu ccapaw, Tohu tuh Efraim phinpaw Zuf ccapaw nynh thua.
2 Elkanah tuh zu zuning a hoi; lu kheit min tuh Hannah cikuh zah, ccangpaw lu kheit min tuh Peninnah acikuh. Peninnah tuh ccaaw a hoi, thuasalama Hannah tuh ccaaw hoi khyh.
3 Elkanah tuh vaaw Bawipaw kha beik khylan te silaw khylan a umnaw khua kyate Shiloh khua lang kum takyh a cceih. Eli ccapaw hae lu ning Hofni te Finehas tuh Shiloh khua kyaze Bawipaw ranpibawi hae nynh thua hae.
4 Elkanah nynh si a law nin khe, a zu Peninnah te a ccapaw hae te a ccanung hae balyn kha mih hanpaw raveih kha a pya hae;
5 Bawipaw nynh Hannah kha ccaawsaahnaw kaw a pya khyh zemah, Elkanah nynh a sungsah keiccuze ccoupaw leit ning kha a pya.
6 Bawipaw nynh ccaawsaahnaw kaw a pya khyh keiccuze a rhawnung nynh amaw kha a thinriasah khylan palei a ccyaku.
7 Tuhcite kum kheit koute kum kheit palei acyihkuh; Hannah nynh Bawipaw inn lang a ccia takyhte, Peninnah nynh leih a ccyaku. Tukeiccuze Hannah tuh rah zah looh mah leih ae khyh.
8 A vawpaw Elkanah nynh, “Hannah, pawccemou na raw? Pawccemou na ae khyh? Pawccemou na ngaethya? Kae tuh nang na hanlan ccapaw lu haw laeze ka hoyhua khaw?” a cipya.
9 Shiloh khua kya a ae a neih kou hae te, Hannah tuh thokuh zah Bawipaw malang khe saw a sang. Ranpibawi Eli tuh Bawipaw beikinn thuakawtung pe umpaw haungnaw kyakhe a haung.
10 Hannah tuh a lungria myarya thae zah Bawipaw kalan sawsang zah thawte a rah.
11 Hannah nynh hynh-e byakinkunaw hynh a rae: “Pou vaaw Bawipaw , na seenung ka riathaenaw hynh muihpyate nae liathui zah, na seenung hynh ning leite, ccapise nae pya zetuh, a hiin lungkhu balyn amaw kha Bawipaw kalan ka pya cih. Misutui te ruithyapaw atui kha neih lan khyh zah, a sang kha ngo thua lan khyh,” a ci.Ref 1.11: Nam 6.5
12 Bawipaw malang saw a sang cciamang lyakhe, Eli nynh a mung kha phang a do.
13 Hannah nynh roi accae lei lante saw a sang; a mung kyalya kha piasah zah, a roi tuh thae lan a um khyh keiccuze aruipaw nynh thua cite Eli nynh a tua.
14 Tukeiccuze Eli nynh amaw kha, “Hohseciamou na rui ung cih? Na misutui kha ccaring nung ccavae,” a cipya.
15 Thuasalama Hannah nynh, “Thua khyh, ka bawipaw, kae tuh myarya a lungriathaepaw nopinung nynh ka thua; misutui thuasah, ruithyapaw atui thuasah ka neih khyh, Bawipaw malang khe ka thinlung kha nynh ka laee.
16 Na seenung hynh nopi hoyleipaw lang yn ria nan, pawccecize myarya lepaw ka lungriathaenaw te ka ngaethyanaw kha nynh ka ho cciamang,” a cipya.
17 Tetuh Eli nynh, “Ngaengante la cceih ccavae; Israel Pachia nynh na ngiakupaw kha ae pya vae sah,” a cipya.
18 Te Hannah nynh, “Na seenung kae tuh na malang maehoynaw ka mue vae sah,” a cipya. Te nopinung tuh a umnaw lang cceih zah a vawpaw ryte ae hae neih hae zah, ngaethyanaw maesue hoi vae khyh.
19 Minmin tuh awkhua takaw te tho hae zah Bawipaw kha a beik hae; te Ramah khua umpaw mih inn langkhe a ki hae. Elkanah nynh Hannah kha ikhae zah Bawipaw nynh Hannah kha a liathui.
20 Accyh yn zaw te, Hannah tuh ccaawpoi zah ccapaw kha a saah, tuh-e ccapaw tuh Samuel cite min a phu, pawccecize aning nynh, “Amaw tuh Bawipaw kalan ka ngiakupaw nynh thua,” a ci.
21 Elkanah te a innbyn hae balyn tuh kum takyh raepaw silawnaw kha Bawipaw kalan rae khylan te bya a kinkupaw kha pya khylan a cceih hae.
22 Thuasalama Hannah tuh cceih khyh, pawccecize aning nynh a vawpaw kha, “Imua tuh Bawipaw malang thuakhaete, tuin kya zungzae a um nawlan, mateitui phia athua koute palou ka cciakhae cih; aning tuh thyaasahpaw ccungccaw lang zungzae hanlan ka pya cih,” a cipya.
23 A vawpaw Elkanah nynh, “Ahoyhua na ci hawte cyih, mateitui na phia mawlaezung ngaw hing; Bawipaw nynh a bya palia kha tynsah vae sah,” a cipya. Tukeiccuze nopinung nynh mateitui a phia mawlaezung um zah imua kha matei a zusah.
24 Imua kha mateitui he a phia te, kum thum acihpaw tangnuapaw sa kheit, chanvuih ephah ccangkheit te misutui ling kheit ryte imua kha cciakhae zah, Shiloh khua umpaw Bawipaw inn kya a thuakhae; imua tuh a no ung.
25 Tangnuapaw kha theih hae zah, imua kha Eli kalan a cciakhae hae.
26 Te Hannah nynh, “Pou ka bawipaw! Na hiin thyhte, ka bawipaw, kae tuh hynh-e kya namaw malang thadynte Bawipaw kalan saw a sangpaw nopinung kha nynh ka thua.
27 E imua hanlan saw ka sang zah ka ngiakupaw kha Bawipaw nynh yn pya vae.
28 Tukeiccuze amaw tuh Bawipaw kalan ka hohsaku vae; a hiin lungkhu balyn, aning tuh Bawipaw kalan pya athua vae,” a ci.
Te nopinung nynh Bawipaw hanlan tuin kyakhe a cciataw vae.