15
Vaaw hae te Nyathyakou Shethya
1 Alesaepaw te ngaeang lan umpaw ccangpaw muihsahnaw kha vaawlang khe ka muih, tuh-e tuh nyathyakou e shethya ccangsari a hoi hae paw vaaw hae lu sari nynh thua; pawccecize tuh-e shethya hae tuh Pachia thinrianaw a thangnaw nynh thua.
2 Maee te apykuhpaw thawlang rili alopaw kha ka muih; sarepaw, sarepaw azuh, sarepaw kya-e syntawnaw te a min namba tungvaw taenaw a hoi hae paw nynh Pachia tintang hae kha ccyngkuh hae zah thawlang rili kin khe a thadyn hae paw kha ka muih.
3 Minmin nynh Pachia ryalahtu Moses hlaw te Tuutaw hlaw kha sah hae zah,
“Athung huaccepaw Bawipaw Pachia,
na ryalaw hae tuh lesae zah
ngaeang lan a um!
Minphuin hae Siapharan,
na laanpi hae tuh ding zah ahme!Ref 15.3: Exo 15.1
4 Pou Bawipaw, hummou na rawri leite,
na min kha phu-esah leite a um cih?
Pawccecize nang rou nynh
athyaapaw na thua.
Bya na piapaw balyn tuh
a langku vae keiccuze
minphuin hae balyn nynh
oun thua cih hae zah
ae beik cih hae,”
a ci hae.Ref 15.4: Jer 10.7; Sam 86.9
5 Tukoute he ka do tuh, vaawlang kya ccaekiakhankunaw bu a umnaw beikinn tuh ahungkuh.Ref 15.5: Exo 38.21
6 Shethya ccangsari a hoi hae paw vaaw hae lu sari tuh beikinn lungkhu te oun pou hae; minmin tuh dalahdalah ak zah thyaararihpaw boeining arawpaw kha lawkuh hae zah mih by kya sui taeccia a cciakuh hae.
7 Ahiinpaw sarangpaw hae sa pali kyaze sa kheit nynh zungzae te zungzae cia ahiinpaw Pachia a thinrianaw te phe beihpaw sui pakekhupaw ccangsari kha vaaw hae lu sari kalan khe a pya hae.
8 Beikinn tuh Pachia a phu-enaw te a thungnaw maeekhuh te phe abeih; te vaaw hae lu sari kya-e shethya ccangsari athang makhia tuh hum sanmah beikinn lungkhu lang tee kho khyh.Ref 15.8: Exo 40.34; 1Si 8.10-11; 2Sh 5.13-14; Isa 6.4