12
Nopinung te Nakaa-hupi
1 Vaawlang kya myarya lepaw muihsahnaw a langkuh: Nopinung lu kheit tuh khuanin khate ccaankuh zah sawpaw kha a ccu kaw khe a nung, awsi haw lae ning a umpaw bawilukhung kha a lu vawlan a khungku.
2 Tuh-e nung tuh ccaawpoi zah a ccaaw pui lan acih tuh, neitangia acci keiccuze thawte a siakhaekuh.
3 Vaawlang kya ccangpaw muihsahnaw alangkuh: Dotua oh, alu lu sari te aki ki haw hoi zah, a lu hae vawlan bawilukhung ccangsari a hoipaw, myarya lepaw nakaa-hupi sekakingpaw a um.Ref 12.3: Dan 7.7
4 A leihmae nynh vaawlang e awsi hae pum thum pum kheit kha sue hae zah, laephi vawlan a vua hae; nopinung kya-e vyavya pui vae paw ccaaw tuh ccahe yn pui te, po laang lan cite nakaa-hupi tuh nopinung malang khe phang a thadyn.Ref 12.4: Dan 8.10
5 Tuinte sivaw hoitang te minphuin miakaw a uk cih paw ccapaw kha nopinung nynh a saah; a ccaaw tuh Pachia kalan te a bawitungkhung kalan lawthung athua.Ref 12.5: Isa 66.7; Sam 2.9
6 Nopinung tuh nin thong kheit za ning sung taruh cia looh dang athua ccaw cite Pachia nynh a paccynpyapaw hmin, ramkaw langkhe a ccue.
Mikhael nynh Nakaa-hupi A Tae
7 Te vaawlang kya rhawtukkunaw a um; Mikhael te a vaawccungccaw hae nynh nakaa-hupi kha rhaw a tuk hae, nakaa-hupi te a vaawccungccaw hae nynh rhaw a tukru hae zemah
8 a shung hae keiccuze minmin hanlan vaawlang kya umnaw kharouh um vae khyh.
9 Laephi pynpi a lingpaw, Raerangsaro te Satan a ci hae paw langmawlya e hupaw, myarya lepaw nakaa-hupi tuh laephi kalan vua athua, amaw ryte a vaawccungccaw hae tuh vua athua hae.
10 Vaawlang e roi accaepaw nynh,
“Khumnaw, huhan,
ah Pachia kya-e peenaw te
a Khri kya-e kawhoinaw tuh
atu yn thua vae;
pawccecize ah uno hae kha
seibetupaw, ah Pachia malang
khuazi khuadae minmin kha
seibetupaw tuh sawbung athua vae.
11 Ah uno hae nynh
Tuutaw chii liate thuasah,
mih ccaekia tangnaw bya liate thuasah
Satan kha a tae hae; minmin tuh
chi ngan ciate mih hiinnaw kha
a pyakuh hae.
12 Tukeiccuze, pou vaawlang te
vaawlang a um hae paw,
nae lungtua sah!
Pou laephi te rili, nanning hanlan
ngaethya lan kou um;
pawccecize Satan nynh
ccyh sosoh rou nynh
ka hoi vae cipaw kha a nyku keiccuze
myarya a thinria zah
nae kalan yn rungbung vae,”
cite a hopaw kha ka thae.
13 Nakaa-hupi nynh laephi kalan yn vua vae hae cipaw he a nyh tuh, ccapise a saahpaw nopinung kha a dee.
14 Tuh-e nopinung tuh hupaw kyate lue khylan ramkaw lang a zou nawlan myarya lepaw mosipi sake ccangning kha pya athua; nopinung tuh tuin kyakhe ccyh kheit, ccyh hae te ccyh angankuh cia do-oih athua.Ref 12.14: Dan 7.25, 12.7
15 Tuh-e nopinung tuh tui nynh lou sah cite hupaw nynh a khalang lungkhu te tui kha vawpi hawte nopinung nulang te a pousah.
16 Thuasalama laephi nynh nopinung kha a bawm, laephi nynh a khalang kha aw zah nakaa-hupi nynh a khalang lungkhu te a pousahpaw vawpi kha po a laang.
17 Nakaa-hupi tuh nopinung elang myarya a thinria zah, nopinung ciihan a laehy hae paw kha rhawtuk khylan po a cceih; tuh-e hae tuh Pachia kawbya a zui hae paw te Jesu Khri kya-e ccaekia a hoi hae paw nynh thua.
18 Hupi tuh rili kin laesia vawlan khe a thadyn.