6
Jesu ryte Chikheih Thookheih
Tuhteze pawcihte ah ho cih oh? Thawccinaw houh alung ccaw cite seinaw tou palei ah rae cih oh? Tuhte thua khyh! Seinaw kya ah chih vae oh paw aening tuh pawtemou seinaw lungkhu ah hiin ung cih oh? Jesu Khri kya baptisma ah in vae oh paw aening balyn tuh a chinaw kya baptisma phe ah in vae oh cipaw na nyh khyh oh tou? Tukeiccuze a chinaw kya baptisma ah in oh liate aening tuh amaw ryte uukheih ah thuabua vae oh. Tuhcite Khri tuh Paaw phu-enaw liate chinaw kyate thoosahthui athua hawte, aening mah hiinnaw thawpaw kya ah hiin cih oh.Ref 6.4: Kol 2.12
Pawccecize aening tuh a chinaw kyakhe amaw ryte ah chikheih oh athua ze, a thoothuinaw kya mah amaw ryte ah thookheih cih oh. Aening ah ccungccaw rynpaw kha Khri ryte vaelantung kya khiade athua vae cipaw ah ny oh. Tuh-e tuh seinaw te asekuhpaw pyn hynh ro khylan te seinaw rya ah law vae khyh nawlan oh nynh thua. Pawccecize a chih vae paw ccungccaw tuh seinaw kyate phe a lue vae. Aening tuh Khri ryte ah chikheih vae oh athua ze, amaw ryte ah hiinkheih vae cih oh cite mah ah zyn oh. Pawccecize Khri tuh a chih hae paw kyate thoosah thua vae zah, bua chih vae lan khyh; chinaw nynh amaw kha uk vae khyh cipaw ah ny oh. 10 Pawccecize Khri nynh a chipaw tuh seinaw hanlan chih zah zungzae hanlan vaekheit rou nynh a chi, thuasalama a hiinpaw tuh Pachia hanlan nynh a hiin. 11 Tuhawte nanning mah seinaw kya phe kae chih vae cite tuakuh oh lah, ah Bawipaw Jesu Khri liate Pachia kya kae hiin cite tuakuh oh.
12 Tukeiccuze nae pynsaw rynaw kha zui khylan seinaw nynh a chihthyapaw nae pyn kha uk nan vae sah. 13 Nae pyn kya-e hae mah seinaw rae nawlan hoyleinaw zunghe lante la pyakuh nan oh; thuasalama chinaw kyate thoothui zah a hiin hae paw hawte Pachia kalan pyakuh oh lah, nae pyn kya-e hae kha mah dingnaw zunghe lante Pachia kalan pyakuh oh. 14 Pawccecize nanning tuh Kawbya zakaw um vae leite, thawccinaw zakaw kya na um vae oh keiccuze seinaw nynh ae uk vae lan khyh oh.
Dingnaw See hae
15 Tuhteze pawtemou? Aening tuh Kawbya zakaw um leite thawccinaw zakaw kya ah um vae oh keiccuze seinaw ah rae cih oh tou? Tuhte thua khyh! 16 Nanning nynh naemaw te naemaw kha lukhakheit kalan khe kaw a ngaepaw see lang na pyaku oh lan athua ze, nanning tuh a kaw na ngae oh paw tuh-e paw see nynh kae thua cipaw na nyhkuh khyh oh tou? Chinaw kalan a thuakhaepaw seinaw kalan na pyaku oh ze thuasah, dingnaw kalan a thuakhaepaw kawngaenaw kalan na pyaku oh ze thuasah, nanning tuh tuh-e hae see nynh na thua oh. 17 Thuasalama nanning tuh vaekheit lyaze seinaw see hae na la thua oh zemah, atu tuh na mue oh paw ccangpyanaw kha nae thinlung te phe na lawku vae oh keiccuze Pachia kya thehoynaw um sah. 18 Seinaw kyate luesah na thua vae oh zah, dingnaw see lang nynh na tang vae oh. 19 Nae pynsaw lante na ccing khyh oh keiccuze ccungccaw bya huataw te kae hopya oh; pawccecize langmawlya tuh nae pyn kya-e hae kha ahoy leipaw rae nawlan anungsikuhpaw te ahoy leipaw see lang na la pyaku oh hawte, atu mah nae pyn kya-e hae kha athyaapaw rae nawlan dingnaw see lang pyakuh oh.
20 Pawccecize nanning tuh seinaw see hae na la thua lya oh kha dingnaw kyate na la lue oh. 21 Atu nae maethyakhaekupaw tuh-e uccaw hae kyate thanenaw pawmou na mue oh? Tuh-e uccaw hae athangnaw tuh chinaw nynh thua. 22 Thuasalama atu tuh seinaw kyate luesah na thua vae oh zah, Pachia see lang na tang vae oh keiccuze thyaanaw hanlan thanenaw kha na mue oh, te athangnaw lan zungzae hiinnaw kha na mue cih oh. 23 Pawccecize seinaw mee tuh chinaw nynh thua; thuasalama Pachia kya-e lasung tuh ah Bawipaw Jesu Khri liate zungzae hiinnaw nynh thua.