5
Thyaaccounaw kyate Muepaw
1 Tukeiccuze zynnaw liate thyaaccousah ah thua vae oh zah, ah Bawipaw Jesu Khri liate aening tuh Pachia te ah ccawkuh vae oh.
2 Aening ah thadynnaw oh hynh-e thawccinaw lungkhu lang amaw zynnaw liate nynh aening naeku khonaw ah hoi oh; Pachia phu-enaw kha neethungku lan ah ngaehoi oh zah ah lungtua.
3 Hynh-e kya kyalya thua khyh, aening ah teingnaw oh kya mah ah lungtua; pawccecize teingnaw nynh ngaesangnaw kha a thuakhae cipaw ah ny oh;
4 ngaesangnaw nynh Pachia lungtungnaw kha a thuakhae, tuh-e lungtungnaw nynh ngaehoinaw kha a thuakhae;
5 ngaehoinaw nynh lungronaw kha oun pya khyh, pawccecize Pachia nynh aening oun pyapaw Thyaa Muisaw liate a sungsahnaw kha ah thinlung kya oun bu vae.
6 Pawccecize aening ah thawzya ccyh lyakhe Khri tuh accyh zawte Pachia nyh lei hae paw hanlan a chih.
7 Adingpaw ccungccaw hanlan a chipah cih paw ccungccaw kou akhin cih, tuhzemah ccungccaw hoypaw hanlan a chih nganpaw poh um ccamah ny lei.
8 Thuasalama aening tuh misei hae ah thua cciamang lya oh khe, Khri nynh aening hanlan oun chipyapaw tuh Pachia nynh aening kha pawcih nynh oun sungsah cipaw a langsakunawpaw nynh thua.
9 Tukeiccuze atu tuh a chiise liate thyaaccousah ah thua vae oh zah, amaw liate Pachia thinrianaw kyate khum ah thua vae cih oh.
10 Pawccecize aening tuh Pachia rhaw hae ah thua lya oh khe, a Ccapaw chinaw liate Pachia te ah ccawkuthui vae oh, tuhte ccawkuthuinaw ah mue vae oh paw aening tuh a hiinnaw liate khum ah thua vae cih oh.
11 Tuh kyalya thua leite, ah Bawipaw Jesu Khri liate aening tuh ccawkuthuinaw atu ah mue vae oh zah, amaw liate Pachia kya ah lungtua.
Adam te Jesu
12 Pawccemacize ccungccaw lu kheit keiccuze seinaw tuh laephi kalan yn thua zah, seinaw liate chinaw tuh yn thua, tukeiccuze ccungccaw balyn tuh marya ah sei vae oh keiccuze chinaw nynh pong oun thuanua vae.Ref 5.12: Gen 3.6
13 Kawbya pya athua mawze laephi kya seinaw phe a um vae; thuasalama kawbya a um maw e seinaw tuh riapya thua loh khyh.
14 Tuhzemah Adam she kyate Moses she kyacia chinaw nynh phe a uk vae; Adam nynh a raepaw seinaw te alokuh leipaw seinaw a rae hae paw kha mah chinaw nynh phe a uk hae, tuh-e Adam tuh nyalang yn thua cih paw kya-e langsahkupaw muinsan nynh athua.
15 Thuasalama alakawte muepaw lasung te seinaw tuh lokuh khyh. Pawccecize ccungccaw lu kheit seinaw keiccuze ccungccaw patae tuh a chi hae ze, Pachia thawccinaw te ccungccaw lu kheit athuapaw Jesu Khri thawccinaw liate alakawte muepaw lasung tuh ccungccaw patae hanlan houh alehua.
16 Ccungccaw lu kheit seinaw liate yn thuapaw te alakawte muepaw lasung tuh lokuh khyh, pawccecize seinaw ccangkheit nulang a zuikuhpaw byapianaw nynh seibenaw kha yn thuakhae, thuasalama seinaw patae nulang a zuikuhpaw alakawte muepaw lasung tuh thyaaccounaw nynh thua.
17 Ccungccaw lu kheit seinaw liate, tuh-e paw keiccuze chinaw nynh a uk; thawccinaw phe beih lan a ccou hae paw te alakawte muepaw dingnaw lasung a ccou hae paw tuh lukheitpaw, Jesu Khri liate zungzae hiinnaw a hoi cih hae.
18 Tukeiccuze ccungccaw lu kheit seinaw nynh ccungccaw balyn kha byapianaw kalan oun thuakhae hawte, ccungccaw lu kheit dingnaw nynh ccungccaw balyn kha hiinnaw te asekuhpaw thyaaccounaw kalan oun thuakhae.
19 Pawccecize ccungccaw lu kheit nynh kawngae khyh keiccuze ccungccaw patae tuh misei lang tangsah athua hae hawte, ccungccaw lu kheit nynh kaw a ngaenaw liate ccungccaw patae tuh miding lang tangsah athua cih hae.
20 Seinaw lungsah khylan Kawbya tuh yn thua; thuasalama seinaw alungnaw kya thawccinaw houh alunghua.
21 Tuh-e tuh seinaw nynh chinaw kya a uk hawte, thawccinaw nynh mah ah Bawipaw Jesu Khri liate zungzae hiinnaw mue khylan thyaaccounaw liate a uk nawlan nynh thua.